Dy murgesha nga Kosova humbën jetën në aksidentin në Shkodër

Janë identifikuar dy personat që humben jetën në aksidentin në Shkodër, derisa konfirmohet se ato janë dy murgesha nga Kosova.

Në aksidentin e rëndë të ndodhur mesditën e së mërkurë në aksin rrugor Shkodër-Lezhë, bëhet me dije se dy personat që humbën jetën janë murgesha nga Kosova, të identifikuara si shtetaset Diana Mjeshtri 45 vjeçe dhe Luljeta Zefi 39-vjeçe, ndërsa pesë persona të tjerë mbetën të lënduar rëndë, njofton Klan Kosova.

Siç shkruan “Mapo”, nga hetimet paraprake, sipas burimeve policore rezulton se mjeti tip “Fouristradë” ku udhëtonin 4 persona që kanë mbetur të lënduar, ka goditur në pjesën e pasme mjetin tip “AUDI” me targë 778 RA ku udhëtonin tre murgesha, përcjell albinfo.ch.

Si pasojë e përplasjes dy murgesha humbën jetën, ndërsa murgesha, Beta Mata 32 vjeçe ka mbetur e plagosur rëndë.

Fouristrada ka tentuar që të frenojë, por si shkak i shpejtësisë ka qenë e pamundur për të ndaluar apo për të manovuar.

Fouristrada ka përfunduar në kanal ndërsa fare pranë saj edhe mjeti tjetër i aksidentuar. Pesë të plagosurit ndodhen nën kujdesin e mjekëve në spitalin e Shkodrës.