Dita e titullit në Kosovë

Gjithsesi Feronikeli dhe Prishtina do të garojnë në garat evropiane, sepse në edicionin e ardhshëm do të garojnë tri skuadra nga Kosova, një në Ligën e Kampionëve dhe dy në Ligën e Evropës

Sot do të vendoset titulli i Kosovës në futboll, ku ‘finalja’ zhvillohet në Drenas, ndërmjet Feronikelit dhe Prishtinës.

Ndeshja zhvillohet në stadiumin “Rexhep Rexhepi” në Drenas dhe fillon në ora 16:00.

Feronikeli mund të shpallet kampion me fitore apo barazim, ndërsa Prishtinës i duhet patjetër fitorja për ta kthyer titullin në kryeqytet pas gjashtë vjetësh, pasi është dy pikë prapa Feronikelit, përcjell albinfo.ch.

Nëse Feronikeli fiton, ky do të jetë titulli i tretë në histori për skuadrën drenicase, kurse Prishtina do ta fitonte për herë të tetë këtë titull pas luftës.

Prishtina nuk është mposhtur në 12 ndeshjet e fundit, ndërsa në përballjet e fundit me Feronikelin, Prishtina nuk është mposhtur në 9 ndeshje, ka fituar 4 ndeshje dhe ka barazuar në 5 ndeshje.

Në 6 ndeshjet e fundit në Drenas, Prishtina ka fituar 3 herë dhe ka barazuar 3 herë me goldallim 4:1.

---