Archives

Peticioni kundër urave të reja mbi Ibër mbledh mbi 3.600 nënshkrime në Mitrovicën e Veriut

Posted on by albinfo.ch

Më shumë se 3.600 qytetarë kanë nënshkruar një peticion kundër ndërtimit të dy urave të reja mbi lumin Ibër, një projekt i nisur nga Qeveria e Kosovës në fillim të korrikut, në prani të kryeministrit në detyrë, Albin Kurti. Peticioni u organizua nga Lista Serbe, shkruan REL, transmeton albinfo.ch.

Sipas Qeverisë së Kosovës, dy urat, një për këmbësorë dhe tjetra për komunikacion, kanë për qëllim lidhjen infrastrukturore të Mitrovicës së Jugut me atë të Veriut, si pjesë e përpjekjeve për integrim dhe lehtësim të qarkullimit. Projekti kap vlerën e rreth tre milionë eurove dhe përfundimi i tij pritet në vjeshtë.

Megjithatë, Lista Serbe e ka cilësuar ndërtimin si një politikë imponimi, duke theksuar se vendimi është marrë pa konsultim me komunitetin serb lokal. “Populli është kundër imponimit dhe politikës së forcës”, thuhet në deklaratën e partisë, e cila e konsideron këtë projekt si përpjekje për zhdukjen e serbëve nga veriu i Kosovës.

Në ditët në vijim, Lista Serbe ka paralajmëruar se do ta dorëzojë peticionin te përfaqësuesit ndërkombëtarë në Kosovë, përfshirë vendet e Quint-it, KFOR-in, EULEX-in, BE-në, OSBE-në dhe UNMIK-un, duke kërkuar reagim të menjëhershëm dhe ndërprerje të punimeve.

Bashkimi Evropian, në një përgjigje për Radion Evropa e Lirë, e ka quajtur ndërtimin e urave me rëndësi praktike dhe politike, duke theksuar se projekte të tilla duhet të zhvillohen me konsultim dhe në harmoni me nevojat e komuniteteve lokale, transmeton albinfo.ch.

Zvicër: Refuzuesit radikalë të shtetit nën vëzhgim të shtuar

Posted on by albinfo.ch

Një incident i ndodhur më 13 shkurt të këtij viti ka ndezur alarmin te autoritetet zvicerane mbi rrezikun e shtuar që paraqesin individët e lidhur me lëvizjen e refuzuesve të shtetit. H., një 64-vjeçar nga Hittnau i Kantonit të Cyrihut, me prapavijë mekaniku, rrëmbeu një oficer të mbledhjes së borxheve nga komuna e Pfäffikon ZH, duke e detyruar me armë të largohej me automjetin e tij. Për fat të mirë, 27-vjeçari arriti të arratisej pas një kohe të shkurtër, shkruan 20minuten, transmeton albinfo.ch.

Pas disa javësh hetime, H. u arrestua dhe gjatë një bastisjeje në banesën e tij u zbuluan armë dhe municione. Sipas burimeve zyrtare, ai ka lidhje me mjedisin radikal të ashtuquajtur “refuzues të shtetit”, një rrymë ideologjike që mohon ligjshmërinë e institucioneve shtetërore dhe shpesh shfaq prirje për sjellje të dhunshme ose sabotim të rendit publik.

Sipas raportimeve të gazetës NZZ, fqinjët e H. tregojnë se ndryshimi i tij nisi gjatë pandemisë së COVID-19. Ai u tërhoq nga shoqëria, nisi të besojë në teori konspirative dhe kërkonte që vetëm aplikantët e pavaksinuar të banonin në pronën e tij. Në vitin 2020, ai dha dorëheqje nga shoqata lokale tregtare, ndaloi së paguari taksat dhe injoroi çdo procedurë të mbledhjes së borxheve. Në ndërveprimet me zyrtarët shtetërorë, ai shfaqte sjellje konfrontuese dhe refuzonte autoritetin e institucioneve.

Një banor tjetër i zonës tha për 20 Minuten se vetëm disa orë para arrestimit H. kishte kërcënuar një fqinj që po shëtiste qenin. Megjithatë, deri atëherë, ai ishte njohur si një njeri i vetmuar dhe i heshtur, transmeton albinfo.ch.

Pas incidentit, Shërbimi Federal i Inteligjencës (NDB) e ka përfshirë lëvizjen e refuzuesve të shtetit në fokus të shtuar të monitorimit. Sipas ligjit, nëse ekziston dyshim i arsyeshëm se një grup përbën rrezik për sigurinë e brendshme ose të jashtme, ai mund të futet në një listë zyrtare mbikëqyrjeje. Edhe pse nuk bëhet publike nëse një grup specifik është në këtë listë, NDB mund të mbledhë të dhëna nëse ka prova të lidhjeve me veprime të dhunshme.

“Zbulimet e muajve të fundit tregojnë se refuzuesit e shtetit përbëjnë një kërcënim serioz dhe duhet të mbikëqyren më afër”, tha Mario Fehr, drejtor i Sigurisë i Kantonit të Cyrihut.

Zyrtarët e mbledhjes së borxheve janë shpesh në vijën e parë të kontaktit me këta individë. Thomas Winkler, president i Shoqatës së Zyrtarëve të Zbatimit të Borxheve në Cyrih, shprehet se është jashtëzakonisht e vështirë të komunikohet me ta. “Ata janë të lidhur në rrjet dhe shpërndajnë strategji për të sfiduar sistemin. Jetojnë në një realitet tërësisht paralel”, deklaroi ai për NZZ.

Pas arrestimit, H. u mbajt nën ndalim për disa muaj, por në fund të qershorit u lirua. Zyrtarët që kishin pasur të bëjnë me të në të kaluarën u njoftuan dhe u këshilluan të jenë të kujdesshëm. Megjithatë, ende nuk dihet se ku ndodhet aktualisht H., pasi nuk është rikthyer në vendbanimin e tij, transmeton albinfo.ch.

“Ëndrra ime vazhdon”, Vedat Muriqi rinovon me Mallorcan deri në vitin 2029

Posted on by albinfo.ch

Sulmuesi i përfaqësueses së Kosovës, Vedat Muriqi, ka zyrtarizuar vazhdimin e aventurës së tij te Mallorca, duke firmosur kontratë të re që e mban në skuadrën spanjolle deri në vitin 2029, raporton albinfo.ch.

Lajmi është konfirmuar nga klubi i La Ligas përmes një komunikate zyrtare, ku thuhet se Muriqi do të mbetet pjesë e Mallorcas edhe për katër vite të tjera, nëse kontrata respektohet deri në fund. Kjo është një dëshmi e besimit dhe vlerësimit që klubi dhe lojtari kanë ndërtuar gjatë tri viteve të bashkëpunimit.

“Për mua, Mallorca është ëndrra më e mirë që kam pasur ndonjëherë. Dhe nuk do ta ndryshoj këtë”, ka thënë Muriqi, i njohur si “Pirati” i Mallorcas, për faqen zyrtare të klubit.

31-vjeçari nga Prizreni iu bashkua fillimisht Mallorcas më 31 janar 2022, në formë huazimi nga Lazio, për pjesën e mbetur të sezonit 2021/2022. Me paraqitjet e tij bindëse dhe golat vendimtarë, ai ndihmoi skuadrën të mbijetonte në elitën e futbollit spanjoll dhe fitoi zemrat e tifozëve, raporton albinfo.ch.

Në verën e vitit 2022, Muriqi firmosi një kontratë pesëvjeçare me Mallorcan dhe u bë menjëherë lider i sulmit. Deri tani ai ka zhvilluar 118 ndeshje, duke shënuar 35 gola dhe asistuar 11 herë për bashkëlojtarët.

“Mbi të gjitha ndiej krenari dhe kënaqësi. Është nder të vazhdoj të jetoj këtë ëndërr me këta njerëz këtu dhe të vazhdoj të rritem me ekipin. Për këtë jam i entuziazmuar që do të jem te Mallorca edhe për dy vjet më shumë”, ka shtuar ai, duke iu referuar shtesës së kontratës që më parë përfundonte në vitin 2027.

Pos aventurës aktuale te Mallorca, karriera e Muriqit përfshin klube të rëndësishme si Lazio, Fenerbahçe, Rizespori dhe Gençlerbirligi në Turqi, si dhe ekipe shqiptare si Besa e Kavajës, Teuta e Durrësit dhe Liria e Prizrenit, raporton albinfo.ch.

PDK kërkon dorëheqjen e ministrit Sveçla pas vdekjes së 27-vjeçarit në Lipjan

Posted on by albinfo.ch

Partia Demokratike e Kosovës ka kërkuar dorëheqjen e menjëhershme të ministrit në detyrë të Punëve të Brendshme, Xhelal Sveçla, pas vdekjes së 27-vjeçarit Agon Zejnullahu të hënën në Lipjan, rast i cili ka ngritur dyshime të forta për përfshirje të policisë në rrethana ende të paqarta, raporton albinfo.ch.

Kërkesa u bë publike nga deputeti i PDK-së, Përparim Gruda, pas dështimit të seancës së 44-t me radhë për konstituimin e Kuvendit të Kosovës. Ai theksoi se Sveçla duhet të japë dorëheqje si një akt moral i përgjegjësisë politike dhe ligjore për rastin që ka tronditur opinionin publik.

“Ne kërkojmë përgjegjësi nga organet e shtetit për zbardhjen deri në fund të vërtetës së kësaj ngjarjeje tragjike që na ka tronditur të gjithëve. Në emër të PDK-së, kërkoj dorëheqjen e ministrit të Punëve të Brendshme si një akt i padiskutueshëm moral i përgjegjësisë së tij politike dhe ligjore”, deklaroi Gruda.

Ai po ashtu kërkoi veprim të menjëhershëm institucional për zbardhjen e plotë të rastit dhe vendosjen e përgjegjësisë ndaj të gjithë atyre që kanë qenë të përfshirë, raporton albinfo.ch.

Nis Evropiani i Esports në Kosovë, Kurti: Ngjarje e madhe

Posted on by Drin Reçica

Bëhet e ditur se gjithsej 36 ekipe nga 24 shtete të Evropës do të marrin pjesë në Kampionatin Evropian të Esports që ka nisur sot në Prishtinë, ndeshjet e të cilit do të zhvillohen në Palestrën e Sporteve “1 Tetori”. Kosova jo vetëm që do të jetë mikpritëse, por edhe do të përfaqësohet me ekipin e saj kombëtar, përcjell albinfo.ch.

Ndërkohë, në ceremoninë e hapjes zyrtare, kryeministri në detyrë i Republikës së Kosovës, Albin Kurti, i cili të pranishmëve iu drejtua në gjuhën angleze, theksoi se megjithëse në botë ky njihet si sport i ri, Kosova ka një histori të gjatë në këtë aktivitet, pasi që të rinjtë kosovarë shumë vite më parë filluan angazhimin e tyre në lojërat elektronike nëpër internetcaffe, duke bërë kështu hapat e parë drejt rritjes profesionale në këtë sport.

Kurti gjithashtu bëri thirrje që nga sot e deri më 13 korrik, ekipi përfaqësues i Kosovës në këtë garë të mbështetet me zemër nga të gjithë adhuruesit dhe praktikuesit e lojërave elektronike, Esports.

Altin Preniqi, kryetar i Federatës së Esports në Kosovë, tha se organizimi i këtij evropiani është moment historik për Kosovën, sepse ky sport sjell energji të madhe dhe mbi të gjitha miliarda shikues online nga e gjithë bota, duke u bërë kështu mundësi e rrallë për promovimin e imazhit të Republikës së Kosovës në mbarë rruzullin tokësor.

Ky kampionat organizohet nga Federata Esports Kosova me mbështetjen e Ministrisë së Kulturës, Rinisë dhe Sportit. Ndeshja e parë do të zhvillohet sot ndërmjet Republikës së Kosovës dhe Republikës së Çekisë. /KP

Kölli-Beck mbyllet përgjithmonë pas 190 vitesh në Cyrih

Posted on by Drin Reçica

as gjashtë brezash biznesi familjar, Kölli-Beck në Thalwil, Cyrih, po mbyll dyert, përcjell albinfo.ch.

Katër degët e biznesit familjar do të mbyllen deri në fund të korrikut dhe do të merren përsipër nga furra të tjera rajonale.

Pas 190 vitesh, Kölli-Beck, biznesi më i vjetër familjar në Thalwil, Cyrih, po mbyll dyert e saj. Siç raporton “Zürichsee-Zeitung”, Hansruedi Kölliker dhe gruaja e tij Marita po e mbyllin biznesin, tani në brezin e gjashtë. Të katër degët do të mbyllen deri në fund të korrikut.

Dega kryesore në Ludretikonerstrasse në Thalwil u mbyll në fund të qershorit. Vendndodhjet e tjera në Gattikon ZH, Oberrieden ZH dhe në Gotthardstrasse në Thalwil do të pasojnë më 27 korrik.

https://www.blick.ch/wirtschaft/vier-filialen-gehen-zu-legendaerer-koelli-beck-schliesst-nach-190-jahren-fuer-immer-id21036004.html

Njësia e depozitimit të mbeturinave në Kreuzlingen digjet

Posted on by Drin Reçica

Një zjarr shpërtheu në një impiant për asgjësimin e mbeturinave në Kreuzlingen, përcjell albinfo.ch.

Për shkak të tymit të dendur, banorëve u kërkohet të mbajnë dritaret dhe dyert e mbyllura.

Policia Kantonale e Thurgau konfirmoi zjarrin. Departamenti i zjarrfikësve është në vendngjarje.

https://www.srf.ch/news/schweiz/vollbrand-im-thurgau-entsorgungsanlage-in-kreuzlingen-brennt

Parlamenti Evropian e miratoi raportin për Maqedoninë

Posted on by Drin Reçica

Bëhet e ditur se me 461 vota për, 121 kundër dhe 107 abstenime, Parlamenti Evropian e miratoi raportin për Maqedoninë, por nga ai u fshinë identiteti dhe gjuha maqedonase, përcjell albinfo.ch.

Para votimit të amendamenteve të propozuara nga eurodeputetët bullgarë, me të cilat kërkohej heqja e këtyre elementeve nga teksti, ishte siguruar shumica e nevojshme nga tre partitë më të mëdha, gjë që bëri që amendamentet të miratohen. Debati për raportin u zhvillua mbrëmë, ku raportuesi Thomas Waitz kërkoi përkrahje për Maqedoninë.

“A janë ata partnerë të besueshëm për ne? Po, marrin pjesë 100 për qind në politikën tonë të përbashkët të jashtme dhe të sigurisë. Dhe ajo që po themi është se ky vend ka një potencial të madh dhe ky raport është një hap përpara drejt anëtarësimit në BE”, tha Thomas Waitz, raportues për Maqedoninë.

Eurodeputetja sllovene me prejardhje maqedonase, Irena Joveva, me një ton të ashpër iu drejtua deputetëve bullgarë në gjuhën maqedonase, duke u thënë se për ekzistencën e popullit, gjuhës dhe identitetit maqedonas nuk u duhet leja e tyre.

“Gjuha maqedonase është autentike, përpjekjet tuaja janë fiksione moderne. Identiteti që ka mbijetuar shekuj nuk do të zhduket për shkak të një votimi apo lobimi tuaj. Për të ekzistuar populli maqedonas nuk i duhet leja juaj, por juve për ta pranuar këtë ju nevojitet ndershmëri, integritet dhe guxim. E di”, shtoi Irena Joveva, eurodeputete nga Sllovenia.

“Dua t’i drejtohem shoqërisë maqedonase. Mickoski po ju gënjen. Futja e bullgarëve në të gjitha pjesët relevante të Kushtetutës dhe respektimi i Marrëveshjes me Bullgarinë nga viti 2017, si dhe korniza negociuese, nuk do ta cenojnë identitetin tuaj. Çdo shtyrje e reformave për të filluar negociatat e anëtarësimit do ta bëjë pikërisht këtë”, shtoi Ivajllo Valçev, eurodeputet nga Bullgaria.

Duke komentuar zhvillimet rreth raportit për Maqedoninë në Parlamentin Evropian, presidentja Gordana Siljanovska-Davkova tha se Bashkimi Evropian ka një problem serioz me demokracinë.

Bllokohet rruga Shkup – Hani i Elezit

Posted on by Drin Reçica

Është bllokuar të mërkurën rruga Shkup – Hani i Elezit si pasojë e zjarreve ka njoftuar Qendra Kombëtare për Menaxhim Kufitar, përcjell albinfo.ch.

“Ju informojmë bazuar në informatën e pranuar nga pala e RMV, rruga Shkup Hani i Elezit është bllokuar për të gjitha automjetet për shkak të zjarrit në afërsi të tunelit në Republikën e Maqedonisë së Veriut. Për çdo informatë shtesë do t’u njoftojmë me kohë”, thuhet në njoftim.

Çmimet e pasurive të paluajtshme në Zvicër vazhdojnë të rriten

Posted on by Drin Reçica

Sipas Raiffeisen Bank, çmimet për shtëpitë njëfamiljare në shitje në Zvicër u rritën me 1.5 përqind, ndërsa kostoja e apartamenteve u rrit me 1.8 përqind nga prilli deri në qershor 2025, përcjell albinfo.ch.

Rajonet jugore dhe qendrore të vendit panë rritjen më të madhe – 7 përqind – ndërsa rajoni i Liqenit të Gjenevës, zakonisht ndër më të shtrenjtët, u godit vetëm nga një rritje prej 2 përqind.

Edhe në Zvicrën qendrore, çmimet e shtëpive u rritën me 5.9 përqind dhe me 4.8 përqind në kantonet lindore.

Kriminelë nga Franca vazhdojnë të vjedhin makina në Zvicër

Posted on by Drin Reçica

Për disa javë, hajdutët francezë, përfshirë të mitur, kanë vjedhur automjete nga shitësit në Zvicrën gjermane dhe frëngjishtfolëse, përcjell albinfo.ch.

Këto vjedhje ndonjëherë rezultojnë në ndjekje makinash si në Hollywood.

Hajdutët “nuk hezitojnë të marrin rreziqe dhe të rrezikojnë përdoruesit e rrugës dhe forcat e policisë kur ndërhyjnë”, tha David Guisolan, toger i parë në policinë kantonale të Vaud, për transmetuesin publik RTS.

Këtë vit ka pasur rritje të numrit të vjedhjeve nga shtetasit francez në shtetin e Zvicrës.

Dyndje për të blerë banesa në Cyrih, tregu nën presion

Posted on by Drin Reçica

Në qytetin e Cyrihut, rreth 30,000 apartamente lirohen çdo vit. Megjithatë, ato mbeten në treg vetëm për një kohë të shkurtër, përcjell albinfo.ch.

Për të blerë një para se ta bëjë dikush tjetër, “duhet të veprosh shpejt”, tha eksperti i pasurive të paluajtshme Donato Scognamiglio.

Një metodë e provuar: “Disa njerëz skanojnë njoftime vdekjesh çdo ditë”, tha ai.

“Ata shënojnë adresat e të ndjerit, mësojnë për pronarin e pronës në regjistrin e tokës dhe aplikojnë pa e parë as apartamentin”.

Metoda funksionon “çuditërisht mirë”, shtoi ai.

Zvicra pret me 1 gusht vendimin e SHBA-së për tarifat

Posted on by Drin Reçica

Këtë javë, Presidenti Trump publikoi më shumë se një duzinë letrash drejtuar disa vendeve me informacion të ri tarifor.

Megjithatë, Zvicra nuk ishte njëra prej tyre, përcjell albinfo.ch.

Afati i fundit për lëshimin e tarifave të reja doganore për eksportet me destinacion SHBA-në pritej sot, por Trump e shtyu atë për më 1 gusht.

Deri atëherë, një tarifë prej 10 për qind mbetet në fuqi për Zvicrën, shumë larg nga 31 për qind që SHBA-të kishin kërkuar fillimisht.

Megjithatë, rrethet politike dhe ekonomike zvicerane besojnë pothuajse unanimisht se vendi do të kursehet nga një katastrofë doganore.

“Amerikanët e kanë kuptuar se Zvicra nuk është vendi i duhur për t’u marrë si shembull”, tha Rahul Sahgal, drejtor i Dhomës së Tregtisë Zvicerano-Amerikane. Ministri i Ekonomisë Guy Parmelin tha se edhe ai është “mjaft i sigurt” në këtë drejtim.

Përfundon seanca ndaj pesë zyrtarëve policorë për rastin e Agon Zejnullahut

Posted on by Drin Reçica

Ka përfunduar seanca për pesë zyrtarët policorë në Lipjan që dyshohen për vdekjen e Agon Zejnullahut, përcjell albinfo.ch.

Së shpejti pritet të merret vendimi për ta nga gjyqtari i procedurës paraprake.

Po ashtu, është bllokuar rruga derisa të njëjtit kanë dalë nga Gjykata në Lipjan.

Avokati i njërit prej policëve, Besnik Berisha, ka thënë se i vetmi argument për caktimin e paraburgimit është acarimi i raporteve mes të dyshuarve dhe familjarëve të Agon Zejnullahut.

“Argumenti i vetëm i Prokurorisë për caktimin e masës së paraburgimit është se familja janë shumë të acaruar dhe në rast të mbrojtjes në liri mund të ketë ndonjë incident tjetër mes familjes dhe policëve. Ky argument nuk vlen dhe duhet pritur raporti i IML-së për të kuptuar shkaktarët e vdekjes së 27-vjeçarit”, ka thënë ai para mediave.

Gjykata ende nuk ka njoftuar për caktimin e masës së paraburgimit ndaj të dyshuarve.

Të gjitha vendimet që mori Qeveria në detyrë në mbledhjen e sotme

Posted on by Drin Reçica

Qeveria në detyrë e Republikës së Kosovës ka mbajtur mbledhjen e 264-të, në të cilën ka marrë një sërë vendimesh.

Në këtë mbledhje janë ndarë 580 mijë euro për bashkëfinancimin e projektit për ndërtimin e Shkollës së Muzikës dhe Muzeut të Preshevës.

Janë rialokuar 1.2 milion euro për 10 projekte kapitale në 10 komuna: Dragash, Ferizaj, Gjakovë, Han i Elezit, Klinë, Mitrovicë, Podujevë, Shtime, Prizren dhe Mamushë. Kjo mbështetje për komunat vazhdon në kuadër të Programit për Zhvillim Rajonal 2025, për nxitjen e zhvillimit të balancuar dhe të qëndrueshëm social e ekonomik brenda rajoneve.

Është miratuar nisma për lidhjen e Marrëveshjes së Grantit ndërmjet Republikës së Kosovës, e përfaqësuar nga Ministria e Financave, Punës dhe Transfereve, dhe Asociacionit Ndërkombëtar për Zhvillim, për Grantin për Përgatitjen e Projektit “Programi, Nxitja dhe Levimi i Mundësive për Sigurinë e Ujit, Faza 2”. Ky grant ka për qëllim të ndihmojë Qeverinë në zhvillimin e një kornize rregullatore kombëtare për digat. Asistenca teknike e projektit siguron që Kosova të jetë e përgatitur në mënyrë strukturore për zbatimin dhe mbikëqyrjen e sigurisë së digave, në përputhje me praktikat e mira ndërkombëtare. Financimi total i grantit është 1 milion dollarë dhe zbatuese e projektit do të jetë Ministria e Mjedisit, Planifikimit Hapësinor dhe Infrastrukturës.

Është aprovuar kërkesa e Ministrisë së Kulturës, Rinisë dhe Sportit për të transferuar mjete buxhetore në vlerë prej 712 215 euro për mbulimin e obligimeve sipas Memorandumit të Mirëkuptimit ndërmjet MKRS-së dhe Federatës së Volejbollit, Komitetit Olimpik të Kosovës.

Janë ndarë 2 milionë euro për të mbështetur punësimin e qytetarëve të komuniteteve joshumicë në tërë vendin, në kuadër të Masës 1.9, mbështetja e punësimit të personave nga komunitetet joshumicë të Pakos së Ringjalljes Ekonomike.

Eksperimenti me dy javë pa internet në telefon, ndikon pozitivisht në shëndetin mendor

Posted on by Drin Reçica

Mungesa e internetit dhe shkëputja nga dieta mediatike, qoftë edhe për një periudhë të shkurtër, mund të ndikojë pozitivisht në shëndetin mendor.

Kur individët largohen nga rrjedha e vazhdueshme e informacionit, lajmeve shpesh negative dhe presionit të rrjeteve sociale, ata përjetojnë një ndjenjë çlirimi mendor dhe reduktim të stresit.

Kjo shkëputje ndihmon në përmirësimin e përqendrimit, rrit vetëdijen për ndjenjat personale dhe krijon hapësirë për pushim emocional. Studime të ndryshme kanë treguar se edhe një “detoks digjital” disa ditor mund të ulë ndjeshëm ankthin dhe të përmirësojë gjumin, duke kontribuar kështu në një mirëqenie më të qëndrueshme mendore.

Në një kohë kur e gjithë bota është e mbërthyer pas ekranit, një studim i fundit vjen si një fllad ndryshe: dy javë pa internet në telefon mjaftojnë për të përmirësuar ndjeshëm shëndetin mendor, gjumin dhe disponimin emocional, përcjell albinfo.ch.

Në vend që të shohim në TikTok për zgjidhje të ankthit, ndoshta çelësi është thjesht të fikim internetin për një kohë.

Një eksperiment i realizuar nga Universiteti i Loughborough në Britani, i publikuar në BMC Medicine, përfshiu 111 të rinj që u ndanë në dy grupe. Grupi i parë uli përdorimin e internetit në telefon në më pak se dy orë në ditë për tre javë. Rezultatet ishin befasuese: niveli i depresionit ra ndjeshëm, stresi u reduktua dhe cilësia e gjumit u përmirësua dukshëm.

Po pse funksionon kjo?

Kur përdorim internetin në telefon pa pushim, truri ynë ekspozohet ndaj një rrufeje të pandalshme stimujsh, krahasimesh dhe shpërqendrimesh. Kjo sjell një rritje të kortizolit, hormonit të stresit, dhe krijon varësi psikologjike. Duke shkëputur veten nga ky rrjet virtual për dy javë, trupi dhe mendja kthehen në një gjendje më të natyrshme dhe të qetë.

Pjesëmarrësit raportuan se kishin më shumë kohë për gjëra reale: për të lexuar libra, për të bërë ecje në natyrë, për të biseduar me familjen apo për t’u marrë me hobi të harruara. Një tjetër studim nga Gjermania vërtetoi se ky ndryshim sjell rritje të fokusit, kreativitetit dhe vetëbesimit personal.

Pra, a është koha që të provojmë të njëjtin eksperiment? Po. Vendos për dy javë të kufizosh internetin në telefon dhe shëno çdo ditë si ndihesh. Mund të zbulosh se mirëqenia jote ka më pak lidhje me lajmet, mesazhet dhe rrjetet sociale, dhe shumë më tepër me përvojat e heshtura që të rrethojnë. Ky është një ritual i thjeshtë, pa kosto, por me ndikim që zgjat shumë më tepër se dy javë. Dhe në fund, ndoshta s’do të kthehesh më te vesi i vjetër i scroll-it pafund. /TAR

Lansohet fushata në Kosovë: Festo me zemër, jo me armë

Posted on by Drin Reçica

Në mesin e gëzimeve që sjellin festat familjare dhe ahengjet tradicionale, shpeshherë harrohet një aspekt thelbësor: siguria. Për Republikën e Kosovës, siguria e qytetarëve të saj është ndër prioritetet më të larta, një përkushtim i përditshëm për të ndërtuar dhe ruajtur një ambient të sigurt për të gjithë, brenda dhe jashtë vendit.

Me këtë synim, Ministria e Punëve të Brendshme ka lansuar fushatën ndërgjegjësuese “Festo me zemër, jo me armë!” për të ngritur vetëdijen rreth rrezikut që sjell përdorimi i armëve të zjarrit, veçanërisht gjatë festave. Kjo fushatë synon të ndalë një praktikë të rrezikshme që, përkundër se shpesh konsiderohet pjesë e traditës, ka pasur pasoja të dhimbshme për shumë familje. Përmes kësaj nisme, qytetarët ftohen të festojnë me zemër e me dashuri, jo me armë. Përmes aktiviteteve të ndryshme, fushata synon të ndikojë në vetëdijen kolektive duke e kthyer fokusin te gëzimi i pastër, pa rrezik dhe pa pasoja.

Ky mesazh është i rëndësishëm edhe për bashkatdhetarët tanë në diasporë, të cilët, ndonëse jetojnë larg Kosovës, mbeten thellësisht të lidhur me vendlindjen e tyre. Në shumë raste, ata janë pjesë e festave familjare kur kthehen në atdhe, ndaj ftesa për vetëdijesim dhe përgjegjësi u drejtohet edhe atyre. Me ndikimin e tyre në familje, lagje e komunitet, ata mund të jenë promotorë të sjelljes së re dhe shembull për të tjerët.

Qasja e fushatës përfshin disa objektiva kyçe:
• ndërgjegjësimin e publikut për rreziqet që sjell përdorimi i armëve;
• nxitjen e bashkëpunimit qytetar për të raportuar rastet e të shtënave me armë;
• forcimin e partneritetit me komunitetin, përfshirë organizatat lokale, bashkësitë fetare, mediat, gastronominë dhe shoqërinë civile, për të krijuar një front të përbashkët kundër kësaj dukurie.

Synimi i MPB-së dhe agjencive të saj është i qartë: të zvogëlohet numri i incidenteve me armë gjatë festave dhe të ndërtohet një kulturë e përgjegjshme dhe e sigurt për të gjithë qytetarët tanë.

Aktivitetet e fushatës janë mbështetur nga UNDP-ja dhe fondi i mirëbesimit MPTF, respektivisht nga Gjermania, Suedia, Holanda, Franca, Mbretëria e Bashkuar, Norvegjia dhe BE. Me qëllim që të gjitha mesazhet tona të jenë, përveç informuese, edukative dhe paralajmëruese, edhe kreative e origjinale, kompania zvicerane-kosovare Add-ing Sàrl nga Gjeneva na ka ndihmuar me ekspertizën e saj si dhe me komunikimin e shkëlqyeshëm dhe këshillimin gjatë tërë pjesës parapërgatitore.

Blerim Gashani – zëvendësministri i MPB-së

“Festo me zemër, jo me armë!” nuk është vetëm një slogan , është një thirrje për reflektim, për respekt ndaj jetës dhe për ndërtimin e një shoqërie ku gëzimi nuk ka nevojë të shprehet me rrezik. Është një mesazh që tejkalon kufijtë dhe që duhet të përqafohet nga të gjithë qytatarët tanë, kudo që ndodhen.

Ka ushtruar dhunë mbi gruan: Kosovari lejohet të qëndrojë në Gjermani, për shkak të martesës!

Posted on by albinfo.ch

Një shkelës i dhunshëm nga distrikti i Northeimit nuk mund të deportohet në Kosovë. Shkelësi recidivist kishte ngritur një padi kundër deportimit që i kanosej nga distrikti në fjalë.

Megjithatë, duke pasur parasysh të dhënat e tij penale, gjyqtarët e Göttingenit (shkalla e parë) nuk panë asnjë arsye për t’i dhënë atij mbrojtje të përkohshme ligjore, transmeton albinfo.ch. Kjo do të siguronte që ai të mund të qëndronte deri në përfundim të procedurës kryesore. Por gjyqtarët e Lüneburgut (shkalla e dytë) mbajtën një qëndrim tjetër, më favorizues.

Si argument për qëndrimin e tij të përkohshëm në Gjermani, ata përmendën faktin se gruaja e tij tashmë ka një qëndrim të gjatë në këtë vend. Prandaj, do të ishte e paarsyeshme që ajo të hiqte dorë nga shtëpia e saj këtu, përfshirë punësimin e saj të sigurt, dhe të vazhdonte martesën në Kosovë, shkruan msn.com/de. Në procedurën kryesore duhet të sqarohet nëse është e arsyeshme dhe e mundur jo vetëm për aplikantin, por edhe për gruan e tij, të largohen nga Gjermania në mënyrë që të jenë në gjendje të vazhdojnë marrëdhënien e tyre martesore në atdheun e përbashkët, thuhet në vendim.

Gjyqtarët këmbëngulin në mbrojtjen e martesës

Gjyqtarët e Lüneburgut as nuk e përmendin faktin se 50-vjeçari ka qenë jashtëzakonisht i dhunshëm në këtë martesë, të cilën ata e konsiderojnë të denjë për mbrojtje. Në vend të kësaj, ata supozojnë në heshtje se gruaja e abuzuar synon ta vazhdojë martesën. Fakti që e drejta për integritet fizik në Ligjin Bazë ka përparësi mbi mbrojtjen shtetërore të martesës gjithashtu nuk merret parasysh në vendimin e tyre.

Ndryshe nga paditësi, gruaja e tij ka një leje qëndrimi të përhershme që i lejon asaj të qëndrojë në Gjermani për një kohë të pacaktuar. Gjykata Administrative e Göttingenit tani duhet të vendosë në procedurën kryesore nëse burri i saj, i cili është dënuar shumë herë për krime të dhunshme, mund të vazhdojë të qëndrojë në Gjermani apo duhet të kthehet në Kosovë, përcjell albinfo.ch.

Sipas Gjykatës Administrative të Göttingenit, 50-vjeçari kishte kryer krime të rënda në vitin 1996, vetëm pesë vjet pasi kishte hyrë në Gjermani, dhe ishte dënuar me tre vjet e nëntë muaj burg.

Ai gjithashtu kishte tërhequr vëmendjen përmes shpërthimeve masive të dhunës kundër anëtarëve të familjes nga martesa e mëparshme, kur nuk kishte ngurruar ta përdorte makinën e tij si armë.

Shpërthime dhune në të dyja martesat

Në vitin 2020, 50-vjeçari u martua përsëri dhe u tregua i dhunshëm edhe në këtë martesë. Në mars të vitit 2022, Gjykata e Qarkut në Northeim i dha atij një dënim me dymbëdhjetë muaj burg, i cili u shndërrua në burg me kusht.

Sipas aktakuzës, 50-vjeçari ishte grindur me gruan e tij të re, e cila ishte gjithashtu nga Kosova, në një parking për shkak të xhelozisë. Ai dyshohet se e kishte kafshuar në parakrah, e kishte kapur për flokësh dhe e kishte zvarritur deri te stacioni më i afërt i autobusit. Atje ia kishte përplasur kokën në një shtyllë. Gjithashtu e kishte goditur me grusht në fytyrë të paktën dy herë dhe i kishte përplasur gjurin në bark tri herë, duke e bërë atë të rrëzohej nga dhimbja. Pastaj e kishte lëshuar vetëm kur kishte ndërhyrë një dëshmitar.

50-vjeçari e kishte bazuar kërkesën e tij për mbrojtje të përkohshme ligjore kundër kërcënimit të dëbimit, ndër të tjera, në lidhjet e tij familjare në Gjermani. Gjykata Administrative e Göttingenit e gjeti këtë argument të pabesueshëm. Në fund të fundit, fëmijët e tij të rritur nga martesa e mëparshme kishin jetuar në një rreth tjetër që nga viti 2007 dhe nuk kishin kontakt me të.

50-vjeçari më pas paraqiti një ankesë në Gjykatën e Lartë Administrative të Lüneburgut dhe pati sukses. Gjyqtarët e Lüneburgut urdhëruan efektin pezullues të veprimit të tij. Ata e justifikuan këtë, ndër të tjera, duke argumentuar se vendimit të rrethit Northeim i mungonte fjala “diskrecion”. Ndërsa theksonte nevojën për të balancuar interesin privat për të qëndruar në Gjermani me interesin publik për të ndërprerë menjëherë lejen e qëndrimit, ajo gjykatë thjesht kishte identifikuar interesat në konflikt, por nuk kishte kryer ushtrimin e balancimit si të tillë.

Gjermania regjistron numër rekord banorësh

Posted on by Drin Reçica

Autoritetet gjermane thonë se rritja nuk ka ardhur nga lindjet, por nga emigrantët. Megjithatë, numri i vdekjeve ende e tejkalon numrin e lindjeve, përcjell albinfo.ch.

Vlen të theksohet se në fund të vitit 2024, në Gjermani jetonin gati 83.6 milionë njerëz, më shumë se kurrë më parë. Krahasuar me vitin e kaluar, popullsia u rrit me 121 mijë njerëz, ose me 0.1 për qind, sipas njoftimit për shtyp të Zyrës Statistikore gjermane Destatis.

Megjithatë, rritja u ngadalësua, sepse një vit më parë ajo arriti në 338 mijë njerëz të tjerë, ose 0.4 për qind.

Edhe pse një shifër prej rreth 84 milionë banorësh ishte publikuar tashmë në vitin 2022, regjistrimi i popullsisë i të njëjtit vit, një anketë e madhe statistikore që përfshin numrin e banorëve, tregoi se vlerësimi i mëparshëm ishte tepër i lartë. Pastaj numri i banorëve u korrigjua në 82.7 milionë. Zyra Statistikore gjermane llogarit popullsinë në bazë të të dhënave zyrtare mbi lindjet dhe vdekjet.

Ende shumë më tepër të vdekur sesa foshnje

Të dhënat e përkohshme mund të shërbejnë si orientim, megjithëse korrigjimet janë ende të mundshme. Sipas këtyre shifrave të përkohshme, do të ketë një numër më të madh të vdekjeve prej 330 mijë në vitin 2024, afërsisht i njëjtë me vitin e kaluar. /DW

https://www.dw.com/sq/gjermani-numër-rekord-banorësh/a-73194989

Rekord pas rekordi, sukseset e Kosovare Asllanit

Posted on by Drin Reçica

Futbollistja shqiptare shkëlqeu të martën mbrëma, derisa si kapitene e udhëhoqi Suedinë drejt fazës nokaut në Evropianin e futbollisteve, përcjell albinfo.ch.

Në Luzern, në praninë e 14 mijë shikuesve, Suedia fitoi 3:0 ndaj Polonisë për të avancuar në çerekfinale. Asllani, 35-vjeçare, asistoi në golin e parë dhe shënoi në të dytin.

Për të ishte paraqitja e 201-të me Suedinë dhe goli i 49-të. Ajo ka vendosur disa rekorde në paraqitjen e saj impresive ndaj polakeve.

Është bërë lojtarja e parë e Suedisë që ka shënuar në katër kampionate të ndryshme evropiane. Kishte shënuar edhe në Euro 2009, Euro 2013 dhe Euro 2022.

Me 35 vjet e 344 ditë, Asllani është lojtarja më e vjetër që ka shënuar gol për Suedinë në ndonjë Evropian.

Po ashtu, është lojtarja e parë e Suedisë që ka bërë 20 paraqitje në Kampionate Evropiane.

“Është e veçantë, por aktualisht po mendoj vetëm për fitoren. Tani duhet të pushojmë, të rikuperohemi dhe të fokusohemi në ndeshjen e së shtunës. Por gjithnjë është e veçantë të shkruash histori”, ka thënë Asllani për sajtin zyrtar të UEFA-s.

Të shtunën në Zurich, Suedia luan ndaj Gjermanisë për vendin e parë në grup. Edhe Gjermania ka fituar dy ndeshjet e para dhe është kualifikuar në çerekfinale. Suedisë i mjafton barazimi për ta fituar grupin.

Ndaj Polonisë, të tre golat e Suedisë u shënuan me goditje me kokë.

“Nuk ndodh shpesh të shënoj me goditje me kokë. Ishte gol i bukur. Një fitore e mirë dhe angazhim i mirë ekipor. Tani mund të jemi plotësisht të fokusuara te ndeshja me Gjermaninë dhe që ta fitojmë grupin”, ka shtuar Asllani.

Ajo i është bashkuar një grupi shumë të vogël të lojtareve me mbi 200 ndeshje me përfaqësuese.

Në minutën e 30-të të ndeshjes ndaj Polonisë, Asllani u ndëshkua me karton të verdhë. Bëhet fjalë për një duel me lojtaren e Polonisë, Ewa Pajor.

“Plotësisht e pakuptueshme. Unë u tërhoqa e para dhe është dashur të ketë faull ndaj meje. Nuk kuptoj asgjë. Isha shumë e nervozuar”, ka thënë futbollistja me prejardhje nga Mitrovica.

Kurti kërkon hetim profesional për rastin në Lipjan: Lajmi për vdekjen e tij na ka tronditur

Posted on by Drin Reçica

Kryeministri në detyrë Albin Kurti është deklaruar lidhur me rastin e vdekjes së 27-vjeçarit në duart e policëve në Lipjan, përcjell albinfo.ch.

Kurti, në mbledhjen e qeverisë, tha se duhet hetim profesional nga institucionet.

“Fillimisht dua t’i shpreh ngushëllime familjes Zejnullahu për të ndjerin Agon Zejnullahu. Lajmi për vdekjen e tij na ka tronditur të gjithëve.

Shumëçka prej asaj që ka ndodhur është publike falë incizimeve të dëshmitarëve. Por, për të kuptuar gjithçka, duhet hetim profesional nga institucionet. Për këtë, bashkëpunimi mes Policisë, Inspektoratit Policor, IML-së dhe Prokurorisë është thelbësor. Pesë zyrtarë policorë janë në paraburgim. Unë kërkoj dhe pres hetim të thellë e të shpejtë që zbardh të vërtetën e plotë dhe i bën të njohura të gjitha rrethanat, ashtu që të vendoset drejtësia”, tha Kurti.

Tutje, ai e quajti të dëmshme, siç tha, tendencën për të nisur një anti-fushatë ndaj policisë.

“Dua të bëj të qartë se nuk do të ketë strehë në institucione për këdo që mund të ketë tejkaluar kompetencat apo shkelur ligjin. Shërbimi në uniformë është fisnikëri, por autoriteti është përgjegjësi. Diskutimet publike dhe gjykimet publike janë veçanërisht të vështira për familjen Zejnullahu dhe miqtë e të ndjerit. Tendenca për të nisur një anti-fushatë ndaj Policisë është e dëmshme. Thirrjet për drejtësi dhe përgjegjësi janë të drejta, por ato më së miri realizohen me rezultatet e plota të hetimeve. Vetëm atëherë sigurohemi për llogaridhënien ndaj rastit, që situata të ngjashme të mos na përsëriten”, tha ai.