OECD: Zvicra, shumë restriktive në natyralizimin e të huajve

"Të huajt me kualifikime të përafërta, detyrohen të shkruajnë pesë herë më tepër aplikime për punë se sa zviceranët"

OECD (Organizata Evropiane për Zhvillim dhe Bashkëpunim) kritikon praktikat zvicerane për natyralizimin e të huajve (dhënien e nënshtetësisë).

Zvicra merr nota të mira për politikën e saj integruese, por asaj i zihet për të madhe nga OECD për pengesat shumë të mëdha që i vendos në rrugën për fitimin e shtetësisë zvicerane dhe për faktin se po ndërmerr tepër pak masa kundër diskriminimit të të huajve, shkruan 20 minuten.

Sipas studimit të bërë nga OECD, integrimi i të huajve në Zvicër funksionon në përgjithësi relativisht mirë. Tri të katërtat e të huajve kane një punë, që është përqindje më e lartë se në të gjitha vendet e OECD-së. Por, në disa segmente të politikës së integrimit, Zvicra mbetet mbrapa, u tha në studimin që u prezantua të martën në Bernë.

Pika qendrore ku janë drejtuar kritika është pragu dukshëm më i lartë që parasheh Zvicra për të huajt që duan të fitojnë shtetësinë e këtushme, krahasuar me vendet tjera të OECD-së. Madje, edhe me revizionin e planifikuar të ligjit mbi shtetësinë, sistemi zviceran do të mbetet restriktiv në krahasim me sistemet e vendeve tjera.

Edukimi parashkollor ka marrë po ashtu nota të dobëta në studimin e lartpërmendur. “Ai ka një zhvillim shumë të ulët”, thuhet në studim. Autorët rekomandojnë një ofertë më të madhe për edukimin parashkollor dhe nxitje të fokusuar në mësimin e gjuhës për fëmijët migrantë.

Veçanërisht kritik është treguar studimi sa i përket diskriminimit të të huajve në Zvicër. Sipas tij, personat me prejardhje të huaj, me kualifikime të përafërta, detyrohen të shkruajnë pesë herë më tepër aplikime për punë se sa zviceranët. Prandaj, kuadri institucional për mbrojtje nga diskriminimi duhet të forcohet “urgjentisht” ka rekomanduar OECD.