Janeva: Gruevski, së shpejti në burg

Kryeprokurorja Speciale e Maqedonisë, Katica Janeva, ka theksuar se shpreson se ish-kryeministri Nikolla Gruevski shumë shpejt do të shkojë në burg.

Ajo në emisionin “Vetëm e vërteta” në Kanal5 ka theksuar se së shpejti do ta shohë Gruevskin prapa grilave, pas dënimit të tij me 2 vjet burgim për rastin “Tanku”, përcjell albinfo.ch.

“Nga përvoja që kam, mund të them se kjo do të ndodhë për 20 ditë. Deri të premten pres aktgjykimin nga Gjykata e Apelit në Shkup, që do të dërgohet në formë të shkruar edhe tek Prokuroria jonë Speciale, dhe pas kësaj edhe Gruevski do të marrë vendimin dhe mund të shkojë në burg”, theksoi Janeva. Gjykata e Apelit vërtetoi dënimin prej 2 vjetëve burgim për ish-kryeministrin Gruevski.