Zvicra, “në fund të pusit” për prodhimin e energjisë së ripërtërishme

Vetëm Sllovenia, Sllovakia, Hungaria dhe Letonia janë mbrapa Zvicrës kur bëhet fjalë për përfitimin e energjisë elektrike nga burimet si dielli dhe era

Zvicra, ndonëse njëri ndër vendet me standardin më të lartë (jo vetëm) në Evropë është duke çaluar ndjeshëm sa i përket prodhimit të energjisë së ripërtërishme. Ajo, në mesin e 29 vendeve të Evropës zë vetëm vendin e 25-të në këtë pikë.

Vetëm Sllovenia, Sllovakia, Hungaria dhe Letonia janë mbrapa Zvicrës kur bëhet fjalë për përfitimin e energjisë elektrike nga burimet si dielli dhe era. Arsyeja për këtë prapambetje të Zvicrës është mungesa e parasë gjegjësisht mosgatishmëria e shtetit për të investuar.

Udhëheqësja e studimit të realizuar për këtë çështje, Myriam Pflanzer  thotë se janë 37.000 projekte të kësaj natyre që po presin në listë për t`u financuar nga shteti.

Ndryshe nga shtete tjera të Evropës Perëndimore, ku energjia e ripërtërishme bën një pjesë të madhe në gjithë vëllimin e energjisë së prodhuar, në Zvicër ajo ka një rëndësi mjaft margjinale. Në vitin 2015 në këtë vend janë prodhuar rreth 170 kilovatorë energji nga dielli dhe nga era, sasi kjo që është e barabartë me atë që shpenzon një frigorifer brenda një viti.

Edhe pse gjatë pesë viteve të fundit Zvicra ka 15 fishuar prodhimin e energjisë elektrike nga dielli dhe trefishuar atë nga era, ajo nuk ka arritur të përmirësojë pozitën e saj në listën e përmendur, ku mbetet e 25-ta në Evropë.