Arnold Gjergjaj lufton për titull

Boksieri shqiptar, Arnold “The Cobra” Gjergjaj, zhvillon sonte meçin për titull në peshat e rënda “WBF Intercontinental Heavy”.

Me fillim nga ora 19:00, Gjergjaj bokson kundër Dominic Vial për titull, përcjell albinfo.ch.

Të interesuarit mund të gjejnë edhe 100 biletat e mbetura për të parë meçin në Grand Casino Basel.

Biletat mund t’i marrin direkt tek eventi para orës 18:00.

I lindur në Kosovë, “The Cobra” Gjergjaj (38) u bë profesionist në vitin 2009, dhe aktualisht është 34-3 (25). Në vitin 2014 ai fitoi titullin e EBU External, duke mundur 15-0 Adnan Redzovic. Ai bëri një mbrojtje të suksesshme të titullit, duke mposhtur Denis Bakhtov vitin pasues, derisa humbi titullin ndaj Umut Camkiran në Turqi në 2019, përcjell tutje albinfo.ch.

Dominic Vial sjell një rekord 9-3 (8) dhe po hyn në luftë nga një fitore me nokaut në raundin e parë ndaj meksikanit Daniel Cota dhjetorin e kaluar. 30-vjeçari nga Moenchengladbach është një ish-titullist ndërkombëtar gjerman dhe UBF International, por kjo do të jetë deri tani lufta më e rëndësishme në karrierën e tij.

Kjo do të jetë vetëm lufta e dytë e Gjergjajt pas një pushimi mes viteve 2019 dhe 2022, kështu që mbetet për t’u parë nëse ai është gati për atë që do të sjellë gjermani i ri, përcjell albinfo.ch.