Zvicra voton sot, kjo është arsyeja

Propozimi ka mbështetjen e Partisë së Gjelbër, Partisë Socialdemokrate të majtë, si dhe shumicën e organizatave mjedisore

Votuesit të dielën do të vendosin për një propozim për të ndalur shtrirjen urbane në Zvicër, shkruajnë mediat zvicerane.

Iniciativa e Partisë së Gjelbër ka humbur terren në mesin e publikut gjatë javëve të fundit dhe duket se do të dështojë, përcjell albinfo.ch.

Nxitësit e iniciativës argumentojnë se nevojiten hapa të mëtejshëm ligjorë për të mbrojtur dhe ruajtur hapësirat e gjelbra dhe tokat bujqësore kundër urbanizimit të shfrenuar në Zvicër.

Nëse miratohen nga votuesit, zonat e reja të zhvillimit do të lejoheshin vetëm nën kushte të caktuara dhe autoritetet do të duhej të promovonin krijimin e zonave të banimit të qëndrueshëm mjedisor në zonat urbane, të njohura si ndërtime me densitet të lartë, përcjell tutje albinfo.ch.

Iniciativa gjithashtu parasheh që zonimi i tokës së re ndërtimore nuk është i pranueshëm nëse sipërfaqja përkatëse nuk kompensohet diku tjetër.

Iniciativa u nis në 2015 me më shumë se 113,000 qytetarë duke bërë thirrje për një votim mbarëkombëtar mbi çështjen. Propozimi ka mbështetjen e Partisë së Gjelbër, Partisë Socialdemokrate të majtë, si dhe shumicën e organizatave mjedisore.

Rreth 5.3 milionë shtetas zviceranë, përfshirë anëtarët e regjistruar të komunitetit zviceran të emigruar, kanë të drejtë të marrin pjesë në votimin e 10 shkurtit.

Ky është votimi i parë mbarëkombëtar këtë vit.

---