Organizatat e dala nga lufta organizojnë sot në orën 17:00 në Prishtinë një protestë gjithëpopullore kundër, siç thuhet, mbajtjes së padrejtë në paraburgim të ish-krerëve të Ushtrisë Çlirimtare të Kosovës në Hagë.

Një ditë para protestës kundër padrejtësisë, në mbështetje të ish-krerëve të Ushtrisë Çlirimtare të Kosovës që po gjykohen në Hagë, zyrtarë të Organizatës së Veteranëve të Luftës (OVL – UÇK) bënë të ditur se janë ndërmarrë të gjitha hapat për organizimin e protestës, përfshirë koordinimin me qytetarët dhe organizimin e transportit.

“Kemi komunikuar me strukturat tona dhe me shumë qytetarë. Për ata që dëshirojnë të marrin pjesë në protestë me autobusë, kemi vendosur që parkingu ‘Prishtina’, pranë Pallatit të Rinisë, do të jetë i gatshëm për pritjen e tyre”, deklaroi Gazmend Syla, nënkryetar i OVL – UÇK-së.

Syla theksoi rëndësinë e pjesëmarrjes së qytetarëve në këtë protestë për të shprehur mbështetjen ndaj bashkëluftëtarëve të cilët, sipas tij, po gjykohen padrejtësisht në Hagë.

“Shfrytëzoj rastin t’i ftoj të gjithë qytetarët që bashkëndjejnë me ne dhe me ata bashkëluftëtarë që sot padrejtësisht po gjykohen në Hagë, të marrin pjesë në protestë. Të dërgojmë një mesazh të qartë jo vetëm për ta, por edhe për bashkësinë ndërkombëtare, se ata nuk janë vetëm. Ne do të jemi gjithmonë të gatshëm të dalim në mbështetje sa herë që kërkohet nevoja”, shtoi Syla.

Protesta është paralajmëruar si një tubim paqësor, me moton “Kundër padrejtësisë”, për të dëshmuar solidaritetin me liderët e UÇK-së që ndodhen në paraburgim në Hagë.

Protesta ka gjetur mbështetje të madhe nga të gjithë faktorët relevantë shqiptarë, përfshirë partitë politike, deputetët, organizatat joqeveritare dhe qytetarë të shumtë.

Ish-krerët e UÇK-së: Hashim Thaçi, Kadri Veseli, Jakup Krasniqi dhe Rexhep Selimi – ndodhen në paraburgim në Hagë që nga nëntori i vitit 2020. Ata akuzohen për krime lufte, për të cilat janë deklaruar të pafajshëm për të gjitha pikat e aktakuzës.

Në një letër zyrtare të datës 4 gusht 2025, ish-Presidenti i Shteteve të Bashkuara të Amerikës, Donald J. Trump, ka shprehur mirënjohjen e tij për Presidenten e Republikës së Kosovës, Vjosa Osmani, për, siç thuhet në letër, “ndihmën e jashtëzakonshme në pranimin e qytetarëve nga vende të tjera jashtë Kosovës”, transmeton albinfo.ch.

Trump e vlerëson këtë veprim si një dëshmi të përkushtimit të fortë të Kosovës ndaj partneritetit me SHBA-në dhe thekson:

“Lidershipi juaj në këtë çështje është një dëshmi e forcës dhe dhembshurisë së popullit kosovar.”

Në letrën e tij, ish-presidenti amerikan thekson miqësinë dhe aleancën e fortë mes dy vendeve, të ndërtuar mbi respekt të ndërsjellë, vlera demokratike të përbashkëta dhe një vizion për një të ardhme paqësore dhe të begatë.

“Faleminderit sërish për udhëheqjen tuaj të guximshme dhe për qëndrimin tuaj si mike e vërtetë e Shteteve të Bashkuara. Mezi pres të punoj ngushtë me ju në vitet që vijnë,” thuhet në letër.

Reagimi i Presidentes Osmani: Kosova do të qëndrojë gjithmonë krah SHBA-së

Menjëherë pas publikimit të letrës, Presidentja e Kosovës, Vjosa Osmani, ka reaguar përmes një postimi publik, duke falënderuar ish-presidentin Trump për përkrahjen dhe përkushtimin ndaj marrëdhënieve ndërmjet dy vendeve:

“Faleminderit Presidentit Trump për përkrahjen e tij, si dhe për fjalët e fuqishme për partneritetin me Kosovën.

Kosova do të vazhdojë të qëndrojë krah për krah me SHBA-të, në çdo sfidë e çdo sukses.

Mbetem e përkushtuar të punojmë së bashku me Presidentin Trump për ta thelluar edhe më tej aleancën tonë në vitet që vijnë.”

Letra dhe reagimi i Presidentes Osmani vijnë në një periudhë kur roli i SHBA-ve në Kosovë mbetet kyç për sigurinë, zhvillimin dhe pozicionimin ndërkombëtar të vendit. /Albinfo.ch

Që nga sot, e mërkurë, 7 gusht 2025, produktet që eksportohen nga Kosova drejt Shteteve të Bashkuara të Amerikës do të përballen me tarifë prej 10 për qind, si pasojë e vendimit të administratës amerikane për vendosjen e tarifave gjithëpërfshirëse ndaj më shumë se 90 vendeve, transmeton albinfo.ch.

Ky vendim, i marrë fillimisht në prill të këtij viti nga presidenti amerikan Donald Trump, ka hyrë tashmë në fuqi dhe prek edhe eksportet kosovare, të cilat deri më tani nuk ishin subjekt i një tatimi të tillë.

Kosova ndër shtetet me tarifën më të ulët në rajon

Ndonëse tarifa e re konsiderohet si masë e reciprocitetit nga ana e SHBA-së, Kosova mbetet në një pozitë më të favorshme krahasuar me disa vende të rajonit. Për shembull, Serbia përballet me tarifë prej 35%, ndërsa për Kosovën ajo mbetet në nivelin 10%.

Kjo tarifë do të thotë se të gjitha kompanitë që eksportojnë mallra nga Kosova në tregun amerikan, do të duhet të paguajnë këtë takësë doganore, duke ndikuar drejtpërdrejt në koston dhe konkurrueshmërinë e produkteve.

Mungesa e marrëveshjes për tregti të lirë

Aktualisht, Kosova nuk ka marrëveshje bilaterale për tregti të lirë me SHBA-në, çka e lë të pambrojtur nga vendime të tilla të njëanshme tarifore. Megjithëse Qeveria e Kosovës më 1 gusht hoqi tarifën 10% për importet nga SHBA, pala amerikane nuk ka dhënë ndonjë sinjal për heqjen reciproke të saj ndaj Kosovës.

Ambasada amerikane në Prishtinë e mirëpriti vendimin e Kosovës për heqjen e tarifës, por nuk konfirmoi nëse do të ndërmerrte hapa të ngjashëm.

Shkëmbimet tregtare me SHBA-në në rritje

Sipas të dhënave zyrtare, gjatë vitit 2024, Kosova eksportoi mallra drejt SHBA-së në vlerë prej 39 milionë euro, ndërsa importet nga SHBA në Kosovë arritën në 106.5 milionë euro,  shifra më e lartë e regjistruar ndonjëherë.

Megjithatë, vendosja e tarifës pritet të krijojë vështirësi për eksportuesit kosovarë, veçanërisht për ato kompani që mbështeten në tregun amerikan për zgjerim ekonomik dhe partneritete afatgjata.

Emisari evropian për dialogun Kosovë-Serbi, Peter Sorensen qëndroi të mërkurën për vizitë në Kosovë, përcjell albinfo.ch.

Gjatë kësaj vizite zyrtari evropian pati takime me presidenten Vjosa Osmani, kryeministrin në detyrë, Albin Kurti dhe liderë partiakë.

Pas takimeve, diplomati danez deklaroi se dialogu Kosovë-Serbi është i gjallë dhe po i bënë hapat e tij.

Pas takimeve që zhvilloi gjatë ditës, Sorensen, e bëri një postim në X në mbrëmje rreth qëndrimit në Prishtinë.

“Vizitë produktive në Kosovë sot. Në të gjitha takimet e mia, theksova nevojën urgjente për të zbatuar Marrëveshjen e Ohrit, tani më shumë se kurrë”.

“Rruga drejt integrimit kalon përmes përparimit domethënës në Dialog. Është koha për të ecur përpara”, shkroi ai, transmeton Klankosova.tv.

Organizatat e Veteranëve të Luftës së Ushtrisë Çlirimtare të Kosovës do të organizojë protestë kundër Gjykatës Speciale të enjten.

Ata janë ankuar në këtë gjykatë, pasi, sipas tyre, po synon ta rishkruajë historinë. Protesta është mbështetur edhe nga personalitete që patën ndikim në themelimin e gjykatës.

Nga zyrat e Organizatës së Veteranëve të Luftës së UÇK-së është bërë thirrje që të enjten, prej orës 17:00, të protestohet në sheshet e Prishtinës kundër drejtësisë që ndan Gjykata Speciale në Hagë.

Nënkryetari i kësaj organizate, Gazmend Syla, ka thënë se janë bërë të gjitha përgatitjet që protesta të jetë e qetë, por masive.

“Shfrytëzoj rastin t’i ftoj të gjithë ata qytetarë që bashkëndiejnë me ne, që bashkëndiejnë me ata bashkëluftëtar që sot padrejtësisht po gjykohen në Hagë, të marrin nesër pjesë në këtë protestë, në orën 17:00, në sheshin ‘Skënderbeu’, që ta dërgojmë një mesazh edhe te ta, edhe te bashkësia ndërkombëtare se bashkëluftëtarët tonë nuk janë vetëm”, ka thënë Syla.

Syla është ankuar në procesin e zhvilluar deri tash nga Gjykata Speciale në Hagë dhe ka kërkuar reagim ndërkombëtar.

“Aty po cenohet të rishkruhet historia jonë, po cenohet të rishkruhet historia e shtetndërtimit tonë, këtë shtet dihet që e kemi ndërtuar së bashku me bashkësinë ndërkombëtare. Andaj, kjo lëkund themelet e shtetit tonë, jemi duke pritur nëse ka reagim ndërkombëtar, nëse jo ne do të vazhdojmë prapë me protesta”, ka deklaruar ai.

Mbështetje kësaj proteste i ka dhënë edhe Isa Mustafa, i cili ishte kryeministër në kohën kur u themelua gjykata.

Nëpërmjet një postimi në Facebook, ai ka thënë se kur u votua për gjykatën, bashkë me Hashim Thaçin e Kadri Veselin që ndodhen duke u gjykuar në Hagë, kanë pasur besim në drejtësinë ndërkombëtare.

“Është detyrë e të gjithë neve të mbrojmë vlerat e luftës, dhe të mos lejojmë të rishkruhet historia me dëshmi të instrumenteve të pushtetit serb që ushtroi dhunë, represion dhe gjenocid në Kosovë”, ka shkruar Mustafa.

Në gusht të vitit 2015 Kuvendi votoi ndryshimet kushtetuese që i hapën rrugë themelimit të Dhomave të Specializuara. Atëkohë vendi qeverisej nga koalicioni PDK-LDK.

Mustafa mbante postin e kryeministrit, Veseli të kryeparlamentarit, e Thaçi të ministrit të Punëve të Jashtme.

Dy procese për krime lufte kanë marrë epilog, ndërsa është në proces ai ndaj Thaçit, Veselit, Rexhep Selimit dhe Jakup Krasniqit, e të cilët ndodhen në paraburgim që nga viti 2020.

Të katërt akuzohen se, si anëtarë të Shtabit të Përgjithshëm të UÇK-së, kanë kryer krime lufte dhe krime kundër njerëzimit.

Gjatë procesit gjyqësor avokatët janë ankuar për anshmëri të gjyqtarëve, meqë u kanë shtruar pyetje orientuese dëshmitarëve.

Ndërkaq së fundmi edhe përfaqësues shtetërorë kanë thënë se gjykata nuk ka legjitimitet kushtetues, meqë ka pranuar si prova edhe dosje të hartuara nga Serbia.