Zvicra zbaton sanksione të reja kundër Rusisë

Para së gjithash, në këtë kuadër bëhet fjalë, për ndalimin e blerjes, importimit ose transportit të arit dhe produkteve të arit nga Rusia

Si reagim ndaj agresionit të vazhdueshëm ushtarak rus në Ukrainë, Këshilli Federal ka vendosur sanksione të mëtejshme ndaj Rusisë. Kështu Këshilli Federal ka vendosur të zbatojë edhe sanksionet e fundit që BE ka vënë ndaj shtetit agresor, Rusisë, transmeton albinfo.ch.

Para së gjithash, në këtë kuadër bëhet fjalë, për ndalimin e blerjes, importimit ose transportit të arit dhe produkteve të arit nga Rusia, shkruan srf.ch. Të gjitha shërbimet tjera në lidhje me këto mallra tani janë gjithashtu të ndaluara. Masat kanë hyrë në fuqi sot, të mërkurën, në orën 18:00.

Më tutje, Zvicra është e vendosur të ndihmojë në luftimin e krizës globale të ushqimit dhe energjisë, vazhdon Këshilli Federal në një komunikatë të tij të lëshuar sot.

Qeveria e shtetit deklaron se asnjë nga sanksionet kundër Rusisë nuk drejtohet kundër tregtisë së produkteve bujqësore dhe ushqimore midis vendeve të treta dhe Rusisë.

Për të shmangur ndërprerjet në kanalet e pagesave, Këshilli Federal ka krijuar dy përjashtime të reja për transaksionet në lidhje me produktet bujqësore dhe dërgimin e naftës në vendet e treta, të gjitha këto, analoge me BE-në.

---