Një skemë e sofistikuar phishing po përdoret nga mashtrues që synojnë udhëtarët e SBB-së. Ata dërgojnë emaile false duke pretenduar se ofrojnë rimbursim për bileta, për të vjedhur të dhënat e kartave të kreditit.

Edhe njerëz me përvojë, si avokatët, mund të bien pre e këtyre mashtrimeve nëse nuk janë të kujdesshëm.

Këshilla kryesore: mos ndani asnjëherë informacionin e kartës suaj të kreditit përmes emailit dhe verifikoni gjithmonë burimin përpara se të bëni ndonjë veprim.

Kujdesi është çelësi për të shmangur humbjet financiare nga phishingu.

Në Zvicër po kalojnë stuhi të forta me mbi 11 000 rrufe të regjistruara. Stuhitë sollën shi të rëndë, breshër dhe erëra të forta, duke shkaktuar dëme si rrëzimin e pemëve dhe bllokimin e linjave hekurudhore për shkak të rrëshqitjeve dhe dëmeve nga moti. Paralajmërimi i rrezikut është ngritur në nivelin 3 për disa rajone, duke përfshirë Cyrih, Bazel dhe kantone të tjera, transmeton albinfo.ch.

Rrufe të forta dhe shi të dendur parashikohen në pjesë të ndryshme të vendit gjatë ditës dhe mbrëmjes. Në zonat jugore, si Tiçino dhe Graubynden, priten reshje të mëdha dhe rrezik për përmbytje lokale. Përveç kësaj, disa fluturime janë anuluar në aeroportin e Cyrihut për shkak të kushteve të motit.

Qeveria dhe shërbimet emergjente paralajmërojnë banorët për rrezikun e rrëshqitjeve, përmbytjeve dhe dëmeve nga stuhitë dhe kërkojnë kujdes maksimal.

Këshilli i Shtetit të Valaisit ka njoftuar të mërkurën ndarjen e 10 milionë frangave ndihmë urgjente për banorët e komunës së Blattenit, si përgjigje ndaj situatës së jashtëzakonshme që ka goditur këtë zonë alpine. Fondet do të vijnë nga të ardhurat e Loterisë Romande, ndërsa mënyra e shpërndarjes së tyre do të përcaktohet më vonë, shkruan RTS, transmeton albinfo.ch.

Në një komunikatë për media, autoritetet kantonale theksuan se masa është pjesë e një përgjigjeje gjithëpërfshirëse për të përballuar pasojat e fatkeqësisë, duke përfshirë ndihmën për qytetarët, komunën dhe rindërtimin afatgjatë të zonës.

Kantoni do të ndjekë një “model kaskadë” të ndihmës, ku fillimisht angazhohen kompanitë e sigurimeve, pasuar nga fondet shtetërore dhe ndihmat e ndërsjella. Vetëm më pas do të përfshihet mbështetja direkte kantonale, në përputhje me parimin e subsidiaritetit, transmeton albinfo.ch.

Autoritetet njoftuan gjithashtu krijimin e një grupi strategjik për zhvillimin e një plani rrugor për rindërtimin e Blattenit, në bashkëpunim të ngushtë me komunën dhe bashkitë e tjera të zonës së Lötschentalit.

Ndërhyrjet e menjëhershme, pastrimi dhe restaurimi janë shpallur si masa me interes publik, duke mundësuar shmangien e procedurave burokratike dhe të tenderimit, me qëllim përshpejtimin e veprimeve në terren.

Këshilli i Shtetit ka bërë të ditur se do të zhvillohet edhe një strategji afatgjatë, e mbështetur në baza ligjore, për të përballuar pasojat e ndryshimeve klimatike, të cilat po shfaqin gjithnjë e më shumë ndikim të drejtpërdrejtë në komunitetet alpine, transmeton albinfo.ch.

Me rastin e 30-vjetorit të themelimit, Komisioni Federal kundër Racizmit (KFRA) ka kërkuar zyrtarisht miratimin e një ligji gjithëpërfshirës për trajtimin e barabartë në Zvicër. Ngjarja u zhvillua në Bernë dhe mblodhi figura kyçe nga politika dhe shoqëria civile, përfshirë Këshilltaren Federale Elisabeth Baume-Schneider, Presidenten e Këshillit Kombëtar Maja Riniker dhe Presidenten e KFRA-së Ursula Schneider Schüttel, raporton albinfo.ch.

Nën moton “Le të festojmë, të kuptojmë dhe të ecim përpara”, ky përvjetor shënon tre dekada të përkushtimit ndaj luftës kundër racizmit dhe diskriminimit në Zvicër. Por, pavarësisht progresit të bërë, KFRA paralajmëron se sistemi aktual ligjor nuk ofron ende mbrojtje të mjaftueshme për viktimat e diskriminimit, veçanërisht në fushat e jetës private si punësimi dhe strehimi.

“Zvicra nuk ka aktualisht mbrojtje specifike kundër diskriminimit në të drejtën civile”, deklaroi Ursula Schneider Schüttel, duke theksuar se ky boshllëk ligjor është vënë në dukje prej vitesh nga organizma ndërkombëtarë si Komiteti për Eliminimin e Diskriminimit Racor dhe Komisioni Evropian kundër Racizmit dhe Intolerancës.

KFRA publikoi së fundmi dy studime që përforcojnë këtë kërkesë: një analizë krahasuese me vendet evropiane që tregon se Zvicra ka mbetur prapa standardeve ndërkombëtare dhe një raport që identifikon boshllëqe të mëdha në mbrojtjen civile kundër diskriminimit brenda vendit, transmeton albinfo.ch.

Manifesti i ri i prezantuar nga KFRA bazohet në katër shtylla kryesore:

• Plotësimi i boshllëqeve ekzistuese ligjore. Statistikat e vitit 2024 tregojnë se 17% e popullsisë zvicerane ka përjetuar diskriminim racor, ndërkohë që ligji penal aktual nuk e mbulon shumicën e situatave të përditshme.

• Vendosja e barazisë ligjore mes grupeve të ndryshme. Ndërsa disa kategori kanë mbrojtje specifike, të tjerë si viktimat e racizmit apo personat LGBTIQ+ mbeten të pambrojtur.

• Mbrojtje universale për të gjithë qytetarët. Ligji i ri do të përfshijë të gjitha fushat e jetës së përditshme dhe do të pasqyrojë realitetin e një shoqërie të larmishme.

• Një angazhim për drejtësi sociale dhe kohezion. Lufta kundër diskriminimit shihet si një domosdoshmëri për shëndetin publik, inovacionin dhe kohezionin ekonomik.

KFRA i bën thirrje politikës, institucioneve dhe shoqërisë civile që të ndërmarrin hapa konkretë për të siguruar një sistem ligjor që garanton mbrojtje efektive për të gjithë, një hap i domosdoshëm drejt një Zvicre vërtet pa diskriminim, transmeton albinfo.ch.

Një ekip studiuesish nga Zvicra ka zhvilluar një robot inovativ me katër këmbë, i cili është në gjendje të luajë badminton kundër kundërshtarëve njerëzorë, duke treguar koordinim të jashtëzakonshëm dhe saktësi në lojë. Roboti është rezultat i një bashkëpunimi mes ETH Zurich dhe revistës shkencore Science Robotics, shkruan The Independent, transmeton albinfo.ch.

Kjo arritje është bërë e mundur përmes përdorimit të inteligjencës artificiale, konkretisht teknikës së të mësuarit me përforcime, një metodë që i lejon robotit të mësojë nga prova dhe gabime, duke përmirësuar vendimmarrjen në mënyrë të vazhdueshme.

Roboti përfshin një kombinim të avancuar të shikimit, kontrollit të lëvizjes dhe koordinimit të dorës, çka i mundëson atij të ndjekë me saktësi fluturimin e topit dhe ta godasë atë në mënyrë të efektshme.

Një nga elementet kyçe të projektit është integrimi i një modeli të perceptimit të zhurmës, i trajnuar mbi të dhëna nga kamera të botës reale. Ky model ndihmon robotin të ruajë performancën e tij edhe në kushte të ndryshme ambientale.

“Ne prezantuam një model të perceptimit të zhurmës, i cili hartëzon lëvizjen e robotit me cilësinë e perceptimit. Kjo i lejoi algoritmit të të mësuarit me përforcime të balancojë automatikisht midis lëvizjes së shkathët të robotit dhe perceptimit të besueshëm”, shpjegoi Yuntao Ma, një nga studiuesit kryesorë të projektit.

Sipas Ma, ky zhvillim nuk është vetëm një dëshmi e përparimit teknologjik në fushën e robotikës sportive, por gjithashtu shënon një hap të rëndësishëm drejt aplikimeve më të gjera të robotëve autonomë në detyra komplekse. “Algoritmi i kontrollit përgjithësohet edhe për platforma të tjera robotike siç janë humanoidët, si dhe për detyra të tjera siç janë kërkim-shpëtimi dhe shërbimet në shtëpi”, shtoi ai, transmeton albinfo.ch.