Zvicrës i janë shtuar 100.000 banorë të rinj

Kur të hiqet numri i atyre që e kanë lëshuar Zvicrën numri “neto” i të ardhurve nga jashtë gjatë vitit 2013 është 82.800. Numri i të huajve në Zvicër është 1 milion e 937.400 veta

Në Zvicër është duke vazhduar trendi i rritjes së numrit të banorëve. Sipas zyrës Federale për Statistikë (BFS), aktualisht në Zvicër jetojnë 8.139 mijë njerëz ose 100 mijë më shumë se një vit më parë. Shkaktarët kryesorë të kësaj rritjeje janë migrimi i të huajve dhe numri i madh i lindjeve.

Tri të katërtat e personave që gjatë kësaj periudhe kanë ardhur në Zvicër si migrantë, janë nga vendet evropiane. Në vend të parë janë gjermanët me 26.400 të ardhur, e pas tyre vijnë portugezët (20.000), italianët (17.700), francezët (13.600) dhe spanjollët (9600).

Po ashtu Zyra Federale për Statistikë njofton se edhe gjatë vitit të kaluar ka pasur më shumë zviceranë që kanë lëshuar vendin se sa zviceranë “të jashtëm” që janë kthyer në Zvicër.

Kur të hiqet numri i atyre që e kanë lëshuar Zvicrën numri “neto” i të ardhurve nga jashtë gjatë vitit 2013 është 82.800 persona. Ndërsa në përgjithësi në Zvicër janë regjistruar gjatë kësaj kohe 193.300 persona të ardhur rishtas, prej të cilëve 167.200 të huaj dhe 26.100 shtetas zviceranë (te kthyer nga jashtë).

Numri i të ardhurve është rritur 10.5% në krahasim me vitin 2012. Është rritur edhe numri i të shkuarve, por në masë shumë më të vogël, gjegjësisht 2.2%.

Numri më i madh i atyre që e kanë lëshuar Zvicrën janë gjermanë (15.900), francezë (7300), Italianë (6200) etj.

Numri i gjithëmbarshëm i të huajve që në fund të vitit 2013 kanë jetuar në Zvicër sipas BFS ka qenë 1 milion e 937.400 veta. Ndërsa numri i shtetasve zviceranë, 6 milionë e 202.200. Ky i fundit është rritur për 33.100 persona dhe kjo është bërë falë natyralizimit të të huajve.