Zvicra, pjesë e Agjencionit Evropian të azilit EASO

EASO si agjencion i BE-së është përgjegjës për bashkëpunimin praktik në mes të shteteve anëtare në lëmin e azilit

Pjesëmarrja e Zvicrës në European Asylum Support ose zyrën mbështetëse Evropiane për çëshje të Azilit (EASO) e forcon bashkëpunimin me shtetet anëtare të Dublinit në fushë të azilit dhe rrjedhimisht është në interes të Zvicrës. Sot hyn në fuqi marrëveshja përkatëse e Zvicrës me BE-në.

EASO si agjencion i BE-së është përgjegjës për bashkëpunimin praktik në mes të shteteve anëtare në lëmin e azilit. Ai lehtëson, koordinon dhe promovon bashkëpunimin ndërshtetëror në çështjet e azilit si dhe mbështet në veçanti shtetet anëtare, sistemet për pranim të azilkërkuesve të të cilave janë nën presion më të madh, njofton Sekretariati Shteteror për Migracion (SEM).

Pikërisht në situatën aktuale të azilit në Evropë është në interes të Zvicrës që të forcohet sistemi i Dublinit. Veç kësaj, Zvicra, duke marrë pjesë në EASO fiton mundësi më të mëdha ndikimi në fushë të azilit dhe siguron qasje në informacionet e rëndësishme si për shembull, ekspertizën për vendet e prejardhjes së azilit.

Bashkëpunimi tashmë i ngushtë i Zvicrës me shtetet anëtare të BE-së në kuadrin e marrëveshjes së Dublinit, do të thellohet më tej përmes pjesëmarrjes së saj në EASO.

EASO merr pjesë qenësore në ngritjen dhe punën e të ashtuquajturave Hotspots në Itali dhe në Greqi, pika në të cilat bëhet regjistrimi i azilkërkuesve. Me hyrjen në fuqi të marrëveshjes me EASO-n, mund të dërgohen edhe ekspertët zviceranë në këto qendra.

Parlamenti i Zvicrës ka miratuar në mars të vitit 2015 marrëveshjen të cilën pastaj Parlamenti Evropian e ka miratuar në dhjetor po të vitit 2015.