Grupet shqiptare, më aktivet në trafikimin me qeniet njerëzore

Nga të gjithë azilkërkuesit e paraqitur në Zvicër 80 % deklarojnë se kanë ardhur deri këtu me ndihmën e bandave kriminale, thuhet në një raport të Fedpol

Keystone

Sipas një raporti që ka prezantuar sot Policia Federale e Zvicrës (Fedpol) del se deri më tash ka pasur një neglizhim të luftës kundër trafikut të organizuar me qenie njerëzore. Për pasojë, Zvicra duhet të përforcojë këtë luftë gjegjësisht të ashpërsojë masat kundër kësaj dukurie.  

Raporti në fjalë konstaton se ka gjithnjë e më shumë migrantë që bien në duar të bandave krimeve të trafikantëve. Nga të gjithë azilkërkuesit e paraqitur në Zvicër 80 për qind kanë deklaruar se kanë ardhur deri këtu  me ndihmën e bandave të përmendura. Nga ana tjetër në Zvicër brenda vitit ka jo më shumë se 20 dënime për veprën penale të trafikimit me qenie njerëzore. Për këtë arsye raporti kërkon që policia dhe drejtësia duhen të aftësojnë më tepër ekspertë për luftë kundër trafikimit me qenie njerëzore.

Sidomos sfidë të madhe përbëjnë bandat kriminale nga vendet e jashtme që veprojnë si rrjete ndërkombëtare të krimit.

Këto banda janë duke e kryer “punën” e tyre me metoda gjithnjë më të sofistikuara, përmes falsifikimeve të bëra në mënyrë më profesionale se më parë etj.

Edhe rrugët e trafikimit ndryshojnë vazhdimisht. Më së shpeshti ato kalojnë përmes vendeve të Ballkanit, merr vesh albinfo.ch. Në Zvicër ato shfrytëzojnë trafikun rrugor dhe atë hekurudhor , përmes vendeve të zonës së Shengenit, nga jugu, lindja dhe juglindja.

Vetë grupet që bëjnë trafikun identifikohen me etninë e të trafikuarve. Në Zvicër aktualisht janë në plan të parë grupet kriminele shqiptare, si dhe ato siriane dhe në masë më të vogël ato eritreane.