Ambasada e Zvicrës uron Shqipërinë për Ditën e Pavarësisë

Ambasada e Zvicrës në Tiranë: Shqipëria është Zvicra e Lindjes

Me rastin e 28 Nëntorit, Ditës së Pavarësisë së Shqipërisë, Ambasada e Zvicrës në Shqipëri ka përcjellë urimet më të ngrohta për popullin shqiptar, duke theksuar marrëdhëniet miqësore ndërmjet dy vendeve, përcjell albinfo.ch.

Në një mesazh urimi, Ambasada ka rikujtuar afërsinë historike e kulturore mes shqiptarëve dhe zviceranëve, duke cituar një përshkrim të veçantë për Shqipërinë:

“Ne zviceranët mund të jemi vetëm dashamirës ndaj shqiptarëve. Shqipëria është Zvicra e Lindjes. Nga aspekti fizik, nga jeta baritore e banorëve të saj, nga thjeshtësia dhe ndershmëria e tyre, nga trimëria dhe kujdesi për besën e dhënë, Shqipëria është shumë pranë nesh”.

Ky vlerësim shihet si shprehje respekti për mikpritjen dhe vlerat e popullit shqiptar, si dhe për kontributin e komunitetit shqiptar në Zvicër, i cili ka luajtur rol të rëndësishëm në forcimin e lidhjeve dypalëshe.

Zvicra mbetet një nga partnerët më të rëndësishëm të Shqipërisë në fusha të shumta, veçanërisht në zhvillim ekonomik, arsim dhe bashkëpunim social.

Në këtë ditë historike për shqiptarët, urimi i Ambasadës zvicerane vjen si një dëshmi e miqësisë së fortë dhe respektit të ndërsjellë mes dy vendeve.

---