Edhe eksportuesi më i madh i gazit të lëngshëm paralajmëron dimër të vështirë

Shtetet e Bashkuara të Amerikës kanë përfituar nga çmimet e larta në Evropë

Eksportuesi më i madh amerikan i gazit të lëngshëm natyror paralajmëroi se rezervat e kufizuara në gjithë botën nënkuptojnë se ky dimër do të jetë shumë i ashpër.

Cheniere, i cili ka dërguar rreth 70% të gazit në Evropë këtë vit, shtoi se ringjallja e kërkesës kineze për gaz të lëngshëm natyror do të përkeqësojë dhe më shumë krizën energjetike në Evropë, ku furnizimi me gaz natyror nga Rusia nëpërmjet NordStream është ndërprerë.

Sipas drejtuesve të kësaj kompanie, do të jenë temperaturat dhe politikat qeverisëse që do të përcaktojnë atë që do të ndodhë në treg. Për momentin, mjedisi aktual i çmimeve tregon se furnizimet me gaz natyror të lëngshëm do të vazhdojnë të shkojnë në Evropë, shkruan Scan, përcjell albinfo.ch.

Shtetet e Bashkuara të Amerikës kanë përfituar nga çmimet e larta në Evropë, falë pushtimit të Ukrainës nga Rusia këtë vit, duke rritur eksportet e gazit natyror të lëngshëm në një nivel të konsiderueshëm.

Kina gjithashtu po dërgon gaz të lëngshëm natyror në Evropë në momentin që dhe politikat për zero Covid po peshojnë ende në kërkesën e brendshme. Bloomberg raporton se transportues të mëdhenj, përfshirë Sinopec dhe PetroChina, kanë eksportuar një sasi të madhe gazi natyror të lëngshëm në vendet evropiane që po përballen me vështirësi këtë vit.

---