Google akuzohet për praktika mashtruese për vendndodhjen e përdoruesit 

Organizata e Konsumatorëve Evropianë, BEUC, akuzoi kompaninë Google për shkelje të ligjeve përmes praktikave të saj mashtruese për të gjetur vendndodhjen e përdoruesit, transmeton albinfo.ch. 

Bazuar në një punë kërkimore të bërë nga anëtari i kësaj organizate, Forbrukerrådet nga Norvegjia, rezultatet e së cilës BEUC i publikoi, shtatë organizata konsumatore tashmë kanë përpiluar një padi kundër Google, në bazë të ligjit evropian “Regullativa e Mbrojtjes së Përgjithshme të të Dhënave”.

“Të dhënat e vendndodhjes mund të zbulojnë shumë për njerëzit, përfshirë besimin fetar (kur shkon në vendet e adhurimit), prirjet politike (shkuarja në demonstrata), kushtet shëndetësore (vizitat e rregullta në spitale) dhe orientimi seksual (vizitat e bareve të caktuara)”, thuhet në reagimin e BEUC-së. 

Raporti, thuhet në reagimin e organizatës së konsumatorëve evropianë flet se Google përdor truke dhe praktika të ndryshme, në mënyrë që të sigurojë që përdoruesit të aktivizojnë këto ndjekje, por pa u sqaruar atyre se çfarë në fakt nënkupton kjo.