Camila, Dua e Nicki fitueset kryesore në “MTV EMA 2018”

Keystone

Këngëtarja kubano-amerikane, Camila Cabello, ishte fituesja kryesore në ceremoninë e ndarjes së shpërblimeve “MTV Europe Music Awards”, e cila zuri vend të dielën mbrëma në qytetin spanjoll, Bilbao. Këngëtarja i fitoi disa prej shpërblimeve kryesore të mbrëmjes si: “Kënga më e mirë”, “Artistja më e mirë”, “Videoklipi më i mirë” dhe “Performuesja më e mirë amerikane”.

24-vjeçarja Cabello, e cila po ashtu ishte triumfuese në ceremoninë “MTV VideoMusic Awards”, e cila u mbajt në gusht të këtij viti, duket se i ka disa prej adhuruesve më të përkushtuar në botë.

Vëmendje të madhe në këtë ceremoni po ashtu mori ikona e muzikës, Janet Jackson, e cila gjatë mbrëmjes e pranoi çmimin “Global Icon”, si dhe e solli një performancë të paharruar në skenë, me ç’ rast i interpretoi disa prej hiteve më të njohura të karrierës së saj 40-vjeçare.

Ndër fituesit e tjerë të mbrëmjes ishte edhe këngëtarja me prejardhje kosovare, Dua Lipa, e cila e fitoi çmimin “Best Pop”, pastaj Shawn Mendes, i cili e fitoi çmimin “Best Live” dhe grupi “5 Seconds of Summer” e morën çmimi “Best Rock”.

Mbrëmja po ashtu u karakterizua me performancat mahnitëse të yjeve në skenë. Artistja Rosalia doli në skenë për ta interpretuar këngën e saj “Malamente”, me një veturë gjigante. Performancë të paharruar po ashtu dha bukuroshja shqiptare, Bebe Rexha, e cila e interpretoi hitin e saj “I’m a Mess”, e shoqëruar në skenë nga 100 valltarë.

Halsey po ashtu e dha maksimumin në skenë, duke e interpretuar këngën “Without Me” brenda një shiu të improvizuar.

Ceremonia u hap me performancën e Nicki Minajt, e cila e interpretoi hitin e saj të ri “Good Form” e përcjell pastaj nga grupi Little Mix, me të cilat e interpretuan këngën “Woman Like Me”.

Minaj po ashtu, u nderua gjatë mbrëmjes, duke i marrë çmimet “Best Look” dhe “Best Hip-Hop.”