Zvicra përgatitet për strehim më masiv të refugjatëve nga Siria

Këshilli Federal pati miratuar një kërkesë e cila kërkonte pranimin e grupeve dukshëm më të mëdha të refugjateve se deri më tash

Ministrja e drejtësisë, Somonetta Sommaruga është duke përgatitur pranimin së shpejti të mijëra refugjatëve të rinj nga Siria në Zvicër, shkruan gazeta “SonntagsZeitung”. “Nisur nga situata emergjente që mbretëron atje, Zvicra duhet të angazhohet urgjentisht dhe më shumë”, ka thënë sekretari i përgjithshëm i organizatës për ndihmë refugjatëve “Flüchtlingshilfe”, Beat Miner, sipas të cilit, për këtë situatë është e vetëdijshme edhe qeveria e vendit.

Ai shton se së paku nga 6 qershori “ka sinjale nga administrata” dhe kantonet e dinë se në Zvicër do të strehohen edhe grupe të tjera të refugjatëve. Më atë datë, Këshilli Federal pati miratuar një kërkesë e cila kërkonte pranimin e grupeve dukshëm më të mëdha të refugjateve se deri më tash.

Por, edhe pavarësisht nga strehimi që Zvicra zyrtare po përgatitet ta bëjë, në të ardhmen pritet një rritje e madhe e numrit të  refugjatëve që do të zgjedhin Zvicrën për t`u strehuar.

Në nivel vendi, Zvicra parasheh që muajve në vijim të strehojë mesatarisht nga 1400 refugjatë në muaj. Edhe vetë Zyra Federale për Migracion (BFM), në një publikim intern dhe të besueshëm sipas gazetës “NZZ am Sonntag” ka shkruar se deri në muajin gusht 2014 numri i refugjatëve të strehuar pritet të jetë nga 1100 deri në 1400 në muaj. Me këtë rast është menduar për azilkërkues që do t`u jepet statusi i përkohshëm (F) ose do t`u njihet azili .

Ndërkohë BFM pret që në muajt e ardhshëm në Zvicër te ketë mbi 2000 kërkesa azili në muaj.