Dr. Omer Xhemali, ndër 100 kokat e mençura të Zvicrës

Kirurgu i njohur i zemrës, shqiptari nga Tetova, prof. dr. Omer Xhemali, njihet më shumë për faktin se është shqiptari i parë që ka bërë transplantim të zemrës

Me idetë e tyre gjeniale ata ndryshojnë botën. Gazeta e njohur zvicerane “Tages Anzeiger” për çdo javë në rubrikën e saj “Treffen mit” (Takimi me) prezanton gra dhe burra nga shkenca, duke filluar nga mendimtarë jokonvencionalë e deri te fituesit e çmimit Nobel. Bëhet fjalë për koka origjinale, të cilat e formësojnë ardhmërinë tonë.

Kirurgu i njohur i zemrës, shqiptari nga Tetova prof. dr. Omer Xhemali (Omer Dzemali) është zgjedhur si njëri ndër ta. Ai, ndër shqiptarët njihet më shumë për faktin se është shqiptari i parë që ka bërë transplantim të zemrës. Këtë ndërhyrje, për herë të parë e ka bërë në vitin 2008, në Klinikën Universitare të Frankfurtit, Gjermani. Kanë pasuar edhe katër transplantime tjera të suksesshme. Albinfo.ch ka intervistuar disa herë atë.

Pasi ka bërë një karrierë të dalluar prej mjeku dhe studiuesi në Gjermani,  dr.Omeri prej disa vitesh punon në Spitalin “Triemli” të Cyrihut, ku mban pozitën e zëvendësshefit të repartit të kardiokirurgjisë.

Omer Xhemaili ka lindur në vitin 1970 . Pasi ka mbaruar studimet e mjekësisë dhe specializimin për kardiokirurg në Gjermani, ka punuar një kohë të gjatë në klinika të ndryshme të atjeshme.

Është bashkautor i dy titujve nga fusha e mjekësisë dhe autor i mbi 100 artikujve tjerë dhe abstrakteve shkencore, shkruan albinfo.ch

Në vitin 2007 zgjidhet si autor më i mirë i një pune shkencore në Gjermani, Austri dhe Zvicër, ku edhe merr çmimin “Hans Borst”.

“Unë nuk dua të bëhem hulumtues me famë botërore por dua që pacientëve të mi t`ua ofroj trajtimin më të mirë të mundshëm”, thotë doktori. Por, megjithatë, ai ka dëshmuar se mund të jetë inovativ. Në spitalin ku punon, ai ka praktikuar për herë të parë në Zvicër një metodë të re mjekësore. Pas një operacioni të valvulave të zemrës ai ka arritur ta mbyllë një prerje të vogël në zemër pa përdorur penj.