Zvicra planifikon të lehtësojë përgjimet telefonike për të monitoruar grupet ekstremiste

Këshilli i Shteteve në Zvicër ka miratuar disa mocione që kërkojnë zgjerimin e kompetencave të mbikëqyrjes, duke përfshirë përgjimet telefonike ndaj grupeve ekstremiste të dhunshme. Aktualisht, masa të tilla hetimore lejohen vetëm në raste që lidhen me terrorizmin, përhapjen e armëve bërthamore ose sulmet ndaj infrastrukturës kritike.

Nisma për ndryshimin e ligjit erdhi pas protestës pro-palestineze që u shndërrua në dhunë në Bernë në nëntor, ku u plagosën disa persona, përfshirë policë dhe protestues. Sipas autorëve të mocionit, kjo ngjarje tregoi se grupet ekstremiste mund të përbëjnë një kërcënim gjithnjë e më të madh për sigurinë publike.

Senatorët e miratuan propozimin me shumicë të madhe votash, duke mbështetur gjithashtu edhe iniciativa të tjera që synojnë forcimin e luftës kundër dezinformimit që vjen nga jashtë.

Me këtë hap, autoritetet synojnë t’u japin organeve të sigurisë mjete shtesë për të parandaluar dhe hetuar aktivitetet e grupeve të dhunshme. Dosja tani do të kalojë për shqyrtim në Këshillin Kombëtar.