Shërbimi Kombëtar Shëndetësor i Britanisë (NHS) ka bërë të ditur se skanimet revolucionare 3D të zemrës, të drejtuara nga inteligjenca artificiale, pakësojnë nevojën për teste invazive dhe tashmë kanë kursyer miliona funte.

“Tani e zbatuara në 56 spitale të NHS-së në Angli, teknologjia e zgjuar u mundëson mjekëve të diagnostikojnë dhe trajtojnë pacientët me sëmundje të dyshuara të zemrës shumë më shpejt duke e shndërruar një skanim CT (tomografi kompjuterike) të zemrës së tyre në një imazh 3D të personalizuar, i cili më pas analizohet duke përdorur inteligjencën artificiale”, tha NHS.

NHS tha se mjeti ndihmon t’u japë dhjetëra mijëra pacientëve në rrezik të sëmundjes koronare të zemrës, potencialisht kërcënuese për jetën, një diagnozë më të shpejtë dhe më të saktë dhe gjithashtu liron kapacitetin në sistemin shëndetësor të vendit, shkruan ATSH, transmeton albinfo.ch.

Një nga pacientët që ka përfituar nga teknologjia tha se ajo nuk ishte një rast klasik i sëmundjes koronare të zemrës, por kjo teknologji i mundësoi identifikimin e shpejtë të shkakut të simptomave, gjë që potencialisht ishte shpëtimtare.

Sipas studimit të ri në lidhje me përdorimin e teknologjisë, të botuar në ‘Nature Medicine’, kjo metodë e inteligjencës artificiale uli numrin e pacientëve që kishin nevojë për teste invazive të angiografisë me një të gjashtën apo 16 për qind në rastet kur më vonë u zbulua se nuk kërkohej trajtim i mëtejshëm dhe me 7 për qind në përgjithësi.

“Numri i testeve të dyta të zemrës që pacientët kishin nevojë brenda një periudhe 2-vjeçare gjithashtu është ulur me 12 për qind”, tha studimi.

Të dhënat e fundit nga NHS-ja tregojnë se më shumë se 24 mijë pacientë deri më tani kanë përfituar që kur teknologjia u lëshua në spitalet e NHS-së në vitin 2021.

NHS njoftoi se gjatë vitit 2024 gjithsej 6.898 pacientë kishin qasje në analizën e drejtuar nga inteligjenca artificiale, e quajtur ‘Heartflow’.

Vin Diwakar, drejtori kombëtar i transformimit të NHS-së në Angli, tha se teknologjia e re përdor analizën e specializuar të skanimit CT të zemrës për të krijuar një model 3D të personalizuar të arterieve koronare të pacientit dhe për të vlerësuar shkallën dhe vendndodhjen e bllokimeve, të cilat interpretohen nga një kardiolog.

“Këto rezultate tregojnë se kjo teknologji redukton nevojën për teste në mënyrë që pacientët t’i nënshtrohen vetëm trajtimeve të nevojshme, duke demonstruar se si teknologjia e inteligjencës artificiale mund të përmirësojë kujdesin, si dhe të rrisë efikasitetin në NHS”, tha Timothy Fairbairn, klinicist udhëheqës në studim, i cili gjithashtu është kardiolog konsulent në Spitalin e Zemrës dhe Kraharorit në Liverpool.

Një shëtitje është një nga mënyrat më të mira për të njohur një qytet – për të zbuluar atraksione, për të përjetuar atmosferën lokale dhe për të shijuar ritmin e jetës urbane. Një studim i ri, i publikuar nga “Daily Mail” dhe realizuar nga platforma Compare the Market, ka zbuluar qytetet më të përshtatshme dhe më pak të përshtatshme në botë për këmbësorët.

Munihu, qyteti më mikpritës për këmbësorët

Në krye të listës ndodhet Munihu në Gjermani, i cilësuar si qyteti më i mirë për të ecur në këmbë. Sipas studimit, 86% e popullsisë jeton brenda një kilometri nga një zonë pa makina, ndërsa 85% kanë akses të shpejtë në shërbime shëndetësore dhe arsimore. Qyteti bavarez ofron gjithashtu një përvojë të shkëlqyer për turistët, pasi shumë prej atraksioneve të tij ndodhen në distanca të arritshme në këmbë, shkruan TCH, transmeton albinfo.ch.

Milano dhe Varshava ndjekin

Në vend të dytë renditet Milano në Itali – i njohur për modën, kulturën dhe kafenë e mirë – me 80% të popullsisë që jeton pranë shërbimeve themelore, si shëndetësia dhe arsimi. Po ashtu, qyteti ka një rrjet të gjerë korsish biçikletash dhe zonash të përshtatshme për ecje.

Varshava, kryeqyteti i Polonisë, zë vendin e tretë. Përmasat kompakte të qytetit dhe prania e zonave pa makina, si Parku i njohur Łazienki, e bëjnë atë ideal për këmbësorët.

Top 5 plotësohet nga Helsinki dhe Parisi

Në vendin e katërt renditet Helsinki, ku 85% e popullsisë jeton pranë zonave pa makina. Parisi, një nga qytetet më të vizituara në botë, renditet i pesti, me të njëjtin përqindje popullsie që ka qasje të lehtë në shërbime bazë.

Patra, ndër qytetet më të këqija në botë për këmbësorët

Ndërsa disa qytete shkëlqejnë për infrastrukturën miqësore ndaj këmbësorëve, të tjera lënë për të dëshiruar. Në fund të listës ndodhet Johanesburgu në Afrikën e Jugut, i ndjekur nga një emër surprizues: Patra, qyteti i tretë më i madh në Greqi.

Sipas studimit, Patra është qyteti i dytë më pak i arritshëm për këmbësorët në botë, për shkak të mungesës së infrastrukturës së përshtatshme, si rrugët ose shtigjet për këmbësorët. “Ashtu si në Kajro, mungojnë rrugë të dizajnuara posaçërisht për ecje në zonat jashtë qendrës”, thekson raporti.

Në vijim të listës së qyteteve më të pafavorshme për këmbësorët renditen dy qytete nga Teksasi, SHBA: Dallas dhe Hjuston, ndërsa Manila, kryeqyteti i Filipineve, mbyll pesëshe më të keqe.

Ky studim nënvizon rëndësinë e infrastrukturës urbane për mirëqenien dhe jetesën aktive të qytetarëve, si dhe ofron një udhëzues të vlefshëm për turistët që dëshirojnë të zbulojnë qytetet nëpërmjet ecjes.

Punonjësit e zyrës po i drejtohen inteligjencës artificiale kur nuk duan të pyesin kolegët e tyre, sipas raportit të ri të Microsoft.

Kompania anketoi 31,000 punonjës në 31 shtete për të pyetur se si po përshtaten me inteligjencën artificiale në punë. Ndërsa më shumë njerëz po i drejtohen teknologjisë për aftësitë e saj unike, shumë prej tyre po e përdorin për të shmangur ndërveprimin njerëzor.

Shtatëmbëdhjetë përqind e të anketuarve thanë se përdorin inteligjencën artificiale nga frika e gjykimit dhe ngaqë kërkojnë komunikim më privat. Një tjetër 16% raportoi se e përdorin atë për të shmangur tensionet e punës me një koleg. Pesëmbëdhjetë përqind përmendën kërkesat e kolegëve si një arsye për t’iu drejtuar teknologjisë, pasi kërkon më pak “mbështetje”. Dhe 8% thanë se përdorin inteligjencën artificiale në mënyrë që të marrin të gjitha meritat për punën dhe të shmangin citimin e një kolegu, shkruan Scan, transmeton albinfo.ch.

Përgjigje të tjera më të njohura për përdorimin përfshinin 42% që e vlerësojnë inovacionin meqë është i disponueshëm 24/7, 30% që thonë se kryen detyra më shpejt se njerëzit dhe 28% që e pëlqejnë “rrjedhën e pafundme të ideve sipas kërkesës”.

Raporti vjen ndërsa Microsoft njoftoi një zgjerim të madh të mjeteve të inteligjencës artificiale. Lançimi pranveror i 365 Copilot Wave 2 ka të bëjë me “agjentë” të projektuar për të funksionuar si kolegë digjitalë, që mund të kryejnë detyra komplekse në vendin e punës përmes arsyetimit të thellë.

Microsoft ka thënë se dëshiron që teknologjia të shërbejë më shumë se thjesht si një mjet dhe të bëhet një bashkëpunëtor integral në punën e përditshme.

“Po shfaqet një plan i ri organizativ, që përzien inteligjencën e makinerive me gjykimin njerëzor, duke ndërtuar sisteme që operohen nga IA, por të udhëhequra nga njeriu. Ashtu si Revolucioni Industrial apo epoka e internetit, këtij transformimi do t’i duhen dekada për të arritur premtimin e tij të plotë dhe për të përfshirë ndryshime të gjera teknologjike, shoqërore dhe ekonomike,” thuhet në raport.