Edona Bilali nis një etapë të re akademike si lektore në Vjenë

Nga Tirana në Vjenë: Edona Bilali bëhet pjesë e stafit akademik në FH-Wien

Ish-deputetja dhe akademikja shqiptare Edona Bilali ka ndarë një lajm të veçantë për karrierën e saj profesionale. Duke filluar nga ky vit, ajo do të jetë lektore në FH-Wien në Vjenë, Austri, një prej institucioneve prestigjioze të arsimit të lartë në Evropë, shkruan albinfo.at.

Bilali, e cila ka përfunduar dy doktorata, përfshirë një në Austri, thekson se ky angazhim është një vazhdim i natyrshëm i pasionit të saj shumëvjeçar për arsimin dhe inovacionin.

“Ky angazhim që do të kërkojë disa fundjava në vit për mua nuk është thjesht një etapë profesionale pas 15 vitesh mësimdhënie në Shqipëri, por një kujtesë e bukur se puna që bëhet me pasion është si drita – sado larg të jesh, ajo gjen gjithmonë mënyrën të ndriçojë,” shkruan Bilali.

Ajo kujton me krenari vlerësimin “Summa Cum Laude” që mori gjatë studimeve të doktoraturës, një nder që e lidh ngushtë me Austrinë – vendin ku tani rikthehet si pedagoge.

“Si shqiptare, jam me zemrën plot dhe ky moment është dëshmi se rrënjët tona nuk na pengojnë të fluturojmë, përkundrazi, na japin forcë të tregojmë se puna nuk njeh kufij,” shton ajo.

Në ditën e saj të parë në universitetin austriak, Bilali ligjëroi për studentët e masterit në “Inovacion Dixhital” dhe “Inovacion Teknologjik Dixhital”, duke ndarë përvoja dhe ide mbi zhvillimin e teknologjive të reja.

“Është mbresëlënëse sesi pas orësh mësimdhënie energjia është më e madhe se në nisje, falë përvojave të ndryshme por tejet impresionuese që bashkëndajmë me studentët,” theksoi ajo, duke shtuar se përvoja nga jashtë e ndihmon të kthehet në vend me motivim edhe më të madh për detyrën e saj parësore.

Në fund, Edona Bilali ndau një mesazh frymëzues për të rinjtë shqiptarë, duke i inkurajuar të ecin me durim dhe pasion:

“Puna e bërë me zemër nuk ka nevojë për zhurmë – ajo vetë gjen rrugën për t’u dëgjuar. Prandaj durim, sepse mundi nuk shkon kurrë dëm.” /Albinfo.at.

---