Zvicra po shënon sërish rritje të rasteve me Covid

(KEYSTONE/Salvatore Di Nolfi)

Pas arritjes së kulmit në janar, më pas rënies dhe stabilizimit për njëfarë kohe – duke nxitur Këshillin Federal të heqë pothuajse të gjitha masat shëndetësore – numri i infeksioneve të reja është në rritje e sipër në shtetin e Zvicrës, përcjell albinfo.ch.

Nga pak më shumë se 16,000 të hënën, numri u rrit në 23,684 dje, sipas të dhënave nga Zyra Federale e Shëndetit Publik.

Në të njëjtën kohë, numri i pranimeve në ICU të lidhura me Covid gjithashtu është rritur pak – nga 127 më 28 shkurt, në 135 më 1 mars.

Në varësi të evolucionit të mëtejshëm të situatës epidemiologjike përgjatë muajit mars, Këshilli Federal do të vendosë nëse do të heqë rregullat e mbetura të Covid – maskat në transportin publik dhe në institucionet shëndetësore, si dhe detyrimin e izolimit për individët e infektuar – nga fundi i muajit.