1 milion euro shpërblim në rast të kualifikimit të Kosovës në Botërorin 2026

Keystone (AP Photo/Visar Kryeziu)

Kryeministri në detyrë i Kosovës, Albin Kurti, ka premtuar shpërblim prej 1 milion eurosh në rast se Përfaqësuesja e Kosovës në futboll arrin të kualifikohet për Kampionatin Botëror 2026.

Gjatë mbledhjes së Qeverisë në detyrë të enjten, Kurti njoftoi për miratimin e 250 mijë eurove si shpërblim për suksesin historik të Kosovës — kualifikimin në plejofin e Botërorit. Ai shtoi se qeveria do të ndajë edhe 500 mijë euro shtesë nëse Kosova e mposht Sllovakinë në ndeshjen e ardhshme.

“Në fazën e radhës hyjmë me plot vetëbesim. Në rast të fitores ndaj Sllovakisë zotohemi për shpërblim prej 500 mijë eurosh. Në rast të kualifikimit në Botëror zotohemi për shpërblim prej 1 milion eurosh”, deklaroi Kurti.

Kosova do të luajë më 26 mars në Bratislavë kundër Sllovakisë. Në rast të fitores, ndeshjen vendimtare për kualifikim e zhvillon në Prishtinë, kundër fituesit të përballjes Turqi – Rumani.

Po ashtu, Qeveria miratoi mbi 23 mijë euro shpërblim për klubin e futsallit Prishtina 01, për arritjet e tij në Ligën e Kampionëve.