Hapet Qendra e skijimit në Brezovicë

Prej sot Qendra e skijimit në Brezovicë është e hapur për vizitorë dhe shfrytëzuesit e saj.

Vendimi për hapjen e qendrës erdhi pas raportit të Brigadës së Mbështetjes së Operacioneve të Komandës së Forcave Tokësore të FSK-së, ku është vlerësuar se aktualisht nuk ka rrezik për paraqitjen e orteqeve në zonën e skijimit në Brezovicë. 

 “Aktualisht bora është ngjeshur dhe lagur në sasi të konsiderueshme dhe mundësia e lëshimit të saj për të krijuar ortek është e vogël”, thuhet në raport, përcjell albinfo.ch.

Zona e Brezovicës ishte vlerësuar me rrezik të mesëm për krijimin e orteqeve pas incidentit që ndodhi javën e kaluar. 

Me qëllim të parandalimit të rreziqeve të mundshme në zonën e Brezovicës në të ardhmen, AMMK ka kërkuar nga FSK që të vendosë një njësit permanent të kërkim-shpëtimit në qendër gjatë kohës së vizitorëve dhe funksionimit të ski-liftit.