Vonesë në votimin me postë për diasporën

Qytetarë nga diaspora që janë regjistruar për votim me postë nuk i kanë pranuar fletëvotimet brenda afatit të caktuar nga KQZ-ja. Vonesa ka ndodhur pasi procesi i shtypjes së fletëvotimeve, i realizuar në Slloveni, është përmbyllur vetëm më 12 dhjetor, shkruan albinfo.ch

Si pasojë, ende nuk ka nisur votimi përmes postës, i planifikuar për të premten. Nga KQZ-ja kanë bërë të ditur se pakot me fletëvotime pritet t’u dërgohen votuesve të regjistruar në fillim të javës së ardhshme.

Shoqëria civile paralajmëron se këto vonesa mund t’ua pamundësojnë një pjese të qytetarëve që jetojnë jashtë Kosovës ushtrimin e së drejtës së votës, pasi koha për plotësim dhe kthim të fletëvotimit do të jetë e kufizuar. Në total, mbi 55 mijë votues janë të regjistruar për votim me postë.