Ekonomia e Eurozonës rritet mbi pritshmëritë

EPA/BORIS ROESSLER

Sipas të dhënave nga Eurostat, Prodhimi i Brendshëm Bruto i 21 vendeve të monedhës së përbashkët u rrit me 0.4% në periudhën prill-qershor. Në tremujorin e parë, ekonomia e Eurozonës nuk kishte shënuar rritje.

Rezultati ishte dy herë më i lartë se parashikimi prej 0.2% i ekonomistëve të anketuar nga Bloomberg.

Rritja u mbështet nga performanca pozitive e ekonomive më të mëdha të bllokut. Gjermania dhe Franca u zgjeruan me nga 0.2%, ndërsa Spanja shënoi një rritje prej 0.7%, e nxitur edhe nga ecuria e fortë e sektorit të turizmit. Edhe ekonomia italiane u rrit me 0.2%, transmeton albinfo.ch.

Kontribut të rëndësishëm në rezultatin e përgjithshëm dha edhe Irlanda, ekonomia e së cilës u zgjerua me 3.9%, pas tkurrjes së fortë të regjistruar në tremujorin e parë.

Të dhënat tregojnë se Eurozona ka përballuar më mirë nga sa pritej rritjen e çmimeve të energjisë dhe pasiguritë e shkaktuara nga konflikti në Lindjen e Mesme.

Çmimi i naftës Brent është rikthyer mbi 92 dollarë për fuçi, pas prishjes së armëpushimit.

Banka Qendrore Evropiane ka mbajtur të pandryshuara normat bazë të interesit në 2.25%, ndërsa vijon të vlerësojë ndikimin e luftës mbi inflacionin dhe rritjen ekonomike.

Sipas parashikimeve të BQE-së, ekonomia e Eurozonës pritet të rritet me 0.8% gjatë vitit 2026 dhe me 1.2% në vitin 2027.