Derri i ngordhur në truallin e xhamisë së shqiptarëve!

Kryetari i qytetit Grenchen, Boris Banga, në një prononcim të tij e ka quajtur këtë akt "të tmershëm dhe të neveritshëm"

Në hapësirën në të cilën është planifikuar ndërtimi i një xhamie në Grenchen të kantonit Soloturn, dikush ka hedhur një derr të ngordhur dhe katër koka derri. Po kështu, në vendin ku duhet të vihen themelet e xhamisë, dorasit kanë derudhur rreth 120 litra gjak derri, për të “përdhosur” kështu truallin e xhamisë.

Pas njoftimit të bërë përmes një letre me fotografi nga vendi i ngjarjes, policia kantonale ka vërtetuar gjendjen faktike dhe tashmë ka filluar hetimet, njoftojnë mediet zvicerane.

Kryetari i qytetit Grenchen, Boris Banga, në një prononcim të tij për radion lokale “Radio 32” e ka quajtur këtë akt “të tmershëm dhe të neveritshëm” dhe ka dënuar aktet e tilla.

Xhamia që do të ndërtohet në këtë ngastër toke në zonën industriale të qytetit, i takon bashkësisë islame shqiptare të Grenchenit. Aty është planifikuar ndërtimi i një qendre dykatëshe kulturore me xhaminë në kuadër të saj. Në kohën kur blerësit e tokës patën deklaruar se aty do të ndërtonin një xhami, ish pronari, një politikan i SVP-UDC-së pati ushtruar padi kundër blerësit.

Kjo, për faktin se ai ia kishte shitur truallin një garazhisti, i cili pastaj atë ia ka shitur bashkësisë islame. Kështu, politikani i ndjente veten të mashtruar nga blerësi. Por ankesa e ish pronarit nuk ishte pranuar kështu që bashkësia islame shqiptare e kishte të drejtën e plotfuqishme të ndërtimit.

Këshilli Qendror Islam i Zvicrës, një organizatë kontroverse e islamistëve me seli në Biel-Bienne e ka düenuar ashpër aktin, duke e quajtur atë “përdhoseje të truallit të xhamisë”. Akti duhet të hetohet në imtësi, ka kërkuar kjo qendër.