Bërnabiq bisedon me zyrtarë të Kinës për çështjen e Kosovës

Kryeministrja e Serbisë, Ana Bërnabiq, deklaroi se mbështetja e Kinës për Serbinë ka shumë rëndësi, në veçanti kur është në pyetje çështja e Kosovës.

Kryeministrja serbe i bëri këto komente gjatë një takimi me ministrin kinez për Çështje të Veteranëve, Sun Shaocheng. Ajo i vlerësoi marrëdhëniet ndërmjet dy vendeve si të mrekullueshme, të cilat karakterizohen nga një partneritet strategjik dhe gjithëpërfshirës.

Kina, si anëtare e përhershme e Këshillit të Sigurimit të OKB-së, është ndër vendet që nuk e ka njohur pavarësinë e Kosovës.

Ndikimi i Kinës në Ballkanin Perëndimor është rritur në periudhën e fundit, kryesisht përmes investimeve në ekonomi dhe infrastrukturë.

Presidenti i Serbisë, Aleksandar Vuçiq, ishte në mesin e pjesëmarrësve të forumit “Brezi dhe rruga” që u mbajt në Pekin në fund të muajit prill.

Kjo iniciativë 1 trilion dollarëshe e Kinës synon ndërtimin e rrugëve, porteve, hekurudhave dhe infrastrukturës energjetike që do ta lidhte Kinën me Evropën, Afrikën dhe pjesë të Azisë.

Projekti shihet me dyshim nga Shtetet e Bashkuara dhe disa vende evropiane.