Haradinaj: Beogradi duhet urgjentisht të heqë dorë nga veprimet destabilizuese e luftënxitëse

Kryetari i Aleancës për Ardhmërinë e Kosovës, Ramush Haradinaj, ka reaguar pas sulmeve në very të Kosovës, ku është vrarë një pjesëtar i Policisë së Kosovës dhe një tjetër ka mbetur i plagosur.

Përmes një postimi në rrjetin social “Facebook”, Haradinaj është shprehur se Serbia duhet të heqë dorë nga këto veprime siç i quajti ai destabilizuese dhe luftënxitëse, shkruan albinfo.ch.

“Ky sulm terrorist është goditje e rëndë mbi paqen dhe stabilitetin jo vetëm në Kosovë por edhe në rajon! Beogradi duhet që urgjentisht të heqë dorë nga veprimet e veta destabilizuese e luftënxitëse me pasoja të paparashikueshme jo vetëm për Kosovën por edhe për Serbinë. Është investuar shumë për paqen dhe askush nuk do të lejohet ta rrezikojë atë”, ka shkruar ai.

Ai ka ftuar organet e rendit për bashkërendim të veprimeve me KFOR-in dhe aleatët e sigurisë të prirë nga Shtetet e Bashkuara të Amerikës, të ndërmarrin të gjitha veprimet e nevojshme për ta zbardhur gjithë këtë situatë dhe për të sjellë para drejtësisë, përgjegjësit e këtij akti.

“Ftoj organet tona të rendit për bashkërendim të veprimeve me KFOR dhe aleatët tanë të sigurisë të prirë nga Amerika, dhe të ndërmarrin të gjitha veprimet e nevojshme për ta zbardhur gjithë këtë situatë dhe për të sjellë para drejtësisë përgjegjësit e këtij akti. Rendi dhe ligji s’ka alternativë! Ngushëllime për familjen e policit që humbi jetën dhe shërim të shpejtë për policin e plagosur!”, ka përfunduar ai.