Të huajt bëhen më rrallë “për spital” se zviceranët

192 në 1000 zviceranë shtrohen në spital brenda vitit. Te të huajt, kjo shkallë është më e ulët se mesatarja zvicerane

Të huajt me qëndrim në Zvicër “vizitojnë” më rrallë spitalet në krahasim me vendësit. Këtë konstatim e ka arritur një studim i Observatorit Zviceran të Shëndetësisë, Obsan. Sipas studimit, megjithatë disa grupe të të huajve, për sëmundje të caktuara kanë shkallë më të lartë hospitalizimi.

Gjatë vitit 2009 në 1000 zviceranë 192 veta kishin qëndruar në spital. Te të gjithë të huajt, pos te amerikanët e jugut, afrikanët dhe rusët me qëndrim në Zvicër, kjo shkallë ishte më e ulët se mesatarja zvicerane. Te grupet e lartpërmendura bëhet fjalë për 200 deri 300 hospitalizime në 1000 banorë.

Në këtë studim nuk janë marrë parasysh strukturat e ndryshme moshore.

Zviceranët janë hospitalizuar mbimesatarisht shpesh për lëndimet e gjunjve ose të këmbëve, për kurim nga tumoret malinje etj. Ndërsa të huajt nga lindja e afërme kanë qëndruar në shkallë mbiproporcionale në spital për sëmundje psikike, të zemrës, të boshtit kurrizor dhe të shpinës.

Meshkujt nga Italia dhe femrat nga Evropa e lindjes shtrohen më shpesh në spital për sëmundje të veçanta të zemrës. Diabeti është më i shpeshtë te njerëzit nga Lindja e Afërt, Evropa lindore dhe Italia ndërsa më i rrallë te të huajt nga Evropa Perëndimore.

Ndër porositë që përcjell te migrantët ky studim është që ata të kenë më shumë kujdes në ushqim, lëvizje dhe pirje duhani, sepse shumica e sëmundjeve, më karakteristike për ta vijnë nga shprehitë që lidhen me faktorët e lartpërmendur.