Zvicra përuron ambasadën e re në Moskë

EPA/YURI KOCHETKOV

Zvicra ka përuruar një ambasadë të re në Moskë. Siç raporton swisinfo.ch, ndërtesa 42 milionë dollarëshe bashkon agjenci të ndryshme që mëtojnë të promovojnë interesat zvicerane jashtë vendit, përcjell albinfo.ch.

Ambasada e re e Zvicrës në kryeqytetin rus është ndër përfaqësitë më të mëdha të Zvicrës jashtë vendit dhe pasqyron rëndësinë e marrëdhënieve mes dy vendeve, sipas Ministrisë së Jashtme, transmeton swissinfo.ch.

Në përurimin e sotëm, morën pjesë rreth 800 të ftuar, duke përfshirë edhe ministrin e Jashtëm të Zvicrës Ignazio Cassis dhe homologun e tij rus, Sergei Lavrov.

Ambasada e re përbëhet nga dy ndërtesa, një objekt që ekzistonte qysh nga shekulli i 19-të  (që konsiderohej e vogël për stafin diplomatik) dhe një ndërtesë e re, e projektuar nga arkitektët e Lozanës, Brauen dhe Walchli.

Aktualisht, në këtë ambasadë punojnë rreth 70 persona, duke përfshirë 31 zviceranë. Ambasadori i tanishëm është ish-sekretari i Shtetit për Punë të Jashtme, Yves Rossier, i cili është në Moskë qysh nga viti 2016, përcjell albinfo.ch.