Danimarka ashpërson kriteret për emigrantët

Të huajt që pas dy vite qëndrimi nuk kanë gjetur punë me pagë vjetore që kalon 315 mijë korona (51400 franga) duhet të lëshojnë vendin

Për të penguar që “emigrantët me diploma universiteti të përfundojnë si taksistë”, Qeveria e Danimarkës planifikon të ashpërsojë kriteret për programin e Kartës së Gjelbër (Greencard-Programm). Sot, ministrat kompetentë kanë prezantuar planet e tyre në këtë drejtim.

Mes tjerash këto plane parashohin që personat nga vendet e treta që kanë fituar “Greencard”-ën dhe që pas dy vite qëndrimi në Danimarkë nuk kanë gjetur punë me pagë vjetore që kalon 315 mijë korona (51400 franga) duhet të lëshojnë vendin. Me këtë rregullim të ri dëshirohet të parandalohet që emigrantët me kualifikime të larta të kryejnë punë që paguhen pak.

“Në rregulloren me Greencard deri më tash ka pasur fare pak persona me fat” ka thënë ministrja e punës, Mette Fredriksen. “Ka një numër prej tyre që kanë fituar shansin për të gjetur një punë në Danimarkë për të cilën janë të kualifikuar. Por të tjerët përfundojnë në punën në të zezë ose gjejnë punë të cilat mund t`i kryejnë edhe danezët”, transmetojnë agjencitë dpa dhe sda.

Gjatë vitit 2012 Danimarka ka dhënë gjithsej 1220 Greencard-a, shumicën prej të cilave i kanë fituar njerëzit nga Pakistani, Irani, India, Kina dhe Bangladeshi. Sipas një studimi, gjatë po atij viti shtatë nga dhjetë fituesit e greencard-ës kanë qenë të papunë ose kanë punuar si punëtorë të pakualifikuar.