J&J fillon furnizimet me vaksinat COVID-19 në BE

@pixabay

Johnson & Johnson të hënën filloi shpërndarjen e vaksinave me një dozë të vetme COVID-19 në vendet e BE-së, thanë zyrtarët e Bashkimit Evropian dhe kompania, shkruan “Reuters”, përcjell albinfo.ch.

Kompania fillimisht kishte planifikuar të fillonte dërgesat e saj në fillim të prillit, por u vonua për shkak të çështjeve të prodhimit.

“Dozat e para po largohen nga depot për vendet anëtare sot”, tha një zëdhënës i Komisionit Evropian të hënën në një konferencë shtypi.

“Johnson & Johnson fillon dërgesat e vaksinave në BE sot. Një lajm shumë i mirë”, tha Peter Liese, një ligjvënës i BE-së nga e njëjta parti me Kancelaren gjermane, Angela Merkel.

Kompania amerikane është zotuar të japë 55 milionë doza në BE deri në fund të qershorit dhe 120 milionë të tjera në tremujorin e tretë, tha komisioneri i industrisë së BE-së, Thierry Breton, këtë muaj, përcjell tutje albinfo.ch.