Brukseli nis procedurë ndaj Austrisë për deficit të tepërt

unsplash

Komisioni Europian ka njoftuar hapjen e një procedure për deficit të tepërt kundër Austrisë, pasi vendi regjistroi një deficit buxhetor shumë mbi kufirin e lejuar prej 3% të PBB-së, sipas kritereve të Maastrichtit. Më 2024, deficiti austriak ishte 4.7%, ndërsa për vitin 2025 pritet të qëndrojë në rreth 4.5%, shkruan Krone, transmeton albinfo.ch.

Ky është një hap i parë zyrtar nga Brukseli, që pritet të formalizohet në fund të qershorit dhe më pas të miratohet nga Këshilli Ekonomik dhe Financiar i BE-së në takimin e 8 korrikut në Bruksel.

Në kuadër të kësaj procedure, Austria dhe Komisioni Europian do të punojnë së bashku për të zhvilluar një plan për uljen e deficitit dhe borxhit publik. Në rast se plani nuk zbatohet siç duhet, mund të shqiptohen gjoba, edhe pse një masë e tillë nuk është përdorur kurrë deri më sot. Për Austrinë kjo do të ishte procedura e dytë e deficitit të tepërt, pas asaj të iniciuar pas krizës ekonomike të vitit 2008.

Ministri i Financave austriak, Markus Marterbauer (SPÖ), tha se nuk ka “aspak frikë” nga kjo procedurë dhe e konsideron të menaxhueshme situatën.

Përveç Austrisë, aktualisht janë në proces procedura të ngjashme ndaj Belgjikës, Francës, Hungarisë, Italisë, Maltës, Polonisë, Sllovakisë dhe Rumanisë. Sipas parashikimeve të Komisionit, Austria është gjithashtu i vetmi vend në BE për të cilin parashikohet një rënie ekonomike në vitin 2025, transmeton albinfo.ch.