Lehtësohen kontrollet e sigurisë në aeroporte?

Për një sistem të ri kanë menduar hulumtuesit danezë, të cilët synojnë lehtësimin e kontrolleve të sigurisë nëpër aeroporte. Nëse kjo do të përdoret në Zvicër, mbetet ende e hapur.

„St.Galler Tagblatt”, duke cituar gazetën “Berlingske”, thotë se do të përdoren karroca plastike, të cilat janë shpërndarë nga aeroporti. Valixhet mund të vendosen mbi të. Karroca plastike kalohet pastaj përmes një skaneri me rreze X në pikën e kontrollit të sigurisë. Kjo mund të krijojë një 3-D fotografi të përmbajtjes së bagazhit, përcjell albinfo.ch.

Madje sistemi edhe mund të bëjë dallimin në mes të ujit në shishe dhe alkoolit. Sistemi mund të zbulojë eksplozivë të lëngët ose lëngje të tjera të paligjshme, ka thënë Ulrik Lund Olsen, shef i fizikës në Universitetin Teknik të Danimarkës (DTU).

Me sistemin e ri 600 njerëz do të kontrollohen në orë. Janë katër herë më shumë se sistemi aktual.
Nëse çdo gjë shkon sipas planit, sistemi danez i sigurisë mund të aplikohet në aeroporte të ndryshme në më pak se dy vjet.