Archives

Zgjedhjet në Shqipëri: Ka nisur dërgimi i fletëve të votimit në Diasporë

Posted on by Drin Reçica

Tashmë dihet se për herë të parë në zgjedhjet e 11 majit, shqiptarët me banim jashtë vendit do të mund të votojnë përmes postës për zgjedhjet parlamentare, përcjell albinfo.ch.

Komisioni Qendror i Zgjedhjeve ka nisur përgatitjen e 245,808 zarfeve me fletët e votimit, të cilat do të nisen drejt votuesve shqiptarë në diasporë në 85 shtete të botës.

Procesi i dërgimit të zarfeve ka nisur dhe do të vazhdojë deri më 17 prill, me qëllim që të sigurohet mbërritja në kohë e materialeve zgjedhore te votuesit e regjistruar jashtë vendit.

Përpunimi dhe paketimi i materialeve zgjedhore po realizohet në Parkun Olimpik në Tiranë, ku administrata e KQZ-së është organizuar në grupe pune që po ndjekin me përpikmëri çdo hap të procesit.

Fillimisht bëhet verifikimi i fletëve të votimit, dhe më pas ato vulosen nga KQZ-ja për t’u dhënë fuqinë juridike. Më pas, çdo fletë vendoset në një zarf të posaçëm, së bashku me materialet shoqëruese, dhe dorëzohet te kompania postare që do ta dërgojë në adresën e qytetarëve të regjistruar.

Zarfeve u është kushtuar rëndësi maksimale në aspektin e sigurisë dhe korrektësisë, ndërsa shpërndarja po bëhet në përputhje me qarqet zgjedhore, sipas regjistrimit të votuesve nga diaspora.

Komisioni Qendror i Zgjedhjeve ka mundësuar ndjekjen live të të gjithë procesit të përgatitjes dhe paketimit të fletëve të votimit përmes kanalit zyrtar të KQZ-së në Facebook, duke rritur transparencën dhe besueshmërinë e këtij procesi historik.

Ky është një hap i rëndësishëm drejt përfshirjes së diasporës në jetën demokratike të vendit, duke u dhënë mundësi mijëra qytetarëve shqiptarë që jetojnë jashtë të ushtrojnë të drejtën e tyre kushtetuese të votës.

Shaqiri me fanellën e Baselit ëndërron të luajë në Ligën e Kampionëve

Posted on by Drin Reçica

Nisur nga një kujtim i shkurtër i 14 prillit të vitit 2021, Xherdan Shaqiri ka luajtur për herë të fundit në Ligën e Kampionëve në atë datë. Në ndeshjen e dytë çerekfinale kundër Real Madridit (0:0), si lojtar i Liverpool-it, u aktivizua në minutën e 82-të, përcjell albinfo.ch.

Vlen të theksohet se në total, ish-futbollisti i Zvicrës ka luajtur 36 ndeshje në Ligën e Kampionëve, duke shënuar tre gola dhe dhënë shtatë asistime. Dhe ndoshta do të ketë më shumë ndeshje, gola e asistime.

Futbollisti shqiptar ka fituar dy herë trofeun e Ligës së Kampionëve. Titullin e parë e fitoi me Bayernin në vitin 2013. Me gjigantin gjerman fitoi gjithashtu Superkupën e Evropës dhe Kupën e Botës për Klube. Po të njëjtat trofe i fitoi edhe me Liverpool-in në vitin 2019. Me të dy ekipet, Bayernin dhe Liverpool-in, ka fituar edhe titullin e kampionit në kampionatet respektive.

Shaqiri e ka fituar Bundesligën tri herë: në vitet 2013, 2014 dhe 2015, ndërsa Premier Leaguen e fitoi në sezonin 2019/2020.

Trofetë nuk mungojnë as me Baselin. Gjatë viteve të para të karrierës me këtë skuadër, ai fitoi titullin në vitet 2010, 2011 dhe 2012, si dhe dy Kupa të Zvicrës.

33-vjeçari po luan sërish për Baselin – skuadrën ku e nisi karrierën e tij – dhe po dëshmon se ende është në formë. Këtë sezon ai ka luajtur 27 ndeshje në Superligën e Zvicrës, duke shënuar 11 gola dhe dhënë 14 asistime. Pjesërisht falë kontributit të Shaqirit, Baseli është në krye të tabelës pas 31 xhirove, me një epërsi prej katër pikësh ndaj Servette-s dhe pesë pikë më shumë se Young Boys.

“Kemi ende disa pengesa për të kaluar”, ka thënë Shaqiri, i cili nuk dëshiron ende të flasë për titullin. Megjithatë, ëndrrat gjithmonë lejohen – dhe këtë e pohon edhe “Messi i Alpeve”. “Të gjithë ne ëndërrojmë për netët e Ligës së Kampionëve sërish. Dhe po japim gjithçka për ta arritur këtë synim”, ka deklaruar ai për “Blue Sport”.

Pengesa e radhës e Baselit në rrugën drejt titullit është Zurichu. Klasikja e Zvicrës do të zhvillohet në stadiumin “Letzigrund” të shtunën mbrëma.

Konsullata e Kosovës në Mynih mirëpriti Vjosën si akademikja më e re në Gjermani

Posted on by Drin Reçica

Në ambientet e Konsullatës së Përgjithshme të Republikës së Kosovës në Mynih, Konsulli i Përgjithshëm, Afrim Nura, mirëpriti Dr. Vjosa Blakaj, e cila më 26 mars 2025 u promovua me sukses si Doktore e Shkencave të Matematikës në Universitetin Teknik të Mynihut (TUM), transmeton albinfo.ch.

Siç ka raportuar albinfo.ch disa ditë më parë, Blakaj ka ndjekur një rrugë të shkëlqyer akademike që nga studimet bachelor në Universitetin e Prishtinës, deri te studimet master dhe doktoratë në Mynih, duke arritur një sukses të jashtëzakonshëm në një fushë tejet sfiduese, me fokus në teorinë e informacionit kuantik dhe fizikën matematike. Kjo ishte edhe tema e disertacionit të saj: “Transcendental Tools in Quantum Information Theory”.

“Ky sukses është jo vetëm një arritje personale, por edhe një kontribut i çmuar në promovimin e imazhit të Kosovës në botë. Urime të përzemërta Dr. Vjosa Blakaj – shembull frymëzimi për të gjithë të rinjtë shqiptarë në Kosovë dhe diasporë”, tha konsulli Afrim Nura.

Bern: U dëgjuan thirrje kundër Kosovës, UEFA gjobit Zvezdën

Posted on by Drin Reçica

Bëhet e ditur se Trupi i Kontrollit, Etikës dhe Disiplinës i UEFA-s e ka dënuar me 54 mijë e 250 euro klubin Cërvena Zvezda, për shkak të shkeljeve të shumta nga tifozët serbë në ndeshjen e fundit të fazës së grupeve në Ligën e Kampionëve kundër Young Boys-it, e luajtur në Bernë, përcjell albinfo.ch.

Vlen të theksohet se këtë ndeshje e fitoi klubi zviceran Young Boys me rezultatin 1:0, ndërsa në stadium është parë edhe flamuri i Serbisë mbi hartën e Kosovës – një simbol që UEFA e konsideron të papranueshëm. Po ashtu, janë dëgjuar thirrje në kor “Serbia, Kosovo” në tribunën ku ishin të vendosur ultrasit e Cërvena Zvezdës, të ashtuquajturit “Delije”.

Për sjellje raciste të tifozëve, UEFA ka ndarë një gjobë prej 20 mijë euro ndaj Cërvena Zvezdës dhe i ka ndaluar klubit serb të shesë bileta për tifozët e tij në ndeshjen e parë në udhëtim në garat e UEFA-s. Gjithashtu, me 6.750 euro është dënuar për ndezjen e fishekzjarrëve, ndërsa me 27 mijë e 500 euro për shfaqjen e një mesazhi të papërshtatshëm për një ngjarje sportive.

Për thirrjet kundër Kosovës dhe incidentet e tjera në stadiume, UEFA ka gjobitur vazhdimisht Federatën e Futbollit të Serbisë dhe klubet serbe.

Franca sinjalizon njohjen e shtetit palestinez brenda pak muajsh

Posted on by Alb

Presidenti i Francës, Emmanuel Macron, ka deklaruar se Parisi mund të njohë zyrtarisht shtetin e Palestinës në muajt e ardhshëm, një vendim që pritet të konkretizohet gjatë një konference të Kombeve të Bashkuara në qershor.

Gjatë një interviste për televizionin France 5, Macron u shpreh se Franca po ecën drejt njohjes së Palestinës si shtet sovran, duke theksuar se kjo nismë është pjesë e një përpjekjeje ndërkombëtare për të avancuar zgjidhjen e konfliktit izraelito-palestinez.

“Ne duhet të shkojmë drejt njohjes dhe do ta bëjmë këtë në muajt e ardhshëm,” deklaroi Macron.

Ai bëri të ditur se synon të bashkëorganizojë konferencën në Nju Jork së bashku me Arabinë Saudite, ku njohja e shtetit palestinez do të jetë një nga temat kryesore të diskutimit. Presidenti francez nënvizoi se ky hap nuk është vetëm një veprim i drejtë nga pikëpamja politike dhe morale, por edhe pjesë e një qasjeje të koordinuar me partnerët ndërkombëtarë që mbështesin të drejtat e popullit palestinez.

“Kjo do të na lejojë të jemi të qartë në luftën kundër atyre që mohojnë të drejtën e Izraelit për të ekzistuar, siç është rasti me Iranin,” shtoi Macron, duke theksuar se Franca do të vijojë të angazhohet për sigurinë kolektive në rajon, përcjell albinfo.ch.

Franca ka mbështetur tradicionalisht zgjidhjen me dy shtete dhe ka ruajtur këtë qëndrim edhe pas ngjarjeve të 7 tetorit 2023, kur Hamasi ndërmori një sulm të rëndë ndaj Izraelit.

Nëse realizohet, njohja zyrtare e Palestinës nga Franca do të përbënte një kthesë të rëndësishme në diplomacinë franceze dhe do të kishte pasoja të ndjeshme në arenën ndërkombëtare, duke shkaktuar gjithashtu reagime të ashpra nga Izraeli, i cili kundërshton çdo hap të tillë, duke e cilësuar si të parakohshëm dhe të njëanshëm.

OBSH bën thirrje për veprim të menjëhershëm kundër shpërthimit global të fruthit

Posted on by Alb

Organizata Botërore e Shëndetësisë ka ngritur alarmin për përhapjen e fruthit në 58 shtete të botës, përfshirë edhe Shtetet e Bashkuara, ku dy fëmijë kanë humbur jetën si pasojë e virusit.

Në një deklaratë zyrtare nga selia e saj në Gjenevë, OBSH theksoi rëndësinë jetike të vaksinimit, duke e përshkruar vaksinën kundër fruthit si “jashtëzakonisht të sigurt dhe efektive”. Agjencia u bëri thirrje vendeve anëtare të intensifikojnë përpjekjet për të ndaluar përhapjen e mëtejshme të sëmundjes, përcjell albinfo.ch.

Kate O’Brien, drejtoreshë e departamentit të vaksinimit në OBSH, e cilësoi fruthin si një nga viruset më ngjitëse në botë, duke bërë apel për vaksinim masiv si mënyrën më të mirë për të frenuar shpërthimet. Ajo shmangu komentet ndaj kritikave të presidentit amerikan Donald Trump dhe sekretarit amerikan të Shëndetësisë, Robert Kennedy Jr., i cili njihet për qëndrimet e tij skeptike ndaj vaksinave.

Kennedy është vënë në qendër të kritikave për menaxhimin e dobët të situatës, sidomos në Teksas, ku janë shënuar qindra raste me fruth dhe ku shpërthimi vazhdon të përhapet me ritme alarmante.

O’Brien shtoi se, ndonëse SHBA-të po punojnë për të kontrolluar situatën, përpjekjet aktuale nuk janë të mjaftueshme. Ajo theksoi gjithashtu se rënia e nivelit të vaksinimit – pjesërisht si pasojë e pengesave të krijuara nga pandemia e COVID-19 – ka ndikuar ndjeshëm në rikthimin e fruthit.

“Vaksina kundër fruthit është një nga vaksinat më të sigurta dhe më efektive që kemi,” theksoi O’Brien, duke apeluar për ndërgjegjësim dhe veprim të shpejtë si nga institucionet ashtu edhe nga individët, për të ndaluar përhapjen e kësaj sëmundjeje potencialisht vdekjeprurëse.

 

Çfarë moti do të mbajë në Zvicër gjatë Pashkëve?

Posted on by Alb

Me shumë diell dhe temperatura të buta, Zvicra po shfaq anën e saj pranverore – por duke filluar nga e diela, parashikohen reshje shiu. Edhe gjatë Pashkëve, moti pritet të jetë i ndryshueshëm.

Deri të shtunën: mot i mrekullueshëm

E enjtja dhe e premtja do të sjellin shumë diell në mbarë Zvicrën. Temperaturat do të variojnë nga 16 deri në 21 gradë Celsius. Veçanërisht në Valais, termometri mund të arrijë deri në 21 gradë.

E shtuna: pluhur saharian dhe temperatura të larta

Të shtunën pritet të mbërrijë pluhuri saharian, ndërsa mbi Zvicër do të shfaqen re të lehta. Temperaturat do të ngjiten deri në 24 gradë në disa rajone.

Nga e diela: mot i paqëndrueshëm me reshje

Të dielën moti do të ndryshojë ndjeshëm. Një sistem presioni të ulët do të zëvendësojë stabilitetin aktual, duke sjellë më shumë re dhe reshje lokale. Veçanërisht në jug të Zvicrës, parashikohen reshje më të shumta, ndërsa në rajonet e tjera pritet mot i alternuar mes reshjeve dhe intervaleve të thata me diell.

Parashikimi për Pashkë

Gjatë Pashkëve parashikohet mot i paqëndrueshëm me reshje të herëpashershme. Megjithatë, nuk pritet shi i vazhdueshëm – do të ketë periudha të thata dhe momente me diell, ideale për një gjueti vezësh në natyrë. Temperaturat do të bien në 15 deri në 18 gradë të hënën e Pashkëve.

Raporti që nxjerr në pah gjendjen alarmante në burgjet e Maqedonisë së Veriut

Posted on by Alb

Kushtet në institucionet ndëshkuese-korrektuese në Maqedoninë e Veriut vazhdojnë të jenë të mjerueshme, thuhet në raportin e fundit të Entit Shtetëror të Revizionit (ESHR). Mbingarkesa nëpër qeli, mungesa e kushteve higjienike, lagështira, mungesa e stafit mjekësor dhe investimet e pamjaftueshme në infrastrukturë janë disa prej çështjeve më të theksuara që ngre raporti.

Situata më alarmante vërehet në Burgun e Idrizovës – institucioni më i madh ndëshkues në vend – ku mbipopullimi dhe gjendja e rënduar e objekteve përbëjnë problemin kryesor. Megjithatë, gjendja nuk është më e mirë as në burgjet e tjera të vendit, përcjell albinfo.ch.

“Reparti i pranimit dhe ambulanca në Idrizovë janë në kushte më se të papranueshme: qeli me vrima, mure të ndotura dhe të dëmtuara, mbeturina dhe dyshekë të papastër,” thekson raporti. Ndërkohë, në Burgun e Shkupit, të paraburgosurit detyrohen të konsumojnë ushqim dhe të kryejnë nevojat elementare fiziologjike në të njëjtat hapësira. Në Burgun e Kumanovës, problemi kryesor lidhet me mungesën e ujit të pijshëm – një e drejtë themelore për çdo individ.

Përveç kushteve të rënda fizike, sistemi përballet edhe me mungesë të theksuar të stafit mjekësor dhe të policisë së burgjeve.

“Nuk ka kujdes të plotë shëndetësor për personat e privuar nga liria për shkak të mungesës së personelit mjekësor. Numri i pamjaftueshëm i oficerëve të policisë ka çuar në rritjen e kostove për orët shtesë, ndërsa paditë e paraqitura nga vetë punonjësit për punë jashtë orarit dhe për kompensime të tjera kanë shkaktuar rritje të konsiderueshme të shpenzimeve gjyqësore,” thekson Enti.

Financat e pamjaftueshme dhe mungesa e veprimeve konkrete nga institucionet përkatëse kanë penguar përmirësimin e situatës. Në përfundimet e raportit, theksohet se masat aktuale nuk janë të mjaftueshme për të adresuar problemet sistemike. Për këtë qëllim, ESHR ka propozuar një paketë prej 26 masash, të cilat kërkojnë zbatim urgjent, kryesisht nga ana e Drejtorisë për Ekzekutimin e Sanksioneve.

Tarifa e Trump ndaj Kinës është 145%

Posted on by Alb

Norma e tarifës së SHBA-së për importet kineze tani arrin në 145 për qind, duke pasqyruar intensifikimin e tensioneve tregtare mes dy ekonomive më të mëdha në botë.

Ky informacion është konfirmuar nga një zyrtar i Shtëpisë së Bardhë për CNBC, i cili theksoi se ky nivel i tarifave përbën një masë të re për të mbrojtur interesat ekonomike të SHBA-së dhe për të adresuar praktikat që administrata amerikane i konsideron të padrejta dhe të dëmshme për industrinë amerikane.

Në kuadër të kësaj strategjie, dekreti i fundit ekzekutiv i presidentit amerikan, Donald Trump, ka rritur tarifat ndaj produkteve kineze nga 84 në 125 për qind, përcjell albinfo.ch.

Kjo tarifë e re prej 125 për qind, e shpallur dje nga Trumpi, shtohet mbi një taksë ekzistuese prej 20 për qind që ishte tashmë në fuqi.

 

 

16 mijë nxënës morën pjesë në Olimpiadën e gjuhës shqipe Shqipëri- Kosovë

Posted on by Alb

Për herë të parë, Shqipëria dhe Kosova organizuan një olimpiadë të përbashkët të gjuhës shqipe, ku morën pjesë mbi 16 mijë nxënës të klasave të nënta nga të dy vendet, duke testuar njohuritë e tyre mbi gjuhën dhe letërsinë shqipe.

Ministrja e Arsimit dhe Sportit, Ogerta Manastirliu, dhe ministrja e Arsimit, Shkencës, Teknologjisë dhe Inovacionit të Kosovës, Arbërie Nagavci, vlerësuan 84 nxënësit finalistë të kësaj olimpiade të përbashkët, të cilët u shpallën fitues pas përfundimit të tri fazave të para të konkurrimit.

Ministrja Manastirliu theksoi rëndësinë e këtij eventi, duke u shprehur se ky është një moment i bukur që simbolizon bashkimin e Shqipërisë dhe Kosovës për të festuar gjuhën shqipe, që është thelbi i identitetit kombëtar të shqiptarëve. Ajo shprehu besimin se ky aktivitet do të kthehet në një traditë të bukur, që do të vazhdojë vit pas viti, duke afruar nxënësit dhe duke forcuar lidhjet mes dy vendeve, përcjell albinfo.ch.

“Pas një pune të mundimshme nga të dy ministritë, sot po festojmë përfundimin e një iniciative që ka shpërfaqur angazhimin e nxënësve dhe mësuesve, dhe që do të vazhdojë si një traditë e rëndësishme për brezat që vijnë. Kjo është një mundësi për të ruajtur dhe promovuar gjuhën tonë të bukur shqipe”, tha ministrja Manastirliu.

Në një mesazh të veçantë, ministrja Arbërie Nagavci shprehu kënaqësinë për suksesin e këtij aktiviteti dhe theksoi rëndësinë e bashkëpunimit të thelluar midis dy ministrive për të forcuar mësimdhënien e gjuhës shqipe dhe për të organizuar aktivitete që bashkojnë nxënësit nga Shqipëria dhe Kosova.

“Ky aktivitet ka dy qëllime kryesore: për të forcuar bashkëpunimin mes dy ministrive tona dhe për të lartësuar gjuhën shqipe. Të gjithë ju jeni fitues”, u shpreh ministrja Nagavci.

Në total, 84 nxënës nga Shqipëria dhe Kosova, pas përfundimit të tri fazave të olimpiadës, u shpallën fitues dhe morën certifikata për njohuritë e tyre mbi gjuhën dhe letërsinë shqipe. Ky aktivitet ka pasur një pjesëmarrje masive, me rreth 16 mijë nxënës që u angazhuan në këtë olimpiadë të përbashkët.

Ky bashkëpunim i suksesshëm mes Ministrisë së Arsimit dhe Sportit të Shqipërisë dhe Ministrisë së Arsimit të Kosovës synon të mbrojë dhe promovojë gjuhën, kulturën dhe traditat tona, si dhe të forcojë identitetin kombëtar të shqiptarëve

Zvicra shënon rritje të popullsisë përkundër rënies së imigrimit dhe lindshmërisë

Posted on by Alb

Popullsia e përhershme e Zvicrës ka arritur një nivel të ri rekord, duke kapur shifrën prej 9’048’900 banorësh në vitin 2024, sipas të dhënave të publikuara nga Zyra Federale për Statistikë. Kjo rritje ndodh pavarësisht rënies së ndjeshme në imigrim dhe në normën e lindshmërisë.

Sipas statistikave, norma e lindshmërisë në Zvicër ka rënë në një nivel historikisht të ulët – vetëm 1.28 fëmijë për çdo grua, ndërsa emigrimi është rritur me 1.3%. Ndërkohë, imigrimi ka shënuar një rënie prej 19.1%, krahasuar me vitin paraprak.

Rritja natyrore e popullsisë – diferenca midis lindjeve dhe vdekjeve – ishte minimale, me vetëm 6’200 persona, një shifër kaq e ulët që nuk është parë që nga viti 1918. Megjithatë, jetëgjatësia mesatare vazhdon të rritet: gratë jetojnë mesatarisht deri në 86 vjeç, ndërsa burrat deri në 82.5 vjeç.

Gjatë vitit 2024, në Zvicër u shpërngulën 212’745 persona – një e pesta më pak se vitin e kaluar, me një ulje të ndjeshme të numrit të të huajve që vijnë në vend. Ndërkohë, 125’602 persona u larguan nga vendi, transmeton albinfo.ch.

Sipas llogaritjeve statistikore: 212’745 imigrime + 78’018 lindje – 125’602 emigrime – 71’801 vdekje = 93’360 persona shtesë.

Pas një rregullimi teknik, Zyra për Statistikë hoqi 6’713 persona nga statistikat, duke çuar në një rritje reale të popullsisë prej 86’647 personash, ose 1% më shumë se një vit më parë.

Ky trend tregon se, edhe në kushte të migrimit më të ulët dhe natalitetit në rënie, faktorë si jetëgjatësia dhe imigrimi neto vazhdojnë të luajnë një rol kyç në rritjen e popullsisë.

 

 

Inteligjenca Artificiale rrit ndjeshëm konsumin global të energjisë

Posted on by Alb

Sipas një raporti të fundit të Agjencisë Ndërkombëtare të Energjisë (IEA), konsumi i energjisë nga qendrat e të dhënave, të shtyra nga zhvillimi i Inteligjencës Artificiale (IA), pritet të dyfishohet deri në vitin 2030, duke arritur rreth 945 teravat-orë — pak më shumë se konsumi vjetor i Japonisë.

Aktualisht, këto qendra përbëjnë rreth 1.5% të konsumit global të energjisë, por përqendrimi i tyre në zona të caktuara sjell ndikime serioze lokale: presion mbi rrjetet elektrike, konsum të lartë uji për ftohje dhe sfida të furnizimit me energji, transmeton albinfo.ch.

Konsumi i krahasueshëm me miliona shtëpi

Një qendër e vetme me kapacitet 100 megavat konsumon sa 100,000 familje në vit. Ndërsa qendrat e reja, që po ndërtohen aktualisht, mund të arrijnë deri në konsum sa 2 milionë familje.

Në SHBA, ku ndodhet pjesa më e madhe e këtyre strukturave, gjysma e rritjes së kërkesës për energji deri në vitin 2030 do të vijë nga qendrat e të dhënave. Së bashku me Evropën dhe Kinën, këto tre rajone përbëjnë 85% të konsumit global të energjisë nga qendrat e të dhënave.

Burimet e energjisë dhe ndikimi në mjedis

Për momentin, 30% e energjisë së përdorur nga qendrat e të dhënave vjen nga qymyri, një burim shumë ndotës. Kjo rritje e kërkesës pritet të shtojë ndjeshëm emetimet e CO2, nga 180 milionë ton aktualisht në 300 milionë ton në vitin 2035.

Megjithatë, AIE parashikon se rreth gjysma e kësaj kërkese shtesë do të përmbushet nga energji të rinovueshme, e ndjekur nga gazi natyror dhe qymyri, ndërsa energjia bërthamore do të zërë më shumë hapësirë pas vitit 2030.

Zgjidhja? Modele më të vogla të IA dhe më shumë energji e gjelbër

Raporti thekson rëndësinë e përshpejtimit të instalimit të burimeve të energjisë së pastër si era dhe dielli, të kombinuara me sisteme magazinimi me bateri. Në të njëjtën kohë, përdorimi i modeleve më të vegjël të IA mund të ndihmojë në reduktimin e konsumit të energjisë dhe ndikimit mjedisor.

Megjithëse përqindja e emetimeve të shkaktuara nga IA mbetet e ulët në nivel global (nën 1.5%), ajo është në rritje të shpejtë. Efikasiteti energjetik dhe inovacioni mund të kompensojnë këto efekte, por kjo varet nga drejtimi që do të marrë zhvillimi i IA në vitet në vijim.

Çfarë të bëni në Vjenë gjatë pushimeve të Pashkëve

Posted on by Alb

Shkollat në Vjenë do të jenë të mbyllura nga 12 deri më 21 prill – ja si mund ta shfrytëzoni sa më mirë pushimin e Pashkëve, qoftë në tregje, me çokollata apo aktivitete për familjen.

Nëse po kaloni pushimet e Pashkëve në Vjenë me fëmijë, miq, ose thjesht dëshironi të shijoni pranverën në qytet, ka shumë ngjarje, aktivitete dhe ëmbëlsira që ju presin. Nga tregjet tradicionale të Pashkëve deri te punimet artizanale dhe punëtoritë për çokollatë – ja disa sugjerime për atë që mund të bëni në Vjenë këtë Pashkë.

Vizitoni tregun e Pashkëve në Schönbrunn

Një vizitë në Pallatin Schönbrunn është gjithmonë një zgjedhje e shkëlqyer – dhe është edhe më magjike kur tregu i Pashkëve vendoset në oborrin e tij. Tregu është i hapur çdo ditë nga 27 marsi deri më 21 prill dhe ofron artizanate, ushqime të shijshme dhe aktivitete për fëmijët.

Atje mund të gjeni dekorime të punuara me dorë, delikatesa lokale dhe muzikë live, si dhe aktivitete për fëmijët, si labirint nga kallamishtet, karusel dhe rrotë panoramike. Më e mira? Hyrja është falas.

Gjeni tregun më tradicional të Pashkëve në qendër të qytetit

Tregu i Altwiener Ostermarkt në Freyung është një klasik i vërtetë. Ai funksionon nga 3 deri më 21 prill dhe në sheshin elegant të qytetit të vjetër mund të gjeni vezë të pikturuara me dorë, delikatesa lokale dhe punime artizanale.

Elementi kryesor? Një kullë gjigante me 40,000 vezë Pashkësh. Ka muzikë live çdo ditë nga ora 16:30 dhe një program të vogël, por të këndshëm për fëmijët, me tregime dhe teatër kukullash.

Festoni Pashkët në Hernals me një festival të plotë

Distrikti i 17-të organizon një nga festivalet më të bukura të pranverës në qytet: Kalvarienbergfest. Nga 4 deri më 20 prill, Kalvarienberggasse dhe Sheshi St.-Bartholomäus kthehen në një qendër festive me stenda që shesin artizanate, ushqime dhe produkte sezonalë.

Fëmijët mund të marrin pjesë në aktivitete si piktura e vezëve, vizatim në fytyrë, tatuazhe me shkëlqim dhe shfaqje nga magjistarë e kukullash. Lepuri i Pashkëve do të jetë gjithashtu i pranishëm. Programi përfshin edhe këngë tradicionale të Pashkëve të Premten e Madhe dhe një zjarr të Pashkëve të Shtunën e Shenjtë.

Festivali është i hapur çdo ditë nga ora 14:00 deri në orën 20:00 – një mundësi e shkëlqyer për familjet që kërkojnë një pasdite festive dhe të qetë.

Mbajini fëmijët të angazhuar me programin e Pashkëve të wienXtra

Programi i pushimeve wienXtra i Vjenës nuk është vetëm për verë – ai ofron një sërë ngjarjesh dhe aktivitetesh për Pashkë. Fëmijët mund të marrin pjesë në punëtori krijuese, të eksplorojnë aventura me temë (si zbulimi i sekreteve të Ishullit të Pashkëve) ose të shohin një shfaqje kukullash me Lepurin e Pashkëve.

Aktivitetet janë kryesisht falas ose me kosto të ulët, por zakonisht kërkohet regjistrim paraprak. Mund të regjistroheni online ose përmes telefonit – dhe është mirë ta bëni sa më herët, pasi vendet mbushen shpejt.

Shijoni ëmbëlsirat në Muzeun e Çokollatës

Pashkët nuk do të ishin të plota pa çokollatë – dhe Muzeu i Çokollatës në distriktin 23 të Vjenës ofron shumë. Gjatë pushimeve, ai organizon aktivitete speciale si punëtori për ndërtimin e një foleje Pashkësh me çokollatë (€11, përfshirë hyrjen në muze) dhe një lojë me enigma të Pashkëve (pagesë shtesë prej €6).

Muzeu është i hapur nga e hëna në të shtunë gjatë gjithë pushimeve të Pashkëve, por është i mbyllur të dielën dhe të hënën e Pashkëve.

Hidhuni në një gjueti vezësh në Prater

Për një aktivitet argëtues për fëmijët e vegjël, drejtohuni në Prater të dielën e Pashkëve për gjuetinë e vezëve dhe programin për fëmijë.

Me muzikë, shfaqje skenike, lojëra dhe një vizitë nga vetë Lepuri i Pashkëve, kjo ditë premton shumë argëtim dhe mundësi për foto të paharrueshme.

Festimet fillojnë rreth mesditës pranë Riesenrad-it. Hyrja është falas – megjithatë, disa atraksione mund të kenë një tarifë të vogël.

Rënie e lindjeve të shumëfishta pas IVF në Zvicër

Posted on by Alb

Përqindja e lindjeve të shumëfishta pas fertilizimit in vitro (IVF) në Zvicër ka shënuar një rënie të ndjeshme gjatë dy dekadave të fundit. Sipas të dhënave të publikuara të enjten nga Zyra Federale e Statistikave (FSO), kjo rënie lidhet kryesisht me rishikimin e ligjit për Riprodhimin e Asistuar Mjekësor, që hyri në fuqi në vitin 2017 dhe lejon ruajtjen e deri në 12 embrioneve.

Nga viti 2002 deri në 2023, përqindja e lindjeve binjake ka rënë nga 17.4% në vetëm 2.8%. Falë ndryshimeve ligjore, mjekët kanë më shumë fleksibilitet për të vlerësuar cilët embrione janë më të përshtatshëm për transferim. Si rezultat, praktika e transferimit të vetëm një embrioni është rritur ndjeshëm, duke ulur ndjeshëm rastet e shtatzënive të shumëfishta, transmeton albinfo.ch.

Në vitin 2017, mbi gjysma e transferimeve përfshinin dy embrione. Ndërsa në vitin 2023, shumica dërrmuese e rasteve përfshinin vetëm një embrion, dhe më pak se 1,000 raste përfshinin transferimin e dy embrioneve.

Rritet edhe suksesi i trajtimeve

Gjatë vitit 2023, 6,513 çifte në Zvicër iu nënshtruan fertilizimit in vitro. Nga këto trajtime lindën 2,511 fëmijë të gjallë, duke përfaqësuar 30% të 8,164 transferimeve të kryera – një përqindje në rritje. Kjo korrespondon me rreth 3% të të gjitha lindjeve në Zvicër.

Edhe pse numri i çifteve të trajtuara ka rënë lehtë në krahasim me një vit më parë, numri i lindjeve të gjalla është rritur me 5.9%, dhe që nga viti 2010 është rritur me rreth 25%.

Drejt ndryshimeve të reja ligjore

Në Zvicër, dhurimi i spermës është i ligjshëm vetëm për çiftet heteroseksuale të martuara ose çiftet lesbike të martuara. Megjithatë, në fund të janarit të këtij viti, Këshilli Federal paraqiti një projektligj që parashikon lejimin e dhurimit të vezëve. Ky ndryshim do t’u japë të drejtë edhe çifteve të pamartuara që të përfitojnë nga trajtimet, përfshirë edhe dhurimin e spermës. Surrogacia, megjithatë, mbetet e ndaluar.

Shumë persona që nuk kanë qasje në këto trajtime brenda vendit, shpesh udhëtojnë jashtë shtetit për trajtime, por FSO nuk posedon të dhëna për rastet që ndodhin jashtë territorit zviceran.

Dollari bie në nivelin më të ulët ndaj frangut zviceran që nga viti 2015

Posted on by Alb

Dollari amerikan ka vazhduar rënien të enjten, duke arritur nivelin më të ulët në më shumë se dhjetë vjet ndaj frangut zviceran, i cili konsiderohet si një strehë e sigurt për investitorët gjatë luftës tregtare të nisur nga Donald Trump. Ndërkohë, ari ka arritur një rekord të ri historik, transmeton albinfo.ch.

Rreth orës 17:05, sipas kohës së Zvicrës, dollari ra me 2.00% kundrejt euros, duke zbritur në 1.1173 dollarë për euro. Ndaj frangut zviceran, dollari pësoi një rënie prej 2.80%, duke arritur në 0.8329 franga, pak pasi kishte zbritur në nivelin më të ulët që nga janari i vitit 2015: 0.8327 franga.

Rënia e “greenback”-ut u përkeqësua edhe nga ngadalësimi më i madh se sa pritej i indeksit të çmimeve të konsumit në SHBA për muajin mars, i cili u publikua më herët gjatë ditës. Ky tregues u ngadalësua në 2.4% në bazë vjetore, nga 2.8% që ishte në shkurt, ndërsa analistët kishin parashikuar një vlerë prej 2.5%.

 

Kosova dhe Emiratet e Bashkuara Arabe njohin reciprokisht patentë shoferët

Posted on by Alb

Marrëveshja për njohjen reciproke të patentë shoferëve ndërmjet Republikës së Kosovës dhe Emirateve të Bashkuara Arabe ka hyrë zyrtarisht në fuqi.

Lajmi është konfirmuar sot nga Ministria e Punëve të Jashtme e Emirateve, përmes një Note Verbale të dërguar në Ambasadën e Kosovës në Abu Dhabi, transmeton albinfo.ch.

Kjo marrëveshje u lejon qytetarëve të të dyja vendeve që ta konvertojnë patentën e shoferit pa pasur nevojë për provime shtesë, as teorike dhe as praktike, në vendin pritës. Me këtë hap lehtësohet lëvizja dhe integrimi i qytetarëve në të dy shtetet.

Marrëveshja është nënshkruar më 4 dhjetor 2024 në Abu Dhabi, nga ministrat e Brendshëm të të dy vendeve: Xhelal Sveçla nga Kosova dhe Sheikh Saif bin Zayed Al Nahyan nga Emiratet.

Kjo është marrëveshja e dytë e rëndësishme mes dy vendeve, pas asaj për heqjen e vizave për qytetarët e Kosovës, e cila hyri në fuqi në janar të vitit 2024.

Ministria e Punëve të Jashtme e Kosovës ka shprehur mirënjohje për autoritetet e Emirateve për bashkëpunimin e tyre dhe për forcimin e marrëdhënieve dypalëshe.

Toblerone rikthehet me simbolin zviceran – investim i ri në Bernë

Posted on by Alb

Shumica e produkteve Toblerone do të mbajnë tani kryqin zviceran në paketimin e tyre. Kompania amerikane Mondelez, e cila zotëron Toblerone, po i përkushtohet sërish Zvicrës si vend prodhimi, duke investuar 65 milionë franga në fabrikën në Bernë.

Ky zhvillim vjen pas kritikave të mëdha që pasuan zhvendosjen e pjesshme të prodhimit në Sllovaki në vitin 2023. Si pasojë e kësaj zhvendosjeje, Toblerone nuk mund të përdorte më etiketën “Swiss made” dhe logoja e famshme e Matterhorn-it u hoq nga ambalazhi, duke u zëvendësuar me një imazh malor fiktiv – derisa tani, transmeton albinfo.ch.

Rikthimi i simboleve zvicerane

Në të ardhmen, pjesa më e madhe e produkteve Toblerone do të mbajnë kryqin zviceran, si simbol i lidhjes së fortë me Zvicrën. Pyetjes nëse largimi nga Matterhorn-i ishte një gabim, kompania nuk i është përgjigjur drejtpërdrejt. Megjithatë, Anna van Riesen, menaxhere e Mondelez International për Zvicrën, e thekson:

Zgjerim i fabrikës në Bernë

Paralelisht me ndryshimet në dizajn, Mondelez do të investojë 65 milionë franga për modernizimin dhe zgjerimin e fabrikës në Bern-Brünnen.

Zvicër: Ndalohen fishekzjarrët

Posted on by BR

Ky është vlerësimi i Komisionit për Shkencën, Arsimin dhe Kulturën të Këshillit të Shteteve (CSEC-S), i cili është në favor të një nisme parlamentare nga komisioni homolog i Këshillit Kombëtar, si një kundërpropozim indirekt – pra, në nivel ligji – ndaj nismës popullore që synon të kufizojë përdorimin e fishekzjarrëve. Duke njohur legjitimitetin e disa shqetësimeve të ngritura nga nisma, sipas një njoftimi të shërbimeve parlamentare të publikuar sot, CSEC-S shpreson që kundërpropozimi të përqendrohet në mënyrë specifike në mjetet shpërthyese pa efekte vizuale, siç janë fishekzjarrët me zë të lartë, pa i nënshtruar fishekzjarrët në përgjithësi një ndalimi të plotë apo regjimi të detyrueshëm autorizimi.

Pas këtij vendimi, nisma parlamentare do t’i rikthehet komisionit homolog të Këshillit Kombëtar për hartim të mëtejshëm, transmeton albinfo.ch.

Vlen të theksohet se Këshilli Federal kishte shprehur tashmë opinionin e tij për nismën më 16 tetor, duke kërkuar që ajo të refuzohej pa paraqitur asnjë kundërpropozim. Edhe pse i vetëdijshëm se fishekzjarrët me zë të lartë shqetësojnë një pjesë të popullsisë dhe mund të shkaktojnë reagime të veçanta te kafshët, qeveria beson se emetimet e grimcave dhe zhurma që ato prodhojnë kanë një kohëzgjatje të kufizuar dhe ndikim relativisht të ulët. Për më tepër, kantonet dhe komunat tashmë kanë bazën e nevojshme ligjore për të kufizuar përdorimin e fishekzjarrëve. Sipas Ekzekutivit, shumë qytete dhe komuna tashmë e përdorin këtë kompetencë duke e kufizuar përdorimin e fishekzjarrëve në kohë dhe/ose hapësirë, ose duke e bërë atë të mundshëm vetëm me leje paraprake. Në të njëjtën kohë, qeveria vëren se shumë njerëz e lidhin përdorimin e fishekzjarrëve me emocione pozitive dhe, për këtë arsye, ndalon ose kufizon në mënyrë të përgjithshme përdorimin dhe shitjen e tyre do të ishte një masë e tepërt dhe joproporcionale.

Nisma popullore “Për një kufizim të fishekzjarrëve” – e mbështetur nga një sërë organizatash, shumë prej të cilave angazhohen për mbrojtjen e kafshëve, si të egra ashtu edhe shtëpiake – ka mbledhur 137.193 nënshkrime të vlefshme. Nismëtarët shprehin shqetësimin e tyre sidomos për fishekzjarrët me zhurmë të fortë, të cilët shqetësojnë banorët dhe trembin kafshët. Mbështetësit e nismës janë gjithashtu të shqetësuar për ndotjen e ajrit. Me këtë amendament kushtetues të propozuar, ata kërkojnë që individëve privatë t’u ndalohet shitja dhe përdorimi i fishekzjarrëve në të gjithë Zvicrën, me përjashtim të atyre pa zhurmë, si flakadanët apo vullkanet. Nisma parashikon gjithashtu mundësinë e dhënies së autorizimeve të jashtëzakonshme për ngjarje me rëndësi kombëtare ose mbirajonale, si për shembull për festimet e 1 gushtit.

 

A janë gjigantët farmaceutikë kompanitë më të mira për të punuar në Zvicër?

Posted on by erezzaademi

Platforma e biznesit në internet LinkedIn ka zbuluar kompanitë më të mira në Zvicër për të punuar në vitin 2025. Një prirje e qartë bie në sy: pothuajse të gjithë “fituesit” janë kompani të fushës farmaceutike ose të ngjashme.

Renditja e katërt vjetore e kompanive kryesore të LinkedIn përfshin 25 punëdhënësit më të mirë për zhvillim dhe avancim profesional në Zvicër.

Sipas platformës, kompanitë janë vlerësuar mbi bazën e të dhënave ekskluzive të LinkedIn, transmeton albinfo.ch. Metodologjia ka marrë parasysh faktorë si zhvillimi i aftësive, mundësitë për promovim, rritja dhe stabiliteti i kompanisë, diversiteti gjinor dhe të tjera.

Këto janë 10 kompanitë më të mira për vitin 2025:

  1. Roche (Farmaceutikë)

  2. Novartis (Farmaceutikë)

  3. Bristol Myers Squibb (Farmaceutikë)

  4. Medtronic (Pajisje mjekësore)

  5. Takeda (Farmaceutikë)

  6. Lonza (Farmaceutikë)

  7. Bachem (Farmaceutikë)

  8. Thermo Fisher Scientific (Bioteknologji)

  9. Procter & Gamble (Prodhim)

  10. UCB (Farmaceutikë)

Sa i rëndësishëm është sektori farmaceutik/bioteknologjik për ekonominë e Zvicrës?

Qendra e industrisë farmaceutike në Zvicër është Bazeli, ku ndodhen gjigantët globalë Novartis dhe Roche. Sipas Institutit Ekonomik KOF në Cyrih, kjo industri është “motori i rritjes” së ekonomisë zvicerane. Ajo konsiderohet sektori më i madh industrial në vend, duke kontribuar ndjeshëm në suficitin tregtar.

Shoqata Interpharma thekson se produktiviteti në këtë sektor është pesë herë më i lartë se mesatarja kombëtare.

Pse sektori farmaceutik është tërheqës për punonjësit?

Kjo industri kërkon vazhdimisht specialistë të kualifikuar në kërkim, zhvillim dhe prodhim. Ajo është gjithmonë dinamike, me shpikje dhe inovacione të reja që e mbajnë në qendër të zhvillimit teknologjik dhe shkencor.

Për më tepër, ky sektor ofron paga ndër më të lartat në Zvicër. Një punë e nivelit fillestar mund të ketë pagë rreth 80,000 franga në vit, ndërsa një shkencëtar në Roche ose Novartis mund të fitojë nga 116,000 deri në 132,000 franga në vit. Drejtuesit kryesorë mund të fitojnë deri në 500,000 franga në vit.

A mund të punojnë shtetasit e huaj në këtë sektor?

Po, dhe shumë e bëjnë. Kompanitë farmaceutike rekrutojnë aktivisht edhe nga vendet jashtë BE-së dhe EFTA-s, përfshirë SHBA-të.

Sipas rekrutuesit Erik Wirz: “Në Shtetet e Bashkuara ka shumë punonjës të kualifikuar në fushën farmaceutike dhe teknologjike. Në Zvicër, për disa pozicione, ka mungesë kandidatësh të përshtatshëm në tregun vendas, ndaj pranimi i drejtuesve të huaj është i pashmangshëm.”

Si të aplikoni në një nga këto kompani?

Për të kërkuar punë, mund të vizitoni platformat Jobs.ch dhe JobsUp.ch, ose më mirë akoma, të shkoni direkt në faqet zyrtare të kompanive për të parë ofertat më të fundit të punës dhe mënyrën e aplikimit.

Sa e lehtë është të arrish pagën për një leje pune të kualifikuar në Gjermani?

Posted on by erezzaademi

Nëse dëshironi të shkoni në Gjermani me një vizë për punë të kualifikuar ose me kartën blu të BE-së, do t’ju duhet të fitoni mbi një prag të caktuar. Ne shikojmë rregullat aktuale të pagave dhe sa e lehtë është të marrësh një nga këto leje të kërkuara.

Përballë një popullsie në plakje, Gjermania aktualisht është e dëshpëruar për të tërhequr në ekonominë e saj më të mirët dhe më të ndriturit nga jashtë – qoftë si studentë, si punëkërkues ose me një nga vizat e saj të punëtorëve të kualifikuar.

Lejet e punëtorëve të kualifikuar janë leje pune për personat me formim profesional ose diplomë universitare që duan të vijnë në Gjermani për të punuar në profesionin e tyre të zgjedhur.

Një nga më të njohurit është Karta Blu e BE-së: një leje qëndrimi e disponueshme për shtetasit jo-BE, që synon të lejojë profesionistët e aftë të jetojnë dhe punojnë në BE. Rreth 25 nga 27 shtete anëtare i lëshojnë ato. Skema e Gjermanisë është një nga më të kërkuarat, transmeton albinfo.ch.

Aplikantët duhet të kenë një diplomë në fushën e tyre të zgjedhur – me përjashtim të profesionistëve me përvojë të IT-së – dhe gjithashtu të sigurojnë një ofertë pune që plotëson kërkesën për pagën minimale. Nga 1 janari 2025, kjo normë është vendosur në:

– 48,300 € (4,250 € në muaj) për shumicën e profesioneve

– 43,760 € (3,647 € në muaj) për fillestarët e karrierës dhe aplikantët në profesione me mungesë, duke përfshirë IT, ndërtim dhe arsim

Ndërkohë, viza e punëtorëve të kualifikuar të Gjermanisë nuk kërkon një diplomë universitare, por mjafton formimi profesional dhe dy vjet përvojë. Pragu minimal i pagës për këtë lloj leje është 43,470 € në vit.

Sa e vështirë është të arrish këto pragje?

Sipas Zyrës Federale të Statistikave (Destastis), paga mesatare në Gjermani në vitin 2024 ishte 52,159 euro. Kjo do të thotë se gjysma e punëtorëve vitin e kaluar kanë fituar më shumë se kjo shumë, ndërsa gjysma tjetër më pak. Rrjedhimisht, paga mesatare e Gjermanisë është rreth 8,700 € më shumë se pragu për një vizë të zakonshme të punëtorëve të kualifikuar dhe rreth 4,000 € më i lartë se pragu për një kartë blu të BE-së, shkruan thelocal.

Sigurisht, ka variacione të mëdha në profesione dhe rajone të ndryshme, por paga mesatare është gjithsesi një pikë referimi e mirë. Vlen gjithashtu të theksohet se dhjetë përqindëshi më i ulët i fituesve kishin paga bruto prej 32,526 € ose më pak.

Për një pamje më të detajuar, statistikat e Agjencisë Federale të Punësimit (BA) japin një vlerësim të pagave në përqindjen e 25-të në profesione të ndryshme nga viti 2023.

Përqindja e 25-të do të thotë që tre në katër persona që punojnë në atë profesion fitojnë më shumë. Prandaj, kjo shifër mund të përdoret për të vlerësuar nëse shumica e vendeve të punës në atë sektor paguajnë mjaftueshëm për të përmbushur kërkesat e pagës minimale të kartonit blu.

Dy të tretat e shkencëtarëve kompjuterikë, për shembull, fitojnë më shumë se 4,968 € në muaj – lehtësisht mbi pragun e Kartës Blu. Prandaj, shumica e shkencëtarëve të kompjuterave nuk duhet të kenë vështirësi në përmbushjen e kërkesave për tarifën e rregullt, megjithëse profesionet STEM janë në të vërtetë në listën e mungesës dhe për këtë arsye përfitojnë nga paga minimale më e ulët.

Për mësuesit, shifra është 4,113 €. Për shkak se mësuesit janë në listën e profesioneve të mungesës, kjo do të thotë se shumica e mësuesve duhet të jenë në gjendje të përfitojnë nga skema e kartonit blu.

Ndërkohë, infermierët janë në majë, me shumicën dërrmuese që fitojnë 3,603 euro në muaj ose më shumë – pothuajse saktësisht pragu për profesionet me mungesë. Kjo mund të nënkuptojë se disa infermiere do të duhet të negociojnë për të arritur pagën që u nevojitet.

Profesionet ku shumica do ta kenë të vështirë për t’u kualifikuar për skemën përfshijnë asistentët dentarë (2,387 €), paralegalë (2,500 €) dhe hidraulikë (3,006 €).

Megjithatë, këto janë shifra të përgjithshme, të cilat fshehin ndryshime të gjera në zona në Gjermani, mosha dhe gjini.

Pagat janë zakonisht më të larta në shtetet federale perëndimore dhe më të ulëta në ish-Gjermaninë Lindore. Meshkujt zakonisht fitojnë më shumë se gratë, ndërsa pagat rriten sipas moshës derisa fillojnë të bien në mesin e viteve ’50.

Shifrat janë gjithashtu mbi një vit, që do të thotë se ato ka të ngjarë të jenë pak më të ulëta se pagat në reklamat për punë që janë aktive tani.

Kur mund të merrni pushim pasi filloni një punë të re në Austri?

Posted on by erezzaademi

Nëse sapo po filloni një punë në Austri, mund të duket e çuditshme të mendoni për pushimet tuaja – por me motin më të mirë që vjen, këtu janë të drejtat tuaja.

Fillimi i një pune të re mund të jetë emocionues dhe i frikshëm, veçanërisht kur bëhet fjalë për të kuptuar politikat e kompanisë, duke përfshirë kohën e pushimeve. Një çështje e zakonshme është se kur punonjësit mund të marrin pushimet e tyre pasi të fillojnë një punë të re në Austri.

Së pari, lajmi i mirë është se Austria ka një pagesë bujare për pushime. Punëtorët zakonisht marrin të paktën 25 ditë pushim me pagesë, e cila mund të rritet në disa raste, si për shembull nëse keni qenë punonjës për 25 vjet (jo domosdoshmërisht në të njëjtën kompani), transmeton albinfo.at.

Në Austri, caktimi i kohës së pushimeve për punonjësit e rinj zakonisht ndjek një proces të strukturuar të rregulluar nga politikat e kompanisë, ligjet e punës dhe kontrata kolektive specifike që zbatohet për profesione të caktuara.

Sipas rregulloreve të punës, punonjësit në Austri i grumbullojnë ditët e pushimeve gradualisht gjatë gjithë vitit. Megjithatë, specifikat mund të ndryshojnë në varësi të politikave të kompanisë dhe kushteve të punësimit.

Do të duhet të prisni që të përfundojë periudha e provës

Punëdhënësit në Austri shpesh kërkojnë që punonjësit e rinj të kryejnë një periudhë prove përpara se të kualifikohen për pushim me pagesë. Kjo periudhë prove i mundëson punëmarrësit dhe punëdhënësit të vlerësojnë përshtatshmërinë reciproke dhe integrimin në vendin e punës.

Gjatë kësaj kohe, punonjësit mund të grumbullojnë ende ditë pushimi, por mund të jenë në gjendje t’i përdorin ato vetëm pasi të përfundojë periudha e provës.

Gjatë gjashtë muajve të parë si punëtor me kohë të plotë, ju keni të drejtë për dy ditë leje me pagesë për çdo muaj të punuar. Kjo do të thotë që pasi keni punuar për një muaj (zakonisht muajin e provës), mund të merrni dy ditë pushim; pasi keni punuar për dy, ju mund të merrni katër ditë pushim, e kështu me radhë, por nuk mund ta përdorni shtesën tuaj të plotë 25-ditore në këta gjashtë muajt e parë.

Kjo nuk vlen më pas gjashtë muajsh dhe ju mund ta përdorni shtesën tuaj sa herë që bini dakord me punëdhënësin tuaj, shkruan thelocal.

A mund të më detyrojë shefi im ditët e pushimeve?

Në përgjithësi, punëdhënësi juaj nuk mund t’ju detyrojë të bëni pushime në një datë të caktuar. Megjithatë, ata mund të kenë pushime në të gjithë kompaninë përveç kompensimit tuaj (për shembull, shumë kompani ofrojnë Krishtlindjet deri në natën e Vitit të Ri si pushime). Mund të ketë udhëzime të përgjithshme, të tilla si sigurimi që jo të gjithë marrin të njëjtat dy javë pushim nga puna. Pra, ai mund të refuzojë një kërkesë për pushime.

Nga ana tjetër, në Austri, ju keni të drejtë të zgjidhni një ditë kur punëdhënësi juaj nuk mund të refuzojë kërkesën tuaj për pushime.

Kjo është veçanërisht e dobishme nëse dëshironi një festë fetare jashtë punës, për të planifikuar një rast familjar ose thjesht për të festuar ditëlindjen tuaj. Ju duhet të bini dakord për këtë me shkrim me punëdhënësin tuaj të paktën tre muaj përpara datës.

Masat nga qeveria zvicerane pas tarifave nga Trump

Posted on by BR

Këshilli Federal po krijon një ekip të posaçëm për t’u marrë me pasigurinë që vjen nga Shtetet e Bashkuara.

Qasja e tij e qetë dhe e matur ndaj krizës po vlerësohet gjerësisht.

Dje, presidentja Karin Keller-Sutter foli drejtpërdrejt me Donald Trump – nuk janë publikuar detaje rreth kësaj thirrjeje, ndërsa Keller-Sutter i tha NZZ-së se ndonjëherë është më mirë të mos ndash të gjitha mendimet e tua.

Ekipi i ri do të drejtohet nga Ministri i Jashtëm, Ignazio Cassis, dhe do të bashkojë disa departamente.

Një i dërguar special, ambasadori Gabriel Lüchinger, po dërgohet në SHBA. Shpresohet që, si anëtar i Partisë Popullore të Zvicrës, ai do të mund të hapë më shumë dyer për anëtarët e Partisë Republikane në Uashington, transmeton albinfo.ch.

Nisma parlamentare tashmë i rikthehet Komisionit Kombëtar për Shkencë, Arsim dhe Kulturë për hartimin e projektit.