Bie nga ndërtesa, vdes një person në Prishtinë

Lartësia prej ku ka rënë burri që ishte duke punuar në ndërtesë është shtatë kate

Policia ka konfirmuar se një burrë ka mbetur i vdekur, pasi ka rënë nga një ndërtesë shumëkatëshe, ku ishte duke punuar.

“Sot në ora 17:45 kemi pranuar informacionin se një person ka rënë nga një ndërtesë në rrugën “Robert Doll” në Prishtinë. Menjëherë në vendin e ngjarjes kanë dalë njësitet e nevojshme policore dhe ekipi mjekësor, i cili në vendngjarje ka konstatuar vdekjen e viktimës mashkull”, ka thënë zëdhënësja e Policisë për Rajonin e Prishtinës, Flora Ahmeti.

Lartësia prej ku ka rënë burri që ishte duke punuar në ndërtesë është shtatë kate.

Nga informacionet e para prej punëtorëve, ai ka qenë duke i ndërruar rrobat e punës në momentin kur ka rënë.

Mjekësia ligjore është në vendin e ngjarjes ende bashkë me prokurorin e rastit.

Pronarët e objektit nuk kanë lejuar që mediat të afrohen te vendi ku ka rënë viktima, raportojnë mediat kosovare, përcjell Albinfo.ch.

---