Ministri Behgjet Pacolli paralajmëron dy njohje të reja për Kosovën

Ministri i Punëve të Jashtme, Behgjet Pacolli, në raportimin para Komisionit për Punë të Jashtme ka paralajmëruar njohje të reja për vendin.

Ai ka thënë se këto ditë pritet njohja e Kosovës nga Kongo dhe Etiopia. Raportimi i Pacollit ka qenë mjaft i tensionuar, transmeton albinfo.ch.

Deputeti i Lëvizjes Vetëvendosje, Glauk Konjufca, e ka pyetur Pacollin se a kishte emëruar në Ruandë si konsull nderi Enrike Rajs, i cili është duke u përndjekur nga drejtësia amerikane për krim të organizuar.

Konjufca po ashtu ka thënë se në opinion janë hedhur edhe dyshimet se Pacolli ka lidhje biznesore me të. Pacolli ka reaguar ashpër ndaj kësaj pyetjeje, duke thënë se nëse vazhdohet me këto akuza, do ta lëshojë mbledhjen.

Megjithatë, kreu i diplomacisë ka mohuar se Rajs është emëruar konsull nderi nga ana e tij dhe se të njëjtin e ka njohur përmes ambasadorit William Walker.