Prej sot, Aeroporti i Cyrihut ofron teste të shpejta për Covid-19

Testet e shpejta kryhen nga stafi i farmacisë ndërmjet orës 11.30 dhe 13.30 pasdite. Rezultatet, pas 15 minutash

Aeroporti i Cyrihut tani po ofron edhe teste të shpejta për koronavirus. Shtupat e hundës, të nevojshme për këtë lloj testimi merren në bashkëpunim me një farmaci në ish-zyrën e ID-së në Check-in 2 të aeroportit , por vetëm pas kontaktimit paraprak me telefon, njofton srf.ch.

Në këtë mënyrë, qendra për testim dëshiron të shmangë grumbullimet e mëdha të njerëzve, prandaj është i nevojshëm para-regjistrimi me telefon, njoftohet nga aeroporti.

Testet e shpejta kryhen nga stafi i farmacisë ndërmjet orës 11.30 dhe 13.30 pasdite, transmeton albinfo.ch. Rezultati i testit është i disponueshëm pas vetëm rreth 15 minutash.

Megjithatë, për të bërë testin, udhëtarët duhet të tregojnë nëse destinacioni i tyre i udhëtimit pranon testin e shpejtë.

Një test negativ PCR (dmth jo test i shpejtë) është ende i nevojshëm si dëshmi për destinacione të caktuara. Testet PCR dhe testet e antitrupave ofrohen në Qendrën Mjekësore të Aeroportit.

---