Zvicra po bëhet gjithnjë më e dendur, ndërsa Evropa po zbrazet

Zvicra po përjeton një rritje të vazhdueshme të popullsisë dhe densitetit, ndërsa shumë vende të Evropës po përballen me tkurrje demografike dhe plakje të popullsisë

Sipas të dhënave të fundit, Zvicra ka kaluar mbi 9 milionë banorë dhe vazhdon të rritet kryesisht falë emigracionit, jo lindjeve.

Në të njëjtën kohë, për herë të parë, numri i personave mbi 65 vjeç ka tejkaluar atë të të rinjve nën 20 vjeç.

Në kontrast, shumë rajone të Evropës – sidomos në lindje dhe jug – po përjetojnë rënie të popullsisë për shkak të lindshmërisë së ulët dhe emigrimit, raporton SRF, transmeton albinfo.ch.

Parashikimet tregojnë se pas vitit 2026, popullsia e Bashkimit Evropian do të fillojë të bjerë në mënyrë afatgjatë.

Ndërkohë, rritja në Zvicër po sjell edhe sfida: presion mbi tregun e banesave, infrastrukturën dhe shërbimet publike.

Ekspertët theksojnë se kjo ndarje demografike po krijon një Evropë me dy ritme: një pjesë që rritet dhe urbanizohet, dhe një tjetër që zbrazet gradualisht.

---