BERZH-i, 29 milionë euro kredi Kosovës

Nënshkrimi i kësaj Marrëveshje ka për qëllim rehabilitimin e rrugëve rajonale në distancë 28.2 kilometra  

Qeveria e Kosovës dhe Banka Evropian për Rindërtim dhe Zhvillim (BERZh) kanë arritur Marrëveshjen për kredi “Rehabilitimi i Rrugëve Rajonale” në vlerë prej 29 milionë euro. Kjo marrëveshje u nënshkrua nga Ministri i Financave, Avdullah Hoti dhe përfaqësuesja e BERZH-it, Elena Petrovska.

“Nënshkrimi i kësaj Marrëveshje ka për qëllim rehabilitimin e rrugës nga Kllokoti deri në rrugën e Gjilanit (përafërsisht 17 km), përmirësimin e rrugës hyrëse të qytetit të Ferizajt (përafërsisht 5.6 km), përmirësimin e rrugës hyrëse në qytetin e Gjilanit (përafërsisht 2.9 km), si dhe përmirësimin e rrugës hyrëse në qytetin e Prizrenit (rreth 2.7 km)”, thuhet në njoftimin e qeverisë.

Sipas Ministrisë, marrëveshja kredi në vlerë prej  29 milionë euro është me kohëzgjatje 3 vite grejs periudhë, 12 vite amortizim me këste gjysmë vjeçare, si dhe me normë të  Interesit: EURIBOR  + 1 për qind për vit.

Projekti  për Rehabilitimin e Rrugëve Rajonale pritet të përfundoj me 31 dhjetor 2018.