Dënime të merituara për “tre të dhunshmit e Munihut”

Fajtori kryesor, Mike B. është dënuar me 7 vjet burg, Benji D me 4 vjet dhe 10 muaj burg. dhe Ivan Z. me 2 vjet e 10 muaj

Tre të rinj nga rrethina e Cyrihut, të cilët vitin e kaluar, deri sa ishin në ekskursion në Munih, i kishin shkaktuar plagë të rënda një gjermani 46 vjeç, janë shpallur fajtorë sot nga një gjykatë e Munihut, shkruan Blick.ch.

Fajtori kryesor, Mike B. (18 vjeç) është dënuar me 7 vjet burg për tentim vrasjeje. Po kështu për tentim vrasjeje është dënuar shoku i të parit, Benji D. (18), i cili do të mbajë 4 vjet dhe 10 muaj burg. Më së lehti ka shpëtuar Ivan Z. I, (18). Ai është shpallur fajtor për veprën shkaktim i lëndimit të rrezikshëm trupor dhe për këtë i është shqiptuar masa e dënimit prej 2 vjet e dhjetë muaj burg.

Këto dënime duket të jenë relativisht të ulëta në krahasim me ato që ka kërkuar akuza dhe në krahasim me standardet e ashpra që praktikohen në Gjermani e veçanërisht në Bavari për vepra të tilla penale. Këtë vlerësim e jep edhe avokati mbrojtës i njërit nga të dënuarit. Për Mike B. prokuroria kishte kërkuar 9 vite burg, për Benji D. 7 dhe për Ivan Z., 6 vjet heqje lirie.

Gjermani Wolfgang O. i cili kishte pësuar lëndime me rrezikshmëri për jetën, vazhdon të ketë pasoja shëndetësore nga sulmi i tre të rinjve.