Shtetësia zvicerane, kusht për punën e prokurorit

Mungesa e shtetësisë zvicerane do t`ua bëjë të pamundur kryerjen e funksionit të prokurorit tre zëvendësprokurorëve me shtetësi të huaj

Tre zëvendësprokurorë me pasaportë të huaj do të duhej që nga 1 janari i vitit të ardhshëm të fillonin punën e prokurorit, por mungesa e shtetësisë zvicerane do t`ua bëjë të pamundur këtë. Bëhet fjalë për një shtetas gjerman, një tjetër holandez dhe një shtetase italiane, të cilët prej dy deri tri vitesh bëjnë punën e zëvendësprokurorëve në Prokurorinë Federale.

Ata, në kuadrin e angazhimeve të tyre kryejnë punë si sekuestrime, urdhëresa për arrestim, mbikëqyrje të fshehta etj.

Duke arsyetuar vendimin për të penguar emërimin e tre të huajve në postin e prokurorit, prokurori federal Erwin Beyler ka thënë se para se të merret një vendim duhet pritur më parë rezultatet e debatit parlamentar që po zhvillohet lidhur me këtë temë. Deri më tash në Parlamentin Federal ka pasur disa kundërshtime lidhur me këtë çështje.