Fundoset anija në Danub, 7 turistë humbin jetën dhe 19 janë të zhdukur

Lumi Danub, një atraksion popullor për turistët, u rrit për shkak të reshjeve të mëdha, duke shkaktuar rryma të forta

Një ngjarje tragjike është regjistruar mbrëmjen e djeshme në Budapest të Hungarisë.

Raportohet se një anije me turistë është mbytur duke shkaktuar të paktën shtatë të vdekur dhe 19 të zhdukur. Anija ishte goditur nga një anije tjetër ndërsa po ankorohej. Ngjarja ndodhi të mërkurën rreth orës 22:00 në lumin Danub. Turistët ishin kryesisht nga Koreja e Jugut, derisa në të ndodheshin rreth 33 persona, përcjell albinfo.ch.

Anija që u fundos u identifikua si “Hableany”, ose Mermaid. Anija ka dy kuverta dhe një kapacitet prej 45 personash. Lumi Danub, një atraksion popullor për turistët, u rrit për shkak të reshjeve të mëdha, duke shkaktuar rryma të forta.

Varka është gjetur në shtratin e lumit vetëm disa qindra metra nga pika e saj e zakonshme e ankorimit, por pasagjerët dhe ekuipazhet e humbur mund të jenë transportuar nga rrymat më larg. Koreja ka konfirmuar se 19 persona kanë humbur, derisa do të nisin një ekip zyrtar në Hungari për të ndihmuar viktimat dhe të jenë në shërbim të atyre që kanë shpëtuar.

---