Shqipëria
Gratë e njohura shqiptare, mesazh mjekëve: Po na tregoni se ju jeni shpresa
Gra intelektuale shqiptare që jetojnë brenda dhe jashtë vendit, kanë përcjellë një mesazh mirënjohjeje për mjekët shqiptarë.

Një mesazh nga gra intelektuale shqiptare të njohura brenda e jashtë kufijve në këtë kohë të vështirë jo vetëm për Shqipërinë në përballje me koronavirusin. Qendra Kombëtare e Librit dhe Leximit ka bërë bashkë gra shkrimtare, studiuese, botuese, profesoresha në një mesazh drejtuar mjekëve, përcjell albinfo.ch.
Në këtë mesazh, zëri më i fortë i gruas shqiptare shprehet me respekt e mirënjohje për mjekët, infermierët e punonjësit e sistemit shëndetësor shqiptar. “Me përkushtim të rrallë, duke mjekuar të sëmurët e duke qenë pranë tyre pa pushim, ju po shpëtoni Shqipërinë, në këtë betejë, e cila si asnjëherë më parë, nuk kërkon armë për të mposhtur armikun, por dashuri, përgjegjshmëri, ndjenjë detyre, përkushtim, vetësakrifikim për tjetrin dhe komunitetin”, thuhet në mesazhin e tyre.
“Të dashur e të nderuar mjekë, infermierë e punonjës të sistemit tonë shëndetësor,
Ju shprehim respekt e mirënjohjeje të thellë!
Jemi krenarë për ju, që punoni sot në këtë front të vështirë, në vijë të parë të luftës kundër koronavirusit!
Janë ditë të vështira, me shumë të panjohura e në garë me kohën, por ju, me profesionalizëm të jashtëzakonshëm, keni vënë gjithë energjitë dhe shpirtin tuaj të madh për të shpëtuar vendin nga ky rrezik. Me përkushtim të rrallë, duke mjekuar të sëmurët e duke qenë pranë tyre pa pushim, ju po shpëtoni Shqipërinë, në këtë betejë, e cila si asnjëherë më parë, nuk kërkon armë për të mposhtur armikun, por dashuri, përgjegjshmëri, ndjenjë detyre, përkushtim, vetësakrifikim për tjetrin dhe komunitetin.
Shpesh, përpara se të na binte kjo fatkeqësi, kushdo prej nesh, i kënaqej jetës sonë të “vogël”, duke ndjerë ndërkohë, se në emër të lirisë së individit, po humbte solidariteti për njëri-tjetrin, po humbte altruizmi, po humbte përfshirja në shqetësimet e komunitetit, por me gjithë këtë që po ndodh prej ditësh, ju po na provoni të kundërtën.
Ju na dëshmuat se jo të gjitha ato që kemi thënë janë të vërteta. Jeni profesionistë të shkëlqyer, e po kaq solidarë e altruistë. Një tjetër krenari që ndjejmë këto ditë të vështira, është pikërisht ky profesionizëm i lartë mes jush, që e vini në shërbim të shoqërisë, si e kini vënë gjithnjë, në heshtje, me devotshmëri, pa bujë.
Gjatë kësaj periudhe të pazakontë, përveç tjerash, ju keni qenë në çdo familje shqiptare, ju jeni modeli i njeriut dhe qytetarit për fëmijët tanë përtej çdo leksioni e ore mësimore; ju krijuat modele sjelljesh pozitive, që lidhen me vlerat humane, siç është forcimi i solidaritetit, po edhe respekti për mendimin shkencor e për punën profesionale; dhe ne si shoqëri kemi shumë nevojë edhe për këto.
Ju po na tregoni çdo ditë e çdo natë se Shqipëria nuk i ka humbur shpresat, se nuk i ka humbur bijat dhe bijtë e saj.
Në shenjë mirënjohjeje e përunjësie!
-Mynever Shuteriqi
-Fatmira Aliaj
-Floresha Dado
-Helena Kadare
-Flutura Acka
-Diana Çuli
-Lili Sula
-Vera Bekteshi
-Pranvera Bogdani
-Arlinda Dudaj
-Mimoza Ahmeti
-Natasha Lako
-Monika Stafa
-Diana Kastrati
-Mira Meksi
-Meri Lalaj
-Alda Bardhyli
-Mimoza Kore
-Rita Petro
Të ngjashme
Të tjera nga Shqipëria
E-Diaspora
-
Nikson Gjoka: “Me ‘Fly’ po fluturoj drejt ëndrrës time!” Pas publikimit të këngës së tij të parë “Fly”, model dhe tani edhe artist, Nikson Gjoka...
-
Maqedoni: Gjykata vendos se të gjithë qytetarët, përfshirë edhe mërgatën do të trajtohen si “rezidentë”
-
Artistja nga Kosova fiton çmimin “Aktorja më e Mirë” në Madrid
-
Shqiptarja nga Prishtina finaliste në çmimin global “Cybersecurity Woman of the Year 2025”
-
Kosovari godet me makinë motoçiklistin e rrëzuar dhe thotë: Mendova se ishte kaproll!
Jeta në Austri
-
Austri: Frikë nga turizmi lakuriq nga Zvicra Qyteti i Bregenzit në Austri po përgatitet të zyrtarizojë një zonë për larje nudo në bregun...
-
Austri: Një projekt i ri pilot synon mësimin e gjuhës gjermane fëmijëve migrantë në kopsht
-
Trenat e rinj me dy kate nisin operimin në Austri
-
Raporti: 400 super të pasur zotërojnë 37% të pasurisë financiare të Austrisë
-
Pse po rriten çmimet e transportit në Vjenë dhe për sa?