Përditësimi i fundit i rezultateve preliminare të Komisionit Qendror të Zgjedhjeve (KQZ) nga verifikimi i votave të subjekteve politike, sërish e ka ndryshuar ndarjen e ulëseve mes tyre në Kuvendin e Kosovës, përcjell albinfo.ch.

Bazuar në rezultatet nga verifikimi i 96.05 për qind të vendvotimeve Lëvizja Vetëvendosje ka siguruar 40.90 për qind, PDK-ja në 22.29 për qind, LDK-ja 17.42 për qind dhe AAK-ja 7.42 për qind.

Me këtë rezultat të verifikimit të votave, del se LVV-ja do të vazhdojë të ketë 47 deputetë, PDK-ja do të ketë 25, një më pak se në përditësimin e fundit të bërë të enjten, LDK-ja një më shumë, që do të thotë se do të ketë 20 deputetë, ndërkaq AAK-ja do të vazhdojë të ketë 8 deputetë.

Kandidati për kryeministër nga koalicioni parazgjedhor i AAK-së me Nismën Socialdemokrate dhe disa parti tjera, Ramush Haradinaj ka reaguar për herë të parë pas deklarimit të partnerit të tij të koalicionitnga Nisma, Fatmir Limaj, i cili nuk ka vënë vija të kuqe për koalicion të mundshëm paszgjedhor me Lëvizjen Vetëvendosje (LVV), përcjell albinfo.ch. 

“E keqja ka emër – Albin Kurti”- ka shkruar Haradinaj shkurt në Facebook më 21.02.2025, i cili ndryshe prej Limajt deri më tani ka mbajtur qëndrimin që nuk bën assesi koalicion më LVV-në.

Sekretari i përgjithshëm i NATO-s, Mark Rutte, tha se stabiliteti në Kosovë, Bosnje e Hercegovinë dhe në Serbi, është në interes të të gjithëve dhe nuk sheh arsye të besojë që mund të ketë ndonjë ndryshim dramatik sa i përket përkushtimit amerikan në aleancën ushtarake perëndimore, përcjell albinfo.ch.

Ai këto komente i bëri gjatë qëndrimit në Bratisllavë të Sllovakisë, kur u pyet në një debat me student se a e sheh mundësinë e rifillimit të konfliktit në Kosovë, pasi ka pasur thashetheme se politika e re amerikane mund të çojë deri te largimi i tyre ushtarak.

“Më lejoni të jem krejtësisht i qartë, nga ajo çfarë unë po kuptoj nga sistemi amerikan është se ata janë plotësisht të përkushtuar ndaj NATO-s dhe angazhimeve aktuale. Por, le të shohim se çfarë do të ndodhë. Ne gjithmonë mund të kemi ndryshime të politikave apo adaptime të vogla që mund të ndodhin. Sllovakët, holandezët dhe të tjerët po e bëjnë këtë. Por, nuk kam arsye të besoj se do të ketë vendime dramatike. Dhe në përgjithësi në Ballkanin Perëndimor duhet të jemi të sigurt që ne të mbajmë në fokus këtë rajon sepse stabiliteti në Kosovë, stabiliteti në Bosnje dhe stabiliteti në Serbi është në interesin e të gjithë neve”, u përgjigj Rutte.

Policia e Kosovës ka nisur bastisjen e Qendrave për Punë Sociale të cilat dyshohet se kanë funksionuar sipas sistemit të Serbisë në katër komunat veriore të Kosovës, përcjell albinfo.ch.

Lajmin e ka konfirmuar zëvendës drejtori i Policisë së Kosovës për rajonin e veriut të Mitrovicës, Veton Elshani.

Elshani, theksoi se ky aksion është pjesë e hetimeve që lidhen me arrestimin e katër zyrtarëve të këtyre qendrave, të cilët janë arrestuar më 8 shkurt 2025, një ditë para zgjedhjeve parlamentare.

Sipas tij, ata dyshohet se kanë thirrur qytetarë të ndryshëm dhe nën kërcënimin e tërheqjes së ndihmave sociale, i kanë udhëzuar se si të votojnë në favor të një partie të caktuar politike.

“Më 08 shkurt 2025 një dite para zgjedhjeve Parlamentare në Kosovë, kishim arrestuar 4 persona (zyrtar të Qendrës për Pune Sociale në Zubin Potok) në lidhje me veprën ‘Cenim i përcaktuesve të votuesve’.

Në fakt këta zyrtar të qendrës për punë sociale e cila ishte në strukturë paralele/ilegale dyshohej se kanë thirr qytetarë të ndryshëm në telefon dhe nën formën e kërcënimit i kanë detyruar apo udhëzuar se si të votojnë duke i kushtëzu ndihmat sociale me votën e tyre në favor të një partie të caktuar politike e cila ishte në garë për zgjedhjet parlamentare në Kosovë”, ka thënë Elshani për telegraf.

E sipas tij, lidhur me punën e tyre hetimore e kanë njoftuar Prokurorinë Themelore në Mitrovicë nga të cilët kanë kërkuar që të ju lejohet kontrolli i këtyre qendrave me qëllim të zbulimit të provave me të cilat do të vërtetohet saktë mënyra e veprimit të këtij aktiviteti të kundërligjshëm e që cilësohet si falsifikim i dokumenteve.

“Prokuroria Themelore në Mitrovice e ka aprovu kërkesën tonë dhe e ka dërgu kërkesën e vet për urdhër të kontrollit në Gjykatë gjë të cilën edhe e ka marrë dhe tani jemi në kontroll të këtyre qendrave me urdhër te Gjykatës. Pas kontrollit të këtyre vendeve ne do të njoftojmë prokurorin me të gjeturat e cila mandej do të vendos për hapat e mëtejmë. Deri më tani dy qendra janë mbyllur, e dy janë në proces”, ka thënë Elshani.

KFOR-i ka mohuar raportimet për një tërheqje të mundshme të trupave amerikane nga Kosova. Në anën tjetër NATO ka thënë se Shtetet e Bashkuara mbeten të angazhuara plotësisht në Aleancë me një rol kyç në misionin paqeruajtës në Kosovë. Njohësit e sigurisë vlerësojnë se për shkak të interesit strategjik, SHBA-ja do ta ketë të pamundur tërheqjen e ushtarëve të saj. Ndërkohë, institucioneve iu bëhet thirrje për angazhim më të madh në thellimin e bashkëpunimit me administratën Trump.

Në këtë kohë kur po raportohet në mediat vendore dhe ato ndërkombëtare për mundësin e tërheqjen së ushtarëve Amerikan të KFOR-it nga Kosova, NATO përmes një ushtrimi në kampin Bonstel gjatë ditës ka treguar se KFOR-i është i bashkuar për ruajtjen e paqes dhe sigurisë në Kosovë.

“KFOR të udhëhequr nga #NATO, u bashkuan për një marshim në kampin Bondsteel, Kosovë. Trajnimi së bashku i mundëson KFOR-it të jetë më i fortë së bashku, duke punuar për të siguruar një mjedis të sigurt për të gjitha komunitetet në Kosovë”.

Raportimet për tërheqjen e trupave ushtarake amerikane nga Kosova, i ka hedhur poshtë edhe KFOR-i.

“Zyrtarët amerikanë e kanë bërë të qartë angazhimin e tyre ndaj Aleancës, përfshirë praninë e SHBA-së në Evropë dhe se parandalimi dhe mbrojtja e NATO-s duhet të mbeten të fuqishme”.

Raportimet për tërheqjen e ushtarëve Amerikan të KFOR-it nga Kosovë u shtuan pas një shkrimi në gazetën gjermane “BILD” ku u tha se ekziston mundësia e tërheqjes së trupave amerikane nga KFOR-i. Për më tepër, Italia thuhet se po përgatitet për këtë skenar, duke qenë se është vendi me më së shumti trupa ushtarakë në Kosovë. Por, as presidenti Trump e as zyrtarët e tij nuk e kanë thënë një gjë të tillë. Presidenti Trump përmes një reagimi ka lënë të kuptohet se nëse arrihet një marrëveshje paqeje mes Rusisë dhe Ukrainës, numri i ushtarëve Amerikan në Evropë mund të reduktohet.

Gjenerali në pension, Kadri Kastari, vlerëson se Ballkani Perëndimor sidomos Kosova vazhdon të jetë prioritet strategjik për SHBA-të. Sipas tij, nuk mund të flitet tani për tërheqjen e ushtarëve amerikan nga Kosova.

“Kjo është vetëm një supozim se do të hiqen trupat Amerikane sepse presidenti apo administrata Trump nuk ka thënë se nuk do ti largoj të gjitha trupat, por do ta reduktoj numrin e forcave Amerikane në Evropë. Duke pasur parasysh që Ballkani Perëndomor është në vijë me interesat gjeopolitike të SHBA-së dhe qëllimi i tyre është që Rusia të mos dominoj në këtë pjesë të Evropës, kështu që Bonsteel dhe Kosova do të jenë edhe më tutje interes i SHBA-së dhe nuk do ti tërheqin trupat nga Kosova”, tha Kastrati për rtv21.

Drejtori i Institutit të Kosovë për Siguri dhe Marrëdhënie Ndërkombëtare, Florim Rullani, vlerëson se raportimet në mediat ndërkombëtare për tërheqjen e ushtarëve amerikanë nga Kosova janë një sinjal për Qeverinë e Kosovës.

“Në realitet ne e pamë në gazetën “BILD” sigurisht është mesazh diplomatik përvec atij të sigurisë. Në aspektin e diplomatik është qortimi i thellë ndaj politikës së jashtme të Kosovës. Ndërsa, në aspektin e sigurisë nuk ka ndikim të madh sepse siguria dhe stabiliteti i Kosovës nga Këshilli i Sigurimit me rezolutën 1244 e cila është në fuqi”, tha Rullani për rtv21.

Gjeneral Kastrati dhe njohësi i sigurisë dhe marrëdhënieve ndërkombëtare Florim Rullani presin nga Qeveria e re që të ketë qasje më bashkëpunuese me administratën Trump.

“Çka duhet të bëjë tash Qeveria në ardhje është se duhet ta ngrisin komunikimin në nivel më të lartë me SHBA-të duke e ngritur edhe bashkëpunimin. Unë mendoj se shumë më mençur kishte me qenë që 500 mijë euro që i kanë dhënë për një shtet sic është Palestina e cila nuk na ka njohur është që do t’ia kishin dhënë pjesës lobuese në SHBA dhe ta ngrisim bashkëpunimin me administratët Trump. Qeveria e ardhshme duhet ta ketë prioritet numër një bashkëpunimin me SHBA-në”, tha Kastrati.

“Politika e jashtme e Kosovës duhet të ketë një reflektim më substancial sepse politika e jashmte matet me rezultate konkrete. Në Qeverinë e kaluar ka pasur shumë udhëtime në SHBA por kjo demanton gjithë atë rezultat të paraqitur jo real në publikun e Kosovës”, tha Rullani.

Në një analizë të gazetës “Financial Times” thuhet se presidenti i Rusisë Putin dëshiron që trupat e NATO-s të tërhiqen nga ish-perandoria sovjetike. Zyrtarët evropianë besojnë se ka gjasa që Trumpi do të pajtohet për tërheqjen e trupave amerikane nga Baltiku dhe ndoshta edhe më në perëndim. Ndërsa, sipas të dhënave të gazetës gjermane “Bild”, bazat që tani për tani nuk janë në diskutim për tërheqjen e ushtarëve të KFOR-it Amerikan janë ajo e “Ramstein” të Gjermanisë dhe bazat e forcave ajrore në Britani

Kryetari i Nismës Socialdemokrate, Fatmir Limaj, ka folur për mundësinë e hyrjes në koalicion me Lëvizjen Vetëvendosje dhe partitë e tjera pas zgjedhjeve, përcjell albinfo.ch.

Limaj potencoi se Nisma dhe AAK-ja janë dy parti të ndara dhe se bashkëpunimi i tyre nuk është i domosdoshëm në çdo vendim politik.

“Duhet ta kuptojmë se ne jemi dy parti politike. Nuk e kemi të domosdoshme të votojmë njëjtë për çështje të ndryshme,” tha ai në Rtv Dukagjini.

I pyetur nëse ka pasur kontakte për ndonjë koalicion të mundshëm, Limaj tha se ende nuk ka pasur lëvizje konkrete nga partitë e mëdha.

“Ne jemi të vegjël, kanë punë njëherë të mëdhenjtë për koalicione,” deklaroi ai, duke kujtuar se edhe ish-presidenti Ibrahim Rugova, me 46% të votave, kishte negociuar për bashkëpunime.

Ai shtoi se tashmë fushata ka përfunduar dhe partitë duhet të ulen në tavolinë për të diskutuar të ardhmen politike të vendit.