Kosova tashmë në Google Street View, publikohet pamja 360 gradë e qyteteve dhe atraksioneve turistike

Përdoruesit mund të eksplorojnë virtualisht rrugët, qytetet dhe bukuritë natyrore të Kosovës përmes platformës së Google

Kosova është përfshirë zyrtarisht në shërbimin Google Street View, duke u bërë pjesë e hartës globale të vendeve që mund të eksplorohen virtualisht përmes pamjeve panoramike 360 gradë, transmeton albinfo.ch.

Pas një procesi disamujor fotografimi, Google ka publikuar imazhe që mbulojnë pothuajse të gjithë territorin e Kosovës, të realizuara gjatë periudhës 2025–2026.

Përdoruesit tashmë mund të shëtisin virtualisht nëpër rrugët e qyteteve kryesore si Prishtina, Prizreni, Peja, Gjakova, Mitrovica, Gjilani dhe Ferizaj, si dhe të eksplorojnë zona rurale, rrugë malore dhe destinacione të njohura turistike.

Në mesin e atraksioneve të përfshira janë edhe Gryka e Rugovës, Parku Kombëtar i Sharrit dhe Bjeshkët e Nemuna, duke u ofruar vizitorëve nga e gjithë bota mundësinë të njohin nga afër bukuritë natyrore dhe kulturore të Kosovës.

Sipas të dhënave të publikuara, për realizimin e pamjeve janë përdorur kamera moderne të gjeneratës së katërt, ndërsa në disa lokacione janë shfrytëzuar pajisje të posaçme për fotografime në terrene dhe kushte më sfiduese.

Përfshirja e Kosovës në Google Street View pritet të ketë ndikim pozitiv në promovimin e turizmit, lehtësimin e navigimit dhe rritjen e prezencës digjitale të bizneseve lokale, duke e bërë vendin më të qasshëm për vizitorët dhe investitorët nga e gjithë bota./Albinfo.ch

---