Ana Brnabiq, gruaja e parë në krye të qeverisë serbe

(KEYSTONE)

Presidenti i Serbisë, Aleksandër Vuçiq, i ka dhënë mandatin për të formuar qeverinë e re Ana Brnabiq, e cila shënon një kthesë të madhe në historinë e Serbisë, pasi besnikja e Vuçiqit e ka shprehur hapur orientimin e saj seksual, raportojnë mediat në Beograd, përcjell albinfo.ch.

Brnabiq bëhet kryeministre e parë e një qeverie në Ballkan që i takon komunitetit LGBT dhe gruaja e parë në krye të qeverisë serbe.
Brnabiq do të trashëgojë në postin e saj Aleksandër Vuçiqin, i cili në muajin prill u zgjodh president i Serbisë. Parlamenti 250 vendesh do të debatojë javën që vjen kandidaturën e zonjës Brnabiq. Partia e presidentit përbën shumicën në parlament dhe së këndejmi, votimi duket më shumë një veprim formal.

Kandidimi i zonjës Brnabiq nxiti kritika të konservatorëve, përfshirë edhe disa nga aleatët e Vuçiqit.

Brnabiq pritet të punojë edhe për të përmirësuar marrëdhëniet e Serbisë me Kosovën, të reformojë drejtësinë, të sigurojë të drejtat e pakicave, përfshirë edhe komunitetin LBGT, të gjitha këto parakushte për anëtarësim në Bashkimin Evropian.

Ajo duhet të ruajë edhe drejtpeshimin e Serbisë ndërmjet aleatëve të vjetër, Rusisë e Kinës dhe Perëndimit, përfshirë NATO-n dhe BE-në, që është partneri më i madh tregtar i saj.